Read La Bible en Sango courant – Mbeti ti Nzapa 1 Tesalonike 3 Bible Online

1 Tesalonike 3 - La Bible en Sango courant – Mbeti ti Nzapa bible

1 Tesalonike 3

¹Na ndani, e lingbi ti kanga be ti e ti ku ngbii pepe. Tongaso, e leke na be ti e ti ngba gi e oko na Athènes.

²Nilaa e tokua ita ti e Timothée na ala; lo na Nzapa laa ayeke sara kua ti fa Nzoni Tënë ti Christ. E tokua lo na ala ti sara si ala kpengba, ti mu wango na ala si ala gbu ngangu na lege ti mabe ti ala.

³Tongaso, pasi so e yeke baa fadeso asara si mbeni zo oko na popo ti ala ati pepe. Ala wani ahinga so, amara ti pasi tongaso ayeke aye so Nzapa aleke ni ndali ti e kozoni.

⁴Na ndembe so e ngba na popo ti ala, e tene na ala, e tene, fade e yeke baa pasi mingi; pasi ni laa asi awe so, ala hinga tënë ni awe.

⁵Ndani laa, so mbi lingbi ti kanga be ti mbi ti ku ngbii pepe, mbi tokua Timothée titene lo gue, lo hinga tënë na ndö ti mabe ti ala. Mbeto agbu mbi si mbi hunda tere ti mbi, mbi tene: wala Zabolo ahanda ala si akua so kue e sara so aga gi senge senge?

⁶Me fadeso, Timothée alondo na ndo ti ala kâ, lo kiri na e awe. Lo tene na e nzoni tënë na ndö ti mabe ti ala nga na ndö ti ndoye ti ala. Lo tene nga na e, lo tene, ala yeke dabe ti ala na e lakue si ala yeke na nzara ti kiri ti baa e tongana ti so e nga, e yeke na nzara ti kiri ti baa ala.

⁷Tongaso, a-ita, na ya ti aye so kue azia mbeto na be ti e nga na ya ti apasi ti e, e wara ngangu na lege ti ala, ndali ti mabe ti ala.

⁸Fadeso tere ti e akiri ayapu, ngbanga ti so ala ngba ti gbu ngangu na lege so ala ga oko na *Kota Gbia.

⁹Singila ti nyen laa e yeke mu ande na Nzapa ti e ndali ti ala alingbi na kota ngia so ala zia na be ti e na le ti lo so?

¹⁰Bi na lâ, e yeke hunda mingi na Nzapa titene lo sara si e kiri e baa le ti ala si na lege ti e, ala yeke wara aye so atia mabe ti ala.

¹¹Ayeke nzoni Nzapa, Babâ ti e, lo na Kota Gbia ti e Jésus azi na e lege si e gue ti baa ala!

¹²Ayeke nzoni Kota Gbia asara si yengo so ala ye tere na popo ti ala nga na yengo so ala ye na azo kue ague guengo na nduzu, alingbi na yengo so e ye na ala!

¹³Ayeke nzoni lo mu ngangu na be ti ala, tongaso si, na lango so Kota Gbia ti e Jésus ayeke kiri ti ga na azo ti lo kue, fade ala duti azo so tënë ayeke na li ti ala pepe, azo so ayeke nde si ayeke nzoni kue na le ti Nzapa, Babâ ti e. [Amen.]