Read La Bible en Sango courant – Mbeti ti Nzapa Filipe 4 Bible Online

Filipe 4 - La Bible en Sango courant – Mbeti ti Nzapa bible

Filipe 4

¹Tongaso, a-ita ti mbi so mbi ye ala mingi, nzara ti kiri ti baa ala asara mbi mingi! Ala zia ngia na be ti mbi mingi si tere ti mbi anzere mingi ndali ti ala! A-ita ti mbi so mbi ye ala mingi, na lege ti gango so ala ga oko na *Kota Gbia, ayeke nzoni ala ngba ti gbu tënë ti Nzapa ngangu tongaso.

²Mbi hunda mingi na Évodie nga na Sentish titene ala ma tere ndali ti gango so ala ga oko na *Kota Gbia.

³Ti mo, so mo yeke taa mba ti mbi zo ti kua, mbi hunda na mo titene mo mu maboko na awali use so, ngbanga ti so ala sara kua ngangu na tere ti mbi ti fa Nzoni Tënë na azo, ala na Clément nga na ambeni mba ti mbi, azo ti kua so kue iri ti ala ayeke na ya ti mbeti so a su iri ti azo so ayeke na taa fini daa.

⁴Ala duti na ngia lakue, ngbanga ti so ala ga oko na *Kota Gbia awe! Mbi kiri mbi tene: ala duti na ngia!

⁵Ala sara titene azo kue abaa so ala yeke azo ti nzoni be. Kota Gbia aga nduru ti si awe.

⁶Ala gi be ti ala ndali ti mbeni ye oko pepe, me na ya ti ye kue, ala fa na Nzapa ye so ala ye, na lege ti sambela, na vorongo tere nga na mungo singila na lo.

⁷Tongaso, fade siriri ti Nzapa so ahon hingango ndo ti azo kue ayeke bata be ti ala na yingo ti ala oko na Christ.

⁸A-ita, ti hunzi na ni, alingbi ala zia be ti ala na ndö ti ye so ayeke taa-tënë, ye so ayeke ye ti nengo ni, ye so ayeke mbirimbiri, ye so ayeke nzoni kue, ye so zo alingbi ti ye ni, ye so zo alingbi ti gonda ni, ye so kue ayeke nzoni mingi, ye so zo alingbi ti tene nzoni tënë ni na le ti azo.

⁹Ye so mbi fa na ala, ye so ala ma ni si ala baa mbi na sarango ni, ayeke nzoni ala sara ni. Fade Nzapa so ayeke mu siriri na zo ayeke duti na ala.

¹⁰So mbi ga oko na *Kota Gbia awe, be ti mbi anzere mingi ndali ti so ala kiri afa na mbi atene, be ti ala angba ti ye mbi. Mbi hinga so be ti ala aye ando mbi, me lege ti sara na mbi ayeke daa pepe.

¹¹Ndali ti so mbeni ye atia mbi si mbi yeke tene tënë tongaso? Oko pepe. Mbi hinga ti zia be ti mbi gi na ndö ti ye so mbi yeke na ni.

¹²Mbi hinga lege ti duti na ya ti mawa, mbi hinga nga lege ti duti na ye mingi. Na ndo kue, na ndembe kue, mbi hinga ti duti na ngia, ataa ya ti mbi asi wala mbi duti na nzara, ataa mbi yeke na gba ti ye wala ye atia mbi.

¹³Mbi lingbi ti sara aye so kue, ngbanga ti so Christ laa amu na mbi ngangu.

¹⁴Me ala sara nzoni si ala yo mbage ti kungba ti mawa ti mbi so.

¹⁵Ala azo ti *Eglize ti Filipe, ala wani ahinga atene, na ndembe so mbi londo lani na Masedoane, na ngoi so a to nda ti fango Nzoni Tënë, gi ala oko laa amu na mbi maboko, ala mu ye na mbi na peko ti ye so mbi mu na ala; mbeni Eglize nde asara tongaso pepe.

¹⁶So mbi yeke na Tesalonike, ala laa atokua na mbi ye so atia mbi; ala sara ni gi fani oko pepe.

¹⁷Mbi yeke tumba peko ti ye ti azo pepe; me ye so mbi yeke gi ayeke titene azo ni awara nzoni mingi na lege ti kua so ala yeke sara.

¹⁸Na ndembe so, mbi wara aye so alingbi na mbi awe; mbi kiri mbi wara ahon ndoni. Mbi yeke na ye mingi na peko ti so Epafrodite aga na aye so ala tokua na mbi so. Aye so ala tokua so ayeke tongana yombo so afun nzoni, ayeke nga tongana *sandaga so Nzapa aye tënë ni si anzere na be ti lo.

¹⁹Fade Nzapa ti mbi ayeke mu na ala ye so kue atia ala; lo yeke mu ni na ala na lege ti Jésus Christ, ngbanga ti so lo yeke na anzoni mosoro ahon ndoni.

²⁰E gonda Nzapa Babâ ti e kpu na kpu! Amen.

²¹Na lege ti gango so e ga oko na Jésus Christ, ala bara na mbi azo ti Nzapa oko oko kue. A-ita so ayeke na tere ti mbi ge abara ala.

²²Azo ti Nzapa so kue ayeke ge abara ala, mbirimbiri ala so ayeke na ya ti yangbo ti kota gbia ti Rome abara ala mingi.

²³Ayeke nzoni *Kota Gbia Jésus Christ asara nzoni be na ala kue!