Read La Bible en Sango courant – Mbeti ti Nzapa Josué 3 Bible Online

Josué 3 - La Bible en Sango courant – Mbeti ti Nzapa bible

Josué 3

¹Na ndaperere so ndo angba kâ, Josué na azo ti Israel kue alondo na Shitim, ala gue na yanga ti ngu ti Jourdain. Ala lango na ndo so kozoni si ala fâ ngu ni.

²Na ya ti lango ota, akapita so ayeke na ndö ti azo ni atambula na ya ti bâbâ ni kue

³si ala mu yanga na azo ni, atene: “Tongana ala baa awayango-sandaga so ayeke azo ti mara ti Lévi na yongo sanduku ti *mbuki ti *KOTA GBIA, Nzapa ti ala, ayeke nzoni ala londo na ndo so ala yeke daa so, ala mu peko ti sanduku ti mbuki ni.

⁴Tongaso si fade ala hinga lege so ala gue daa, ngbanga ti so ala de ti hon na lege so laoko pepe. Me ayeke nzoni popo ti ala na sanduku ti mbuki ni ayo nduru na kilometere oko. Ala gue nduru na ni pepe.”

⁵Na pekoni, Josué atene na azo ni, atene: “Ala zia tere ti ala nde ndali ti Nzapa, ngbanga ti so kekereke fade KOTA GBIA ayeke sara aye ti kpene na popo ti ala.”

⁶Lango oko na pekoni, Josué amu yanga na awayango-sandaga, atene: “Ala mu sanduku ti mbuki ni, ala hon kozo ti azo ni.” Awayango-sandaga ni asara tongana ti so lo hunda.

⁷KOTA GBIA atene na Josué: “Ti londo na lango ti laso, mbi yeke sara titene mo ga kota na le ti azo ti Israel kue; tongaso, fade ala yeke hinga atene, mbi yeke na mo tongana ti so mbi yeke ando na Moïse so.

⁸Ti mo, fade mo mu yanga na awayango-sandaga so ayeke yo sanduku ti mbuki, mo tene: ‘Tongana ala si na ya ti ngu ti Jourdain ni awe, ala luti.’ ”

⁹Tongaso Josué atene na azo ti Israel, atene: “Ala pusu ge, ala ma tënë ti KOTA GBIA, Nzapa ti ala.”

¹⁰Na pekoni lo kiri lo tene: “Ye so ala yeke hinga atene, Nzapa so ayeke na fini ayeke na popo ti ala ayeke so: lo yeke tumba biani biani na dawa ti ala azo ti Kanaan, azo ti mara ti Het, ti Hivi, ti Perizi, ti Girgashi, ti Amori na azo ti mara ti Yebus.

¹¹Fade sanduku ti mbuki ti KOTA GBIA ti sese kue ayeke hon kozo ti ala na ya ti ngu ti Jourdain.

¹²Fadeso ala soro azo baleoko na use na popo ti amara ti Israel, zo oko na ya ti mara oko.

¹³Gi so awayango-sandaga ayeke zia gere ti ala na ya ti ngu ti Jourdain, ala so ayeke yo sanduku ti mbuki ti KOTA GBIA, lo so lo yeke Kota Gbia ti sese kue, fade ya ti ngu ni ayeke kangbi; ngu so alondo na mbage ti nduzu si ayeke ga so ayeke luti, mo baa mo tene, a kanga ni kangango.”

¹⁴Na ndembe so azo ni alondo na ya ti bâbâ ni ti fâ ngu ti Jourdain, awayango-sandaga so ayeke yo sanduku ti mbuki ni ahon ti ala kozo ti azo ni.

¹⁵Andaa ayeke ando na ngoi ti fango ale ti kobe; ngoi so ngu ti Jourdain ayeke suku si ayeke mu asese so ayeke na tere ni. Gi so awayango-sandaga asi na yanga ti ngu si ala yoro gere ti ala na ya ti ngu ni,

¹⁶ngu so alondo na mbage ti nduzu ti sua na gbeni akai ti sua, mo baa mo tene, a kanga ni kangango. Ngu ni aluti yongoro kâ na gbata ti Adam so ayeke nduru na gbata ti Sartan. Ngu so ayeke sua ti gue na gbeni na ya ti kota ngu ti Gba-ti-ingo ahon biani biani. Azo ni afâ ngu ti Jourdain na ndo so abaa le na gbata ti Jéricho.

¹⁷Awayango-sandaga so ayeke yo sanduku ti mbuki ti KOTA GBIA aluti na ndö ti kuru sese na be ti Jourdain. Na ndembe so ala ngba ti luti, azo ti Israel kue ayeke hon, ngu andu gere ti ala pepe, ngbii azo ni kue afâ ngu ti Jourdain ni.