Read La Bible en Sango courant – Mbeti ti Nzapa Josué 16 Bible Online

Josué 16 - La Bible en Sango courant – Mbeti ti Nzapa bible

Josué 16

¹A bi mbeni ye si afa sese so a mu na amolenge ti Joseph. Katikati ti sese ni na mbage ti Mbongo alondo na ngu ti Jourdain, nduru na Jéricho, na To ti ngu so ayeke hon na ya ti gbata ni. Katikati ti sese ni akiri alondo na Jéricho, ahon na ya ti benyama si ague na mbage ti nduzu, na sese ti ahoto ti Betel.

²Katikati ti sese ni alondo na Betel, afâ ya ti Atarot, gbata so azo ti mara ti Arki ayeke lango daa si ague na mbage ti Luz.

³Na pekoni, katikati ni azu ti gue na Do, na sese ti azo ti mara ti Yafleti. Afâ ya ti Bet-Horon-ti-gbeni nga na Gezer si asi na kota ngu-ingo ti Mediterane.

⁴Sese so a mu na amara ti Manase na ti Efraim laa; ala yeke *ahale ti Joseph.

⁵Katikati ti sese ti mara ti Efraim alingbi na akete mara ti ala ayeke so: na mbage ti To, katikati ni alondo na Atrot-Adar, ague ngbii asi na Bet-Horon-ti-nduzu;

⁶alondo na ndo so ague ngbii asi na kota ngu-ingo ti Mediterane. Na mbage ti Banga, katikati ni ahon nduru na Mikmetat. Alondo na To ti Mikmetat ague na mbage ti Taanat-Silo; afâ ya ti Taanat-Silo si ague na Yanoa.

⁷Alondo na ndo so, azu ague na Atarot nga na Naara, akiri na Jéricho si asi na Jourdain.

⁸Na Do ti Mikmetat, katikati ti sese ni alondo na Tapua, ague ngbii asi na ngu ti Kana; na pekoni asi na kota ngu-ingo ti Mediterane. So ayeke sese so aga ye ti azo ti mara ti Efraim alingbi na akete mara ti ala laa.

⁹A mu nga na ala ambeni gbata na akete kodro so ayeke na tere ni na sese ti azo ti mara ti Manase.

¹⁰Azo ti mara ti Efraim atumba azo ti Kanaan so ayeke lango na Gezer so pepe. Ala ngba ti lango na popo ti azo ti mara ti Efraim ngbii asi laso. Me azo ti mara ti Efraim amu na ala akua ti ngbaa titene ala sara ni.