Read La Bible en Sango courant – Mbeti ti Nzapa Josué 19 Bible Online

Josué 19 - La Bible en Sango courant – Mbeti ti Nzapa bible

Josué 19

¹Ti use ni, a bi ye ni si afa sese so alingbi ti mu na azo ti mara ti Siméon alingbi na akete mara ti ala. Sese so a mu na ala titene aga ti ala, sese ti azo ti mara ti Juda angoro ni kue.

²Na sese ti ala ni, mo yeke wara agbata tongana: Bersheba, Sheba, Molada,

³Hasar-Shual, Baala, Esem,

⁴Eltolad, Betul, Horma,

⁵Siklag, Bet-Markabot, Hasar-Susa,

⁶Bet-Lebaot, Sharuen, so ti tene agbata baleoko na ota na akete kodro so ayeke na tere ni.

⁷Mo yeke wara nga agbata tongana: Ain, Rimon, Eter na Ashan, so ti tene agbata osio na akete kodro so ayeke na tere ni,

⁸nga na akete kodro so kue ayeke na tere ti agbata so, ague ngbii asi na Baalat-Ber nga na Ramat-Negev. So ayeke sese so aga ye ti azo ti mara ti Siméon alingbi na akete mara ti ala laa.

⁹Mbeni mbage ti sese ti azo ti mara ti Juda laa a mu na azo ti mara ti Siméon titene aga ti ala, ngbanga ti so sese ti azo ti mara ti Juda akono ahon ndö ti ala. Ndani laa sese ti azo ti mara ti Juda angoro sese ti azo ti mara ti Siméon kue.

¹⁰Ti ota ni, a bi ye ni si afa sese so alingbi ti mu na azo ti mara ti Zabulon alingbi na akete mara ti ala. Katikati ti sese ti ala ague ngbii asi na Sarid.

¹¹Katikati ni alondo na ndo so, ague na mbage ti nduzu na Do, ague ngbii asi na Marala nga na Dabeshet. Na pekoni, ague, asi na ngu so ayeke sua na To ti Yokneam.

¹²Katikati ni alondo na Sarid, angoro ti gue na mbage ti To, ahon na tere ti sese ti Kislot-Tabor, ahon na mbage ti Dabrat si ague ngbii asi na Yafia, na mbage ti nduzu.

¹³Na pekoni, katikati ni ague guengo na mbage ti To ngbii asi na Gat-Hefer nga na Et-Kasin, ague, awara tere na Rimon si angoro ti gue na mbage ti Nea.

¹⁴Na Banga, katikati ni ahon na tere ti Hanaton si asi na popo-hoto ti Ifta-El.

¹⁵Na sese ni, mo yeke wara agbata tongana Katat, Nahalal, Shimron, Idala na Betlehem, so ti tene agbata baleoko na use na akete kodro so ayeke na tere ni.

¹⁶So ayeke sese so aga ye ti azo ti mara ti Zabulon alingbi na akete mara ti ala laa; agbata ni na akete kodro so ayeke na tere ni.

¹⁷Ti osio ni, a bi ye ni si afa sese so alingbi ti mu na azo ti mara ti Isakar alingbi na akete mara ti ala.

¹⁸Na sese ti ala, mo yeke wara agbata tongana: Yizreel, Kesulot, Shunem,

¹⁹Hafaraim, Shion, Anaharat,

²⁰Rabit, Kishion, Ebes,

²¹Remet, En-Ganim, En-Hada na Bet-Pases.

²²Katikati ni ahon na tere ti Tabor, Shasaim, na Bet-Shemesh si asi na ngu ti Jourdain, so ti tene agbata baleoko na omene na akete kodro so ayeke na tere ni.

²³So ayeke sese so aga ye ti azo ti mara ti Isakar alingbi na akete mara ti ala laa; agbata ni na akete kodro so ayeke na tere ni.

²⁴Ti oku ni, a bi ye ni si afa sese so alingbi ti mu na azo ti mara ti Aser alingbi na akete mara ti ala.

²⁵Na sese ti ala, mo yeke wara agbata tongana: Helkat, Hali, Beten, Akeshaf,

²⁶Alamelek, Amad na Mishal. Na mbage ti Do, katikati ni ahon na tere ti hoto ti Karmel si amu tere ti ngu ti Shihor-Libnat ti gue na ni.

²⁷Na mbage ti To, katikati ni ahon na Bet-Dagon, na mbage ti nduzu si ahon na tere ti sese ti Zabulon nga na popo-hoto ti Ifta-El. Na pekoni, akiri ahon na mbage ti Banga ti si na Bet-Emek nga na Neiel. Katikati ni akiri ahon kâ ti gue na Kabul,

²⁸Abdon, Rehob, Hamon na Kana ngbii ti si na Sidon, kota gbata.

²⁹Katikati ni angoro ti gue na mbage ti Rama nga na mbage ti ngangu gbagba ti gbata ti Tir. Na pekoni, ague na mbage ti Hosa. Ahon na ya ti agbata ti Mahaleb na Akzib ti si na kota ngu-ingo ti Mediterane.

³⁰Ahon nga na ya ti agbata ti Um, Afek na Rehob. Na sese ni, agbata ni kue ayeke baleuse na use na akete kodro so ayeke na tere ni.

³¹So ayeke sese so aga ye ti azo ti mara ti Aser alingbi na akete mara ti ala laa; agbata ni na akete kodro so ayeke na tere ni.

³²Ti omene ni, a bi ye ni si afa sese so alingbi ti mu na azo ti mara ti Neftali alingbi na akete mara ti ala.

³³Katikati ti sese ni na mbage ti Mbongo alondo na Helef nga na tere ti keke ti shene ti Saananim, ahon na Adami-Nekeb nga na Yabneel, ngbii asi na Lakum si asi na ngu ti Jourdain.

³⁴Na mbage ti Do, katikati ni angoro ti gue na mbage ti Aznot-Tabor nga na Hukok. Na pekoni, ahon na tere ti sese ti Zabulon, na mbage ti Mbongo nga na tere ti sese ti Aser, na mbage ti Do. Na mbage ti To, ngu ti Jourdain laa ayeke katikati ni.

³⁵Agbata so ngangu gbagba ayeke na tere ni ayeke so: Sidim, Ser, Hamat, Rakat, Kineret,

³⁶Adama, Rama, Hasor,

³⁷Kedesh, Edrei, En-Hasor,

³⁸Iron, Migdal-El, Horem, Bet-Anat na Bet-Shemesh; so ti tene agbata baleoko na gumbaya na akete kodro so ayeke na tere ni.

³⁹So ayeke sese so aga ti ye ti azo ti mara ti Neftali alingbi na akete mara ti ala laa; agbata ni na akete kodro so ayeke na tere ni.

⁴⁰Ti mbarambara ni, a bi ye ni si afa sese so alingbi ti mu na azo ti mara ti Dan alingbi na akete mara ti ala.

⁴¹Na sese ti ala, mo yeke wara agbata tongana: Sora, Eshetaol, Ir-Shemesh,

⁴²Shaalabin, Ayalon, Itla,

⁴³Elon, Timna, Ekron,

⁴⁴Elteke, Gibeton, Baalat,

⁴⁵Yehud, Bene-Berak, Gat-Rimon,

⁴⁶ngu ti Yarkon, Rakon na sese so ayeke na tere ti Zafa.

⁴⁷Me ambeni zo aga amu sese ti azo ti mara ti Dan na maboko ti ala. Tongaso azo ti mara ti Dan ague si ala tiri bira na azo ti gbata ti Leshem. Ala mu gbata ni si ala fâ azo ni kue; ala mu ndo na ya ti gbata ni kue si ala sara kodro kâ. Tongaso ala mu iri ti kotara ti ala Dan, ala zia na ndö ti gbata ni.

⁴⁸So ayeke sese so aga ye ti azo ti mara ti Dan alingbi na akete mara ti ala laa; agbata ni na akete kodro so ayeke na tere ni.

⁴⁹So azo ti Israel ahunzi kangbingo sese ni na popo ti ala awe, ala mu mbeni mbage ti sese ti ala na Josué, molenge ti Nune titene aga ti lo.

⁵⁰Ala mu na lo gbata ti Timnat-Sera so lo wani, lo hunda alingbi na yanga so *KOTA GBIA amu na ala. Timnat-Sera ayeke na sese ti Efraim, ndo so ahoto ayeke daa. Lo kiri lo leke gbata ni si lo duti daa.

⁵¹Wayango-sandaga Elazar, na Josué, molenge ti Nune, na amakonzi ti asewa ti azo ti mara ti Israel akangbi asese nde nde so na amara ni na lege ti mbeni ye so ala bi. Ala sara ye ni so na Silo, na dawa ti KOTA GBIA, na yanga ti da ti bongo so Nzapa na azo ti lo ayeke wara tere daa. Lege so ala hunzi kangbingo asese ni laa.