Read La Bible en Sango courant – Mbeti ti Nzapa Josué 5 Bible Online

Josué 5 - La Bible en Sango courant – Mbeti ti Nzapa bible

Josué 5

¹Agbia kue ti azo ti mara ti Amori so ayeke na mbage ti ngu ti Jourdain, na Do, na agbia kue ti azo ti Kanaan so ayeke na tere ti kota ngu-ingo ti Mediterane ama a tene, *KOTA GBIA asara si ngu ti Jourdain ahole na dawa ti azo ti Israel ngbii ala kue afâ ngu ni. So agbia ni ama tënë so, be ti ala afun kue, ala yeke na ngangu ti gbu le ni na azo ti Israel pepe.

²Na ngoi ni so, *KOTA GBIA atene na Josué: “Mu têne, mo leke na azeme, mo fâ azo ti Israel ti ngoi ti fadeso na *ganza.”

³Josué amu têne, lo leke na azeme si lo fâ azo ti Israel na ganza na ndo so iri ni hoto ti *Pito.

⁴Ye so asara si Josué afâ ala na ganza ayeke so: azo so kue alondo na Ezipte si asigigi, akoli na azo ti tiringo bira, ala kue akui na lege na benyama, na ndembe ti sigingo ti ala na Ezipte.

⁵Azo so kue alondo na Ezipte si asigigi, ala fâ ganza awe; me ala so a du ala na benyama, na lege, na ndembe ti sigingo ti ala na Ezipte, ade ala fâ ganza pepe.

⁶Azo ti Israel atambula na benyama ngu baleosio. So ngu baleosio ni ahunzi awe, akoli ti tiringo bira so alondo na Ezipte asigigi, ala kue akui. Ala kui, ngbanga ti so ala ma yanga ti KOTA GBIA pepe; KOTA GBIA adeba yanga ti lo lani atene, ni yeke zia ala titene ala li na ya ti kodro ni so pepe, kodro so lo deba yanga ti mu na akotara ti ala; *kodro so ngu ti me ti bagara na mafuta ti wotoro asi singo daa.

⁷Amolenge ti ala laa lo zia ala li na ya ti kodro ni na peko ti ala. Amolenge ni so laa Josué afâ ala na ganza, ngbanga ti so ala de ti fâ ganza pepe. Biani, na ndembe so ala yeke na lege ti gango ni, ade a fâ ala na ganza pepe.

⁸So a fâ azo ni kue na ganza awe, ala ngba gi na ndo oko na ya ti bâbâ ngbii ka ti ganza ni amu.

⁹Na pekoni KOTA GBIA atene na Josué: “Kamene so ala mu na Ezipte aga na ni so, laso, mbi yeke sara titene ahon yongoro na tere ti ala.” Ndani laa azo adi iri ti ndo ni so Gilgal; iri ni so angba ngbii asi laso.

¹⁰Azo ti Israel asara bâbâ na Gilgal. Na lango baleoko na osio ti nze ni, na lakui, ala sara *matanga ti Pake na lando ti Jéricho.

¹¹Lango oko na pekoni, ala te akobe ti kodro ni, mapa so a sara na mama ni pepe nga na ale ti kobe so a yoro ni yorongo.

¹²Lango oko na peko ti akobe ti kodro ni so ala te so, *mane akai; azo ti Israel akiri awara mane pepe si na ngu ni so, ala te gi akobe ti kodro ti Kanaan.

¹³Mbeni lâ, Josué ayeke nduru na gbata ti Jéricho. Lo ye ti baa ndo tongaso, lo baa mbeni koli ayeke luti na dawa ti lo. Koli ni agbu mbeni yongoro zeme so lo zi ni na ya ti bozo ni awe. Josué ague na tere ti lo si ahunda lo: “Mo yeke na mbage ti e wala mo yeke na mbage ti awato ti e?”

¹⁴Koli ni akiri tënë: “Mbi yeke na mbage ti zo oko pepe; me mbi yeke makonzi ti aturugu ti *KOTA GBIA. Gango ti mbi laa.” Tongaso Josué ati, lo kpo li ti lo na sese si lo tene: “Nyen laa kota zo ti mbi aye ti tene na mbi, zo ti gbe ti lo?”

¹⁵Makonzi ti aturugu ti KOTA GBIA atene na Josué: “Zi poro na gere ti mo, ngbanga ti so ndo so mo yeke luti daa so ayeke nde si ayeke nzoni kue.” Josué asara gi tongana ti so lo tene.