Read La Bible en Sango courant – Mbeti ti Nzapa Josué 22 Bible Online

Josué 22 - La Bible en Sango courant – Mbeti ti Nzapa bible

Josué 22

¹Tongaso Josué airi azo ti mara ti Ruben, azo ti mara ti Gad na ndambo ti mara ti Manase.

²Lo tene na ala: “Ala sara ye alingbi na yanga so Moïse, zo ti kua ti *KOTA GBIA, amu ando na ala; ala ma nga yanga ti mbi na ya ti aye so kue mbi mu lani yanga na ala ti sarango ni.

³Na lango mingi ngbii asi laso, ala do a-ita ti ala, azo ti Israel azia pepe; ala sara ye alingbi na yanga so KOTA GBIA, Nzapa ti ala, amu.

⁴Fadeso, KOTA GBIA, Nzapa ti ala, amu lege na a-ita ti ala ni ti wu tere tongana ti so lo mu lani zendo ni na ala. Ala lingbi ti kiri na ndo ti ala, na sese so Moïse, zo ti kua ti KOTA GBIA, amu na ala titene aga ti ala na To ti ngu ti Jourdain.

⁵Me gi ye oko, ala gi lege ti sara ye alingbi na *Ndia nga na yanga so Moïse, zo ti kua ti KOTA GBIA, amu lani na ala: ala ye KOTA GBIA, Nzapa ti ala, ala sara aye so kue lo hunda na ala, ala sara ye alingbi na atënë ti yanga ti lo, ala ngba na tere ti lo, ala sara kua na lo na be ti ala kue, na ngangu ti ala kue.”

⁶Na pekoni, Josué asara tufa na ndö ti ala si lo zia ala titene ala kiri na ndo ti ala.

⁷Moïse amu lani na ndambo ti mara ti Manase mbeni sese na Bashan, na To ti ngu ti Jourdain. Josué amu na mbeni ndambo ti Mara ni, sese na mbage ti Do ti ngu ti Jourdain; lo mu ni na ala legeoko na tanga ti amara ti Israel. Na ndembe so Josué azia ala titene ala kiri na ndo ti ala, lo sara tufa na ndö ti ala.

⁸Lo tene na ala: “Ala mu gba ti mosoro, gba ti nyama, wen ti nginza, lôro, bengba wen, wen na gba ti abongo, ala kiri na ni na ndo ti ala. Ala kangbi aye so ala gbu na peko ti bira na maboko ti awato ti ala so na a-ita ti ala, azo ti Israel.”

⁹Tongaso, azo ti mara ti Ruben, ti Gad na ndambo ti mara ti Manase akiri na ndo ti ala. Ala zia azo ti Israel na Silo so ayeke na sese ti Kanaan si ala gue na sese ti Galaad, sese so a mu na ala alingbi na yanga so *KOTA GBIA amu na lege ti Moïse.

¹⁰So ala si na tere ti ngu ti Jourdain, na mbage ti sese ti Kanaan, ala sara mbeni gbalaka so ayeke kota mingi na tere ti ngu ni.

¹¹Ambeni zo ague, atene tënë ni na tanga ti azo ti Israel, atene: “Ala baa, azo ti mara ti Ruben, ala ti Gad na ndambo ti mara ti Manase, asara mbeni gbalaka na tere ti ngu ti Jourdain, na mbage ti e ge, na sese ti Kanaan.”

¹²Gi so azo ti Israel ama tënë so, ala bongbi tere ti ala kue na Silo ti gue ti tiri bira na amara so ayeke na To ti ngu ti Jourdain.

¹³Azo ti Israel atokua Pinas, molenge ti wayango-sandaga Elazar ti gue na sese ti Galaad titene lo tene tënë na azo ti mara ti Ruben, ala ti mara ti Gad na ala ti ndambo ti mara ti Manase.

¹⁴Lo na azo ti li ni baleoko si ague; a mu zo ti li ni oko na ya ti mara oko. Ala kue ayeke amakonzi ti asewa na ya ti akete mara ti Israel.

¹⁵Ala gue na sese ti Galaad, na mbage ti azo ti mara ti Ruben, ti Gad na ti ndambo ti mara ti Manase si ala tene na ala, atene:

¹⁶“Tënë so bongbi ti azo ti KOTA GBIA kue atene ayeke so: ‘Ngbanga ti nyen si ala sara ye so ayeke sioni mingi ti ke Nzapa ti Israel so? Ngbanga ti nyen si ala zia lege ti KOTA GBIA si ala sara mbeni gbalaka nde ndali ti ala wani so? Ngbanga ti nyen si ala sara ngangu li laso na KOTA GBIA so?

¹⁷Na Peor, e sara sioni ye si e ngba ti baa pasi na peko ni. Ataa so mbeni kpale aga na ndö ti bongbi ti azo ti KOTA GBIA kue, so a de ti lingbi na e pepe?

¹⁸Me ti ala, ala zia lege ti KOTA GBIA laso! Ala sara ngangu li na lo laso, kekereke lo yeke sara ngonzo na tere ti bongbi ti azo ti Israel kue!

¹⁹Tongana ala baa atene sese ti ala ayeke *sioni, ayeke nzoni ala kiri aga na sese ti KOTA GBIA, so ndo ti dutingo ti lo ayeke daa so. Tongaso ala lingbi ti mu asese na popo ti asese ti e titene aga ti ala. Me ye oko, ala sara ngangu li na KOTA GBIA pepe, ala sara nga ngangu li na e pepe, na sarango mbeni gbalaka nde na ti KOTA GBIA, Nzapa ti e.

²⁰Akan, mbeni *hale ti Zera asara ye so ayeke sioni mingi: lo mu ye so Nzapa ake na azo ti mu ni. Ndali ni, Nzapa asara ngonzo na tere ti bongbi ti azo ti Israel kue; ala hinga ni kue. Gi lo oko laa lo kui ndali ti sioni ti lo ni pepe.’ ”

²¹Azo ti mara ti Ruben, ala ti mara ti Gad, na ndambo ti mara ti Manase akiri tënë na amakonzi ti tanga ti akete mara ti Israel, atene:

²²“Nzapa, Nzapa, KOTA GBIA! Nzapa, Nzapa, KOTA GBIA! Lo yeke Nzapa so ayeke na ndö ti anzapa kue. Lo hinga nda ti ye so e sara. Fade azo ti Israel kue ayeke hinga nda ti ye ni. Tongana e sara ngangu li wala e sara mbeni ye so ayeke sioni mingi ti ke KOTA GBIA, ayeke nzoni lo soo e na lango ni so pepe!

²³Tongana e sara gbalaka ti e titene e ya *sandaga ti anyama so a yeke gbi ni kue na wâ na ndö ni, wala asandaga ti ale ti kobe wala asandaga ti beoko; tongana e sara tongaso ti zia lege ti KOTA GBIA, ayeke nzoni KOTA GBIA wani afâ ngbanga na li ti e!

²⁴Me nda ti ye so e sara so laa pepe. E sara tongaso, ngbanga ti so mbeto asara e titene gbanda amolenge ti ala atene na amolenge ti e, atene: ‘Nyen laa abongbi ala na KOTA GBIA, Nzapa ti Israel nyen?

²⁵KOTA GBIA azia ngu ti Jourdain tongana katikati na popo ti e na ala, azo ti Ruben na ala ti Gad. Mbeni ye ti ala oko ayeke na maboko ti KOTA GBIA pepe!’ Tongaso, fade ahale ti ala ayeke sara titene ahale ti e azia lege ti vorongo KOTA GBIA.

²⁶Ndani laa e tene na be ti e, e tene: alingbi e sara gbalaka so, me e sara ni ndali ti sandaga ti anyama so a yeke gbi ni kue na wâ pepe wala ndali ti ambeni sandaga nde pepe.

²⁷E ye ti sara gbalaka ni titene aduti mbeni ye na popo ti e na ala nga na popo ti amolenge so a yeke du ala na peko. Fade gbalaka ni ayeke fa atene, e nga, e lingbi ti voro KOTA GBIA na lege ti sandaga ti anyama so ayeke gbi ni kue na wâ, asandaga ti beoko na ambeni sandaga nde. Tongaso si gbanda ahale ti ala awara lege pepe ti tene na ahale ti e, atene: ‘Mbeni ye ti ala oko ayeke na maboko ti KOTA GBIA pepe.’

²⁸E tene na be ti e, e tene: gbanda, tongana azo atene tënë so na e nga na ahale ti e, fade e yeke tene na ala: ‘Ala baa, akotara ti e asara gbalaka so gi na oko kode ti gbalaka ti KOTA GBIA. Ala sara ni ndali ti sandaga ti anyama so a yeke gbi ni kue na wâ pepe, wala ndali ti ambeni sandaga nde pepe; me ala sara ni titene aduti mbeni ye na popo ti e na ala.’

²⁹E lingbi ti ke KOTA GBIA wala ti zia lege ti lo oko pepe. E sara gbalaka ti ya na ndö ni sandaga ti anyama so a yeke gbi ni kue na wâ pepe wala asandaga ti ale ti kobe, wala ambeni sandaga nde pepe. E ye ti ya asandaga ni na mbeni ndo nde pepe, me gi na ndö ti gbalaka ti KOTA GBIA Nzapa ti e, gbalaka so ayeke na dawa ti da ti lo.”

³⁰So wayango-sandaga Pinas, na akota zo ti bongbi ti azo ni nga na amakonzi ti akete mara ti Israel ama tënë so azo ti mara ti Ruben, ti Gad, na ti Manase atene so, tënë ni anzere na be ti ala.

³¹Pinas, molenge ti wayango-sandaga Elazar atene na azo ti mara ti Ruben, ti Gad na ti Manase, atene: “Laso, e hinga, e tene, KOTA GBIA ayeke na popo ti e, ngbanga ti so ala sara ye so ayeke sioni mingi ti kengo lo pepe. Ye so ala sara so, ala zi azo ti Israel na gbe ti ngbanga ti KOTA GBIA awe.”

³²Na pekoni Pinas, molenge ti wayango-sandaga Elazar, na akota zo ti azo ni azia azo ti mara ti Ruben, na ti Gad. Ala londo na Galaad, ala kiri na sese ti Kanaan si ala fa peko ti tënë ni na azo ti Israel.

³³Tënë ni anzere na be ti azo ti Israel si ala mu singila na Nzapa. Ala zia lege ti gue ti sarango bira na azo ti mara ti Ruben na ti Gad, ti buba kodro ti ala.

³⁴Azo ti mara ti Ruben na ti Gad adi iri ti gbalaka ni: “Gbalaka so ayeke duti mbeni ye na popo ti e” ti fa atene, KOTA GBIA ayeke Nzapa.