Read La Bible en Sango courant – Mbeti ti Nzapa Josué 17 Bible Online

Josué 17 - La Bible en Sango courant – Mbeti ti Nzapa bible

Josué 17

¹A mu nga sese na azo ti mara ti Manase, kozo molenge ti Joseph. *Ahale ti Makir, ngangu zo ti bira, kozo molenge ti Manase, ala wara ti ala sese ti Galaad na ti Bashan.

²A mu nga sese na tanga ti mara ti Manase alingbi na akete mara ti ala; akete mara ni ayeke so: kete mara ti Abiezer, ti Helek, ti Asriel, ti Shekem, ti Hefer na ti Shemida; ala kue ayeke ahale ti Manase, molenge ti Joseph.

³Selofad ayeke molenge ti Hefer; Hefer ayeke molenge ti Galaad; Galaad ayeke molenge ti Makir; Makir ayeke molenge ti Manase. Selofad adu amolenge-koli pepe, me lo du gi amolenge-wali; iri ti ala ayeke: Mala, Noa, Hogla, Milka na Tirsa.

⁴Amolenge-wali ni ague, abaa wayango-sandaga Elazar na Josué, molenge ti Nune nga na akota zo ti kodro si ala tene na ala: “*KOTA GBIA amu yanga na Moïse ti mu sese na e tongana ti so lo mu na a-ita ti e ti koli.” Tongaso a mu na ala sese tongana ti so a mu na a-ita ti babâ ti ala, alingbi na yanga so KOTA GBIA amu.

⁵A mu na mara ti Manase mbage ti sese baleoko; a diko sese ti Galaad na ti Bashan so ayeke na mbage ti ngu ti Jourdain so daa pepe.

⁶Biani, a mu sese gi na akoli ti mara ti Manase pepe, a mu nga na awali ti oko mara ni. Me sese ti Galaad ayeke ti ambeni hale ti Manase.

⁷Katikati ti sese ti Manase alondo na Aser ague ngbii asi na Mikmetat, na To ti Sishem. Na Mikmetat, katikati ni azu ti gue na mbage ti Mbongo, ngbii asi na ndo ti azo ti En-Tapua.

⁸Sese ti Tapua ayeke ti mara ti Manase. Me a mu gbata ni na azo ti Efraim; Tapua ayeke na katikati ti sese ti Manase.

⁹Na pekoni, katikati ni azu ague na Mbongo ti ngu ti Kana. A mu agbata so ayeke na Mbongo ti ngu ni na azo ti Efraim, ataa so agbata ni ayeke na sese ti Manase. Katikati ni akiri ahon na ndo so na mbage ti Banga si asi na kota ngu-ingo ti Mediterane.

¹⁰Tongaso, sese ti azo ti mara ti Efraim amu mbage ti Mbongo kue si ti azo ti mara ti Manase amu mbage ti Banga. Kota ngu-ingo ti Mediterane laa akangbi popo ti ala, na mbage ti Do. Azo ti mara ti Aser ayeke na mbage ti Banga-Do ti sese ti Manase si azo ti mara ti Isakar ayeke ti ala na mbage ti Banga-To.

¹¹Na sese ti Isakar na ti Aser, a mu na azo ti mara ti Manase Bet-Shean na Ibleam nga na akete kete kodro so ayeke na tere ni. A mu nga na ala Dor, En-Dor, Taanak, Megido na azo ti agbata ni nga na akete kete kodro so ayeke na tere ni, so ti tene lando ti Dor.

¹²Me azo ti Manase awara lege ti tumba azo ti agbata ni pepe; azo ti Kanaan angba ti duti na sese ni.

¹³Ataa so azo ti Israel awara ngangu ahon ndoni, ala wara lege ti tumba azo ti Kanaan pepe; me ala mu na azo ti Kanaan ni ambeni ngangu kua titene ala sara.

¹⁴*Ahale ti Joseph atene na Josué: “Ngbanga ti nyen si mo mu na e gi mbage ti sese oko, e so KOTA GBIA asara tufa na ndö ti e si e wu mingi so?”

¹⁵Josué atene na ala: “Tongana ala wu mingi si sese ti Efraim, ndo so ahoto ayeke daa alingbi na ala pepe, ayeke nzoni ala gue na ya ti gbako ti azo ti mara ti Perizi na ti Refa, ala fâ ndo ni, ala leke ni si ala duti daa.”

¹⁶Ahale ti Joseph atene na lo: “Biani, sese ti ahoto ni alingbi na e pepe. Me azo ti Kanaan so kue ayeke duti na sese ti alando ayeke na apusu ti bira so a sara na wen; azo so ayeke na Bet-Shean na akete kete kodro so ayeke na tere ni nga na ala so ayeke na popo-hoto ti Yizreel, ala nga ayeke na apusu ti mbarata ti wen.”

¹⁷Tongaso Josué atene na ahale ti Joseph, so ti tene azo ti mara ti Efraim na ti Manase, atene: “Biani, ala wu mingi si ala yeke ngangu mingi. Fade ala yeke wara gi mbage ti sese oko pepe;

¹⁸me fade ala yeke mu sese ti ahoto so gbako ayeke daa. Ala yeke de gbako ni si ala mu ni kue, ala duti daa. Fade ala yeke tumba azo ti Kanaan ti mu sese ti ala, ataa so azo ti Kanaan ni ayeke na apusu ti mbarata ti wen si ala yeke ngangu mingi.”