Read La Bible en Sango courant – Mbeti ti Nzapa Josué 24 Bible Online

Josué 24 - La Bible en Sango courant – Mbeti ti Nzapa bible

Josué 24

¹Josué abongbi amara ti Israel kue na Sishem. Lo iri *akangba ti ala, amakonzi ti ala, awafango-ngbanga ti ala nga na awafango-ndia ti ala. Ala ga aluti na dawa ti Nzapa.

²Tongaso Josué atene na azo ni kue, atene: “Tënë so *KOTA GBIA, Nzapa ti Israel atene ayeke so: ‘Akotara ti ala so ayeke azo ti sewa ti Tera, babâ ti Abraham na babâ ti Nahor ayeke ando na mbage ti ngu ti Efrate. Akotara ti ala ni ayeke voro ando ambeni nzapa nde.

³Mbi zi Abraham, kotara ti ala na kodro so ayeke na mbage ti ngu ti Efrate, mbi sara si lo tambula na sese ti Kanaan kue. Mbi sara si asewa ti lo awu mingi. Mbi mu na lo Isaac.

⁴Mbi mu na Isaac, Jacob na Ezau. Mbi mu sese ti ndö ti hoto ti Seir na Ezau titene aga ti lo. Me Jacob na amolenge ti lo ague ti ala na Ezipte.

⁵Aninga na pekoni, mbi tokua Moïse na Aaron si mbi sara si akpale nde nde ati na ndö ti azo ti Ezipte. Na pekoni, mbi sara si ala azo ti Israel, ala londo na Ezipte, ala sigigi.

⁶Mbi sara si akotara ti ala alondo na Ezipte asigigi si ala si na kota ngu-ingo ti Asosongo. Azo ti Ezipte amu apusu ti mbarata na azo ti kpengo na ambarata si ala tumba peko ti akotara ti ala ni ngbii asi na kota ngu-ingo ti Asosongo ni.

⁷Tongaso akotara ti ala adekongo na mbi KOTA GBIA si mbi zia mbeni ngbongboro mbinda na popo ti ala na azo ti Ezipte. Na pekoni, mbi sara si ngu ti kota ngu-ingo ni akiri na ndö ti azo ti Ezipte si amene ala. Ala azo ti Israel, ala baa na le ti ala ye so mbi sara na azo ti Ezipte so! Ala azo ti Israel, ala ninga mingi na benyama.

⁸Na pekoni mbi gue na ala, azo ti Israel na sese ti azo ti mara ti Amori so ayeke na To ti ngu ti Jourdain. Azo ti Amori ni atiri bira na ala si mbi zia azo ti Amori ni na maboko ti ala. Ala azo ti Israel, ala mu sese ti azo ni aga ti ala, ngbanga ti so mbi fâ azo ni, mbi hunzi ala kue na dawa ti ala.

⁹Balak, molenge ti Sipor, gbia ti Moab, alondo ti tiri na ala, azo ti Israel. Lo iri Balaam, molenge ti Beor titene lo ga lo deba ala.

¹⁰Me mbi ke ti ma Balaam. Balaam asara gi tufa na ndö ti ala; tongaso mbi zi ala na maboko ti Balak.

¹¹Ala fâ ngu ti Jourdain si ala si na Jéricho. Azo ti Jéricho ni atiri bira na ala. Azo ti mara ti Amori, ala ti Perizi, ala ti Kanaan, ala ti Het, ala ti Girgashi, ala ti Hivi na ala ti Yebus nga atiri bira na ala. Me mbi zia azo ni kue na maboko ti ala, azo ti Israel.

¹²Mbi tokua adidiri kozo ti ala si adidiri ni atumba agbia use ti Amori yongoro na tere ti ala, azo ti Israel. Ayongoro zeme ti ala wala akokora ti ala laa atumba agbia ni pepe.

¹³Mbi mu na ala azo ti Israel, mbeni sese so ala baa pasi si awara ni pepe. Mbi mu na ala agbata so ala laa aleke ni pepe, me ala yeke lango daa. Mbi mu na ala ayaka ti vinye na akeke ti olive so ala laa alu ni pepe, me ala yeke te ale ni.’ ”

¹⁴Josué akiri atene: “Fadeso, ala kpe mbeto ti KOTA GBIA, ala sara kua na lo na legeni nga na be ti ala kue! Anzapa so akotara ti ala asara ando kua na ala na mbage ti ngu ti Efrate nga na ti Ezipte so, ala zi anzapa ni yamba si ala sara kua gi na KOTA GBIA.

¹⁵Tongana sarango kua ti KOTA GBIA anzere na ala pepe, ala soro laso anzapa so ala ye ti sara kua na ala: wala ala ye ti voro anzapa so akotara ti ala avoro ala ando na mbage ti ngu ti Efrate, wala ala ye ti voro anzapa ti mara ti Amori so ala ayeke na popo ti ala. Me ti mbi na azo ti da ti mbi, fade e yeke sara kua na KOTA GBIA.”

¹⁶Azo ni akiri tënë: “E lingbi ti zia KOTA GBIA oko pepe ti sara kua na ambeni nzapa nde!

¹⁷Biani, KOTA GBIA Nzapa ti e laa asara si e sigigi, e na akotara ti e na Ezipte, ndo so lani e yeke angbaa daa. Lo sara akota ye ti kpene so le ti e kue abaa ni; lo bata e na ndembe so kue e yeke tambula na lege na gango ni, na popo ti amara so kue e hon na ya ti akodro ti ala.

¹⁸KOTA GBIA atumba amara kue na dawa ti e, mbirimbiri azo ti mara ti Amori so ayeke lango ando na sese ni so. Tongaso, e nga, fade e yeke sara kua na KOTA GBIA, ngbanga ti so lo yeke Nzapa ti e.”

¹⁹Josué atene na azo ni, atene: “Ala lingbi ti sara kua na KOTA GBIA pepe, ngbanga ti so lo yeke Nzapa so lo yeke nde si lo yeke nzoni kue; lo yeke Nzapa so ayeke sara mbanda ti azo ti lo. Ndali ngangu li ti ala na siokpari ti ala, fade lo yeke zi tënë na li ti ala pepe.

²⁰Tongana ala zia KOTA GBIA ti sara kua na ambeni nzapa nde, fade lo yeke kiri na ndö ti ala ti sara sioni na ala, lo yeke fâ ala ti hunzi ala na peko ti nzoni so lo sara na ala.”

²¹Azo ni akiri tënë na Josué, atene: “Ên-en! E yeke sara kua gi na KOTA GBIA.”

²²Josué atene na azo ni, atene: “Ala wani laa asoro ti sara kua na KOTA GBIA: tënë ti ala laa ayeke fâ ngbanga na li ti ala.” Azo ni akiri tënë: “E yeda!”

²³Tongaso Josué atene: “Fadeso, ala zi anzapa nde so ayeke na popo ti ala! Ala mu be ti ala kue na KOTA GBIA, Nzapa ti Israel!”

²⁴Azo ni akiri tënë na Josué, atene: “Biani, e yeke sara kua na KOTA GBIA, Nzapa ti e; e yeke ma yanga ti lo!”

²⁵Na lango ni so, Josué na azo ni aga ambuki. Lo leke andia na aye so Nzapa afa ndali ti azo na gbata ti Sishem.

²⁶Josué asu atënë so na ya ti mbeti ti *Ndia ti Nzapa. Na pekoni, lo mu mbeni kota têne, lo leke ni aluti na nduzu na gbe ti keke ti shene, na ndo so a zia nde ndali ti KOTA GBIA.

²⁷Josué atene na azo ni kue, atene: “Ala baa têne so mbirimbiri: ni laa ayeke fâ ngbanga na li ti e ndali ti tënë so asigigi na yanga ti e, ngbanga ti so têne ni ama atënë so kue KOTA GBIA atene na e. Biani, fade têne ni ayeke fâ ngbanga na li ti ala ti kanga lege na ala ti bere tënë ti Nzapa ti ala.”

²⁸Na pekoni, Josué atene na azo ni titene zo oko oko akiri na sese so a mu na lo ti ga ti lo.

²⁹Na peko ti aye so, Josué, molenge ti Nune, zo ti kua ti *KOTA GBIA, akui na ngu ngbangbo oko na baleoko.

³⁰A lu lo na sese so a mu na lo titene aga ti lo na gbata ti Timnat-Sera, na sese ti Efraim, ndo so ahoto ayeke daa na Banga ti hoto ti Gaash.

³¹Azo ti Israel asara kua na KOTA GBIA na ngoi so kue Josué angba na fini, nga na ngoi so kue *akangba so asara kua na Josué angba na fini, akangba so ahinga aye so kue KOTA GBIA asara na azo ti Israel.

³²Ti abio ti Joseph so azo ti Israel amu na Ezipte si akiri na ni, ala lu ni na Sishem, na sese so Jacob avo na maboko ti amolenge ti Hamor, babâ ti Sishem. Lo vo ni na ale ti nginza ngbangbo oko. Sese ni aga fadeso ti amolenge ti Joseph.

³³Elazar, molenge ti Aaron, akui nga. A lu lo na ndö ti kete hoto so a mu na molenge ti lo Pinas, na sese ti Efraim, ndo so ahoto ayeke daa.