Read La Bible en Sango courant – Mbeti ti Nzapa Josué 2 Bible Online

Josué 2 - La Bible en Sango courant – Mbeti ti Nzapa bible

Josué 2

¹So ala yeke na Shitim, Josué, molenge ti Nune, atokua azo use na hondengo ni; lo tene na ala, lo tene: “Ala gue, *abembe ndo na sese ni nga na gbata ti Jéricho.” Azo ni ague, ali na ya ti da ti mbeni wali-ndumba so iri ti lo Rahab si ala lango kâ.

²Mbeni zo atene na gbia ti Jéricho, atene: “Baa, ambeni zo ti Israel ali na ya ti gbata ge na bi so; ala ga ti bembe ndo na ya ti kodro ni.”

³Tongaso gbia ti Jéricho atokua ndo na Rahab, atene: “Azo so aga na ndo ti mo so, ala so ali na da ti mo so, sigigi na ala, ngbanga ti so ala ga ti bembe ndo na ya ti kodro ni kue.”

⁴Me wali ni amu azo use so, lo gue, lo honde ala. Na pekoni, lo tene: “Biani, azo so aga na ndo ti mbi; me mbi hinga ndo so ala londo daa si ala ga so pepe.

⁵So ndo ayeke vuko si azo aga nduru ti kanga yanga ti gbagba ti gbata ni, ala sigigi ague awe. Mbi hinga ndo so ala gue daa pepe. Ala tumba peko ti ala hio; fade ala yeke wara ala na lege.”

⁶Andaa lo mu fade azo ni, lo gue na ala na li ti da ti lo, na ndo so a leke si azo ayeke duti daa so; lo honde ala na popo ti akeke ti *len so lo leke ni kâ.

⁷Azo so gbia atokua ala atumba peko ti azo ti bembengo ndo ni. So ala hon gi tongaso, azo akanga yanga ti gbagba ti gbata ni. Awatokua ni amu lege so ague na ndo so azo ayeke fâ ngu ti Jourdain daa na gere so ti gi ala.

⁸Ti Rahab, lo gue na li ti da na tere ti azo use so, andaa ala de ti lango pepe.

⁹Lo tene na ala: “Mbi hinga, mbi tene, KOTA GBIA amu kodro ni na ala awe. Mbeto ti ala agbu e mingi si tere ti azo ti kodro ni kue ado na mbeto ndali ti gango ti ala.

¹⁰Biani, e ma a tene, *KOTA GBIA asara si kota ngu-ingo ti Asosongo ahole na dawa ti ala na ndembe so ala londo na Ezipte ti sigigi. E ma nga tënë ti agbia use ti mara ti Amori, Sihon na Og, so ala fâ ala na mbage ti ngu ti Jourdain. Ala azo ti Israel, ala fâ azo ni si ala buba aye ti azo ni so kue.

¹¹So e ma tënë ti aye so, be ti e afun kue; mbeni zo oko ayeke na ngangu ti gbu le ni na ala pepe, ngbanga ti so KOTA GBIA, Nzapa ti ala ayeke Nzapa na yayu kâ si lo yeke Nzapa ge na ndö ti sese.

¹²Fadeso, ala deba yanga ti ala na mbi na iri ti KOTA GBIA ti sara nzoni na mbi na asewa ti mbi, tongana ti so mbi sara nzoni na ala so. Ala sara mbeni ye ti fa na mbi biani

¹³so fade ala yeke zia babâ ti mbi, mama ti mbi, a-ita ti mbi ti koli na ti wali nga na aye ti ala kue ti ngba na fini. Ala fa na e so fade ala yeke zi e na ya ti kuâ.”

¹⁴Azo ti bembengo ndo ni akiri tënë na lo: “E deba tere ti e na mo na le ti Nzapa: tongana mo sigigi na nda ti gango ti e na mbeni zo pepe, fade e yeke sara nzoni be na mo si e yeke sara ye na mo na legeni na ndembe so KOTA GBIA ayeke mu kodro ni na e.”

¹⁵Rahab asara da ti lo ali ya ti ngangu gbagba ti gbata ni. Tongaso lo mu kamba, lo zu ala na ni na gbeni na le ti fenetere ti da ni na peko ti gbagba ni.

¹⁶Lo tene na ala: “Ala gue, ahonde tere ti ala na ndö ti ahoto titene azo so ayeke tumba peko ti ala so awara ala pepe. Ala ngba kâ na ya ti lango ota, ngbii azo ni akiri si. Na pekoni, fade ala mu lege ahon.”

¹⁷Azo ti bembengo ndo ni atene na lo: “Mo hunda fade na e titene e deba yanga ti e; fade e yeke sara ye alingbi na ni.

¹⁸Baa ye so mo lingbi ti sara ayeke so: tongana e li ande na ya ti kodro ni, fade mo kanga bengba kamba so na fenetere so mo yoro e daa si mo zu e na gbeni so. Na pekoni, mo bongbi na ya ti da ti mo, babâ ti mo, mama ti mo, a-ita ti mo, na asewa ti mo kue.

¹⁹Tongana mbeni zo alondo na ya ti da ti mo asigigi, fade tënë ti kuâ ti lo ayeke na li ti lo wani; tënë ni ayeke na li ti e pepe. Me tongana maboko ti mbeni zo ti e andu mbeni zo so mo na lo ayeke na ya ti da ti mo, tënë ti kuâ ti zo ni so ayeke na li ti e.

²⁰Me tongana mo sigigi na nda ti gango ti e ni na mbeni zo, andaa tënë ti dengo ba so mo hunda e si e de so, ayeke na li ti e mbeni pepe.”

²¹Rahab akiri tënë: “Nzoni!” Na pekoni, lo zia lege na ala si ala gue. So ala gue awe, lo kanga bengba kamba ni na fenetere ti da ti lo.

²²Azo ti bembengo ndo ni amu lege si ala gue na ndö ti ahoto. Ala ngba kâ lango ota ti ku titene azo ti tumbango peko ti ala akiri si. Andaa azo ti tumbango peko ti ala ni agi ala na tere ti lege kue gbaa, ala wara ala pepe.

²³Tongaso azo use so alondo na ndö ti ahoto ni si ala zu. Ala fâ ngu ti Jourdain si ala ga na tere ti Josué, molenge ti Nune, ala fa na lo peko ti aye so kue asi na ala.

²⁴Ala tene na lo: “Taa-tënë, KOTA GBIA azia kodro ni kue na maboko ti e awe. Ataa azo ti kodro ni kue, ngangu ti ala ahunzi na dawa ti e.”