Read La Bible en Sango courant – Mbeti ti Nzapa Josué 6 Bible Online

Josué 6 - La Bible en Sango courant – Mbeti ti Nzapa bible

Josué 6

¹Azo akanga ngangu ayanga ti gbagba ti Jéricho kue ndali ti azo ti Israel. Zo oko alingbi ti li pepe, zo oko alingbi ti sigigi nga pepe.

²*KOTA GBIA atene na Josué: “Baa, mbi zia na maboko ti mo awe gbata ti Jéricho, gbia ni nga na angangu zo ti bira ni.

³Mo na aturugu ti mo kue, fade ala yeke tambula angoro gbata ni lege oko na ya ti lango oko. Fade ala sara tongaso na ya ti lango omene.

⁴Fade awayango-sandaga mbarambara amu adidi mbarambara ti akoli-taba si ala tambula na dawa ti sanduku ti *mbuki. Na lango mbarambara ni, fade ala tambula angoro gbata ni lege mbarambara si awayango-sandaga ahuru didi ti akoli-taba ni.

⁵Tongana a huru adidi ti akoli-taba ni aninga si ala ma ni, fade azo kue adekongo ngangu; fade ngangu gbagba so angoro gbata ni ayeke kungbi. Tongaso, azo ti Israel ayeke li na ya ti gbata ni, zo oko oko gi na dawa ti lo.”

⁶Josué, molenge ti Nune, airi awayango-sandaga ni si lo tene na ala: “Ala yo sanduku ti mbuki si ambeni zo mbarambara na popo ti ala amu didi mbarambara ti akoli-taba, ala tambula na dawa ti sanduku ti mbuki ti KOTA GBIA.”

⁷Na pekoni, lo mu yanga na azo ni, lo tene: “Ala londo, ala tambula, angoro gbata ni! Aturugu so ayeke mu li ni, ala hon ti ala kozo na dawa ti sanduku ti mbuki ti KOTA GBIA.”

⁸Ala sara ye ni kue gi tongana ti so Josué amu yanga na ala. Awayango-sandaga mbarambara so amu adidi mbarambara ti akoli-taba so, atambula na dawa ti sanduku ti KOTA GBIA si ala huru adidi ti akoli-taba ni; sanduku ti mbuki ti KOTA GBIA amu peko ti ala.

⁹Aturugu so amu li ni ayeke tambula na dawa ti awayango-sandaga so ayeke huru didi. Aturugu so ayeke tambula na peko ayeke mu peko ti sanduku ti mbuki ni. So ala yeke tambula, awayango-sandaga ayeke huru didi.

¹⁰Me Josué amu yanga na azo ni, atene: “Ala dekongo pepe! Ala kai kpoo! Tënë oko asigigi na yanga ti ala pepe, ngbii asi na lango so mbi yeke hunda na ala ti dekongo si ala dekongo.”

¹¹Tongaso awayango-sandaga atambula na sanduku ti mbuki angoro gbata ni. Ala ngoro ni fani oko, na pekoni ala kiri na ya ti bâbâ si ala lango kâ.

¹²Na ndaperere so ndo angba kâ, Josué alondo si awayango-sandaga ayo sanduku ti mbuki ni.

¹³Awayango-sandaga mbarambara so ayo adidi mbarambara ti akoli-taba akiri alondo ti tambula na dawa ti sanduku ti mbuki ti KOTA GBIA, ala yeke huru didi. Aturugu so ayeke mu li ni ayeke tambula na dawa si ala so ayeke ga na peko ayeke mu peko ti sanduku ti mbuki ni. So azo ni ayeke tambula, ala yeke huru didi.

¹⁴Ala tambula angoro gbata ni fani oko na use lango ni; na pekoni, ala kiri na ya ti bâbâ. Ala sara gi tongaso na ya ti lango omene.

¹⁵Na lango mbarambara ni, na kota ndaperere, ala londo awe, ala tambula angoro gbata ni fani mbarambara gi tongana ti so ala sara kozoni. Gi na lango oko so laa ala tambula angoro gbata ni fani mbarambara.

¹⁶Ti fani mbarambara ni, so awayango-sandaga ahuru didi awe, Josué atene na azo ni, atene: “Ala dekongo ngangu, ngbanga ti so KOTA GBIA azia gbata ni na maboko ti ala awe!

¹⁷Gbata ni na aye so kue ayeke na ya ni, fade a yeke zia ni titene a buba ni, ngbanga ti so gbata ni ayeke ti KOTA GBIA. Gi Rahab, wali-ndumba so, lo na azo so kue ayeke na lo na ya ti da ti lo laa ayeke ngba na fini, ngbanga ti so lo honde azo ti *bembengo ndo so lani e tokua ala so.

¹⁸Me ti ala, ala sara hange! Aye so a zia ni titene a buba ni, ala mu ni pepe. Tongana ala mu mbeni ye, fade ala yeke sara si kpale ati na ndö ti bâbâ ti azo ti Israel si ayeke buba bâbâ ni kue.

¹⁹Wen ti nginza kue na lôro nga na aye so kue a sara na bengba wen nga na wen, fade ala zia ni nde ndali ti KOTA GBIA; ala zia ni na ya ti kubu so a yeke bata amosoro ti KOTA GBIA daa.”

²⁰Awayango-sandaga ahuru didi; gi so azo ama hurungo didi ni, ala dekongo ngangu si gbagba ni akungbi. Gi hio tongaso, azo ni ali na ya ti gbata ni, zo oko oko gi na dawa ti lo si ala mu gbata ni.

²¹Ala buba aye so kue ayeke na ya ti gbata ni; akoli na awali, amaseka na ambakoro, abagara, ataba na alele, ala fâ ala kue.

²²Josué atene na azo use so ague lani *abembe ndo na ya ti gbata ni, atene: “Ala li na ya ti da ti Rahab, wali-ndumba so, ala sigigi na lo nga na asewa ti lo kue tongana ti so ala deba yanga ti ala lani na lo so.”

²³Amaseka-koli so ague lani abembe ndo so ali si ala sigigi na Rahab, babâ ti lo, mama ti lo, a-ita ti lo nga na aye ti lo kue. Ala sigigi na azo ti kete mara ti lo kue si a bata ala na mbeni ndo nde, na peko ti bâbâ ti azo ti Israel.

²⁴Na pekoni, ala gbi gbata ni na aye so kue ayeke na ya ni. Ye so ala gbi ni pepe ayeke gi wen ti nginza, lôro nga na aye so a sara ni na bengba wen nga na wen. Ala mu aye ni azia na ya ti kubu so a yeke bata amosoro ti da ti *KOTA GBIA daa.

²⁵Josué azia Rahab, wali-ndumba ni angba na fini, lo na asewa ti lo na aye ti lo kue, ngbanga ti so lo honde azo so Josué atokua ala lani ti bembe ndo na gbata ti Jéricho so. Rahab alango ando na popo ti azo ti Israel si *ahale ti lo angba ti lango na popo ti ala ngbii asi laso.

²⁶Na ngoi ni so, Josué adeba yanga ti lo, atene: “Deba ti KOTA GBIA aga na li ti zo so ayeke londo ti kiri ti leke gbata ti Jéricho so! Lo yeke futa lekengo gere ti gbata ni na fini ti kozo molenge ti lo; lo yeke futa nga lekengo ayanga ti gbata ni na fini ti tanga ti molenge ti lo.”

²⁷KOTA GBIA ayeke na Josué si iri ti lo awu amu ya ti kodro ni kue.