Read La Bible en Sango courant – Mbeti ti Nzapa Josué 15 Bible Online

Josué 15 - La Bible en Sango courant – Mbeti ti Nzapa bible

Josué 15

¹So ayeke sese so a mu na azo ti mara ti Juda alingbi na akete mara ti ala; ti londo na Mbongo-To, sese ni ague ngbii asi na katikati ti sese ti Edom, amu benyama ti Zin, so ayeke na mbage ti Mbongo kâ, ague, asi na mbage ti gbeni kâ.

²Katikati ti sese ti ala na mbage ti Mbongo, alondo na yanga ti kota ngu ti Gba-ti-ingo, so ayeke baa le na sese ti mbage ti Mbongo.

³Na pekoni, ahon na Mbongo ti hoto ti Akparakongo nga na benyama ti Zin. Akiri ahon na Mbongo ti Kades-Barnea, ague ngbii asi na Hesron nga na Adar, angoro ague na mbage ti Karka.

⁴Sese ni akiri ahon na mbage ti Asmon, ague ngbii asi na ngu ti Ezipte si asi na kota ngu-ingo ti Mediterane. Ndo so katikati ti sese ti Juda ahon daa na mbage ti Mbongo laa.

⁵Na mbage ti To, katikati ti sese ni ayeke kota ngu ti Gba-ti-ingo, ague ngbii asi na ndo so ngu ti Jourdain ayeke tuku daa na ya ti kota ngu ti Gba-ti-ingo ni. Na ndo so nga laa katikati ti mbage ti Banga ato nda ni daa.

⁶Katikati ni ague na mbage ti nduzu na Bet-Hogla, ahon na Banga ti Bet-Araba, angoro ngbii asi na tere ti têne ti Bohan, molenge ti Ruben.

⁷Katikati ti sese ni akiri ahon na popo-hoto ti Akor, ague na mbage ti Debir. Na mbage ti Banga, angoro ague na mbage ti Gilgal, na ndo so abaa le na hoto ti Adumim, so ayeke na yanga ti ngu, na Mbongo. Na pekoni, ahon na tere ti li ti ngu ti En-Shemesh si asi na En-Rogel.

⁸Katikati ni akiri ahon na popo-hoto ti Hinom, na tere ti hoto ti mbage ti Mbongo ti azo ti mara ti Yebus, so ti tene Jérusalem. Na pekoni, katikati ni ague ngbii asi na li ti hoto so ayeke na Do ti popo-hoto ti Hinom, akiri ague ngbii asi na popo-hoto ti azo ti mara ti Refa, na mbage ti Banga.

⁹Na ndo so, katikati ni angoro asi na li ti ngu ti Neftoa; ague, asi na agbata so ayeke nduru na hoto ti Efron, akiri angoro ahon na mbage ti Baala, so a iri ni nga Kiriat-Yearim.

¹⁰Na Baala, katikati ni angoro ague na mbage ti Do, na mbage ti hoto ti Seir, amu tere ti hoto ti agbako, so ti tene Kesalon; azu na mbage ti Bet-Shemesh si ahon na Timna.

¹¹Katikati ni akiri amu tere ti hoto ti Ekron, afâ ya ti hoto ti Baala, ague na mbage ti Yabne. Na pekoni asi na kota ngu-ingo ti Mediterane.

¹²Katikati ni na mbage ti Do ayeke kota ngu-ingo ti Mediterane. So ayeke akatikati ti sese so a kangbi ni na azo ti Juda alingbi na akete mara ti ala laa.

¹³Ti Kaleb, molenge ti Yefune, a mu na lo mbeni mbage ti sese ti azo ti Juda, alingbi na yanga so *KOTA GBIA amu na Josué. A mu na lo Kiriat-Arba, wala gbata ti Arba, so a iri ni nga Hebron. Arba ayeke kotara ti azo ti mara ti Anak.

¹⁴Kaleb atumba azo ti kete mara ota ti Anak na Hebron: mara ti Sheshai, ti Ahiman na ti Talmai.

¹⁵Lo londo na ndo so si lo gue ti tiri bira na azo ti Debir; iri ti Debir ni ayeke ando Kiriat-Sefer.

¹⁶Kaleb atene: “Zo so atiri bira na azo ti Kiriat-Sefer si lo mu gbata ni, fade mbi yeke mu na lo molenge ti mbi ti wali Aksa titene lo ga wali ti lo.”

¹⁷Otniel, molenge ti Kenaz, ita ti Kaleb, amu gbata ni si Kaleb amu na lo molenge ti lo Aksa titene lo ga wali ti lo.

¹⁸Gi so Aksa asi na tere ti Otniel awe, lo tene na Otniel ti hunda na babâ ti ni mbeni yaka. Aksa alondo na ndö ti lele ti lo, lo zu na sese si Kaleb ahunda lo, atene: “Mo ye nyen?”

¹⁹Lo kiri tënë, lo tene: “Sara nzoni be na mbi. Biani, sese so mo mu na mbi na mbage ti Mbongo ayeke kuru sese; mu na mbi sese so adu ti ngu ayeke daa.” Tongaso Kaleb amu na lo adu ti ngu ti mbage ti nduzu na adu ti ngu ti mbage ti gbeni.

²⁰So ayeke sese so aga ye ti azo ti mara ti Juda alingbi na akete mara ti ala laa.

²¹Agbata so ayeke na yanga ti sese ti Juda, na mbage ti Mbongo, nduru na katikati ti sese ti Edom ayeke so: Kabseel, Eder, Yagur,

²²Kina, Dimona, Adeada,

²³Kedesh, Hasor, Itnan,

²⁴Zif, Telem, Bealot,

²⁵Hasor-Hadata, Keriot-Hesron, so a iri ni nga Hasor,

²⁶Amam, Shema, Molada,

²⁷Hasar-Gada, Heshemon, Bet-Pelet,

²⁸Hasar-Shual, Bersheba na akodro so ayeke na tere ni,

²⁹Baala, Iyim, Esem,

³⁰Eltolad, Kesil, Horma,

³¹Siklag, Madmana, Sanesana,

³²Lebaot, Shilim na En-Rimon. Agbata ni kue ayeke baleuse na gumbaya, ala na akete kodro so ayeke na tere ni.

³³Agbata so ayeke na *Kodro-ti-gbeni ayeke so: Eshetaol, Sora, Ashena,

³⁴Zanoa, En-Ganim, Tapua, Enam,

³⁵Yarmut, Adulam, Soko, Azeka,

³⁶Shaaraim, Aditaim, Gedera na Gederotaim. Agbata ni kue ayeke baleoko na osio, ala na akete kodro so ayeke na tere ni.

³⁷Ambeni gbata ni ayeke nga Senan, Hadasha, Migdal-Gad,

³⁸Dilan, Mispe, Yokteel,

³⁹Lakish, Boskat, Eglon,

⁴⁰Kabon, Lahemas, Kitlish,

⁴¹Gederot, Bet-Dagon, Naama na Makeda. Agbata ni kue ayeke baleoko na omene, ala na akete kodro so ayeke na tere ni.

⁴²Ambeni gbata ni nga ayeke Libna, Eter, Ashan,

⁴³Ifta, Ashena, Nesib,

⁴⁴Keila, Akzib na Maresha. Agbata ni kue ayeke gumbaya, ala na akete akodro so ayeke na tere ni.

⁴⁵Mbeni gbata ni ayeke Ekron, na akete kete kodro nga na akete kodro so ayeke na tere ni,

⁴⁶agbata na akete kodro so kue ayeke na tere ti Asdod, na popo ti Ekron na kota ngu-ingo ti Mediterane,

⁴⁷Asdod na Gaza, na akete kete kodro nga na akete kodro so ayeke na tere ni, ague ngbii asi na ngu ti Ezipte, akiri ague ngbii asi na yanga ti kota ngu-ingo ti Mediterane.

⁴⁸Agbata ti sese ti ahoto ayeke so: Shamir, Yatir, Soko,

⁴⁹Dana, Kiriat-Sana, so a iri ni nga Debir,

⁵⁰Anab, Eshtemoa, Anim,

⁵¹Goshen, Holon na Gilo. Agbata ni kue ayeke baleoko na oko, ala na akete kodro so ayeke na tere ni.

⁵²Ambeni gbata ni ayeke Arab, Ruma, Eshan,

⁵³Yanum, Bet-Tapua, Afeka,

⁵⁴Humeta, Kiriat-Arba, so a iri ni nga Hebron, na Sior. Agbata ni kue ayeke gumbaya, ala na akete kodro so ayeke na tere ni.

⁵⁵Ambeni gbata ni ayeke Maon, Karmel, Zif, Yuta,

⁵⁶Yizreel, Yokdeam, Zanoa,

⁵⁷Kain, Gibea na Timna. Agbata ni kue ayeke baleoko, ala na akete kodro so ayeke na tere ni.

⁵⁸Ambeni gbata ni ayeke Halul, Bet-Sur, Gedor,

⁵⁹Maarat, Bet-Anot na Eltekone. Agbata ni kue ayeke omene, ala na akete kodro so ayeke na tere ni.

⁶⁰Ambeni gbata ni ayeke Kiriat-Baal, so a iri ni nga Kiriat-Yearim, na Raba. Agbata ni kue ayeke use, ala na akete akodro so ayeke na tere ni.

⁶¹Agbata so ayeke na benyama ayeke so: Bet-Araba, Midin, Sekaka,

⁶²Nibeshan, Ir-Mela na En-Gedi. Agbata ni kue ayeke omene, ala na akete kodro so ayeke na tere ni.

⁶³Azo ti mara ti Juda awara lege pepe ti tumba azo ti mara ti Yebus so ayeke lango na Jérusalem. Azo ti mara ti Yebus na azo ti Juda angba ti lango na Jérusalem ngbii asi laso.