Read La Bible en Sango courant – Mbeti ti Nzapa 2 Timothée 3 Bible Online

2 Timothée 3 - La Bible en Sango courant – Mbeti ti Nzapa bible

2 Timothée 3

¹Ayeke nzoni mo hinga ye so: na ya ti alango ti ndani, fade angoi ayeke ga ngangu.

²Azo ayeke ga azo ti kion, nzara ti nginza ayeke hon ndö ti ala, ala yeke pika kate ti ala si ala yeke gonda tere ti ala; ala yeke zonga Nzapa si ala yeke sara ngangu li na ababâ na amama ti ala. Ala yeke hinga anzoni ye so a sara na ala pepe si ala yeke kpe ye ti Nzapa oko pepe.

³Ala yeke na be ti zo pepe, ala yeke sara mawa ti amba ti ala pepe, ala yeke tene sioni tënë na iri ti amba ti ala, ala yeke kanga nzara ti tere ti ala pepe, ala yeke sara pasi na amba ti ala, ala ye ti sara nzoni ye pepe.

⁴Ala yeke azo ti kango amba ti ala, azo ti ngonzo, azo so baba ahon ndö ti ala; ala ye aye so anzere na ala ahon Nzapa;

⁵ala yeke sara ye, mo baa mo tene, ala yeke azo so agbu tënë ti Nzapa mingi, andaa ala zia lege ti ngangu ti mabe awe. Mara ti azo tongaso, ayeke nzoni mo zia lege ti ala.

⁶Ambeni zo na popo ti ala ayeke li na ya ti ada, ala yeke wara ngangu ti ala na ndö ti awali so akpengba pepe, awali so siokpari ahon ndö ti ala si nzara ti asioni ye nde nde ayeke na be ti ala;

⁷awali so ayeke manda ye lakue, me ala lingbi ti hinga taa-tënë laoko pepe.

⁸Azo ni so ake taa-tënë gi tongana ti so Yanes na Yambres ake ando tënë ti Moïse. Li ti azo ni so aga kirikiri si mabe ti ala ayeke ye oko pepe.

⁹Me fade ala yeke gue yongoro pepe, ngbanga ti so azo kue ayeke hinga buba ti ala tongana ti so azo ahinga ando buba ti Yanes na Yambres so.

¹⁰Me ti mo, mo mu lani peko ti mbi na lege ti aye so: fango ye ti mbi, dutingo ti mbi, aye so mbi leke na be ti mbi ti sarango ni, mabe ti mbi, kangango be ti mbi ti ku ye, ndoye ti mbi, kangango be ti mbi

¹¹nga na aye ti ngangu so ando asi na mbi. Mbi baa pasi mingi na Antioshe, na Ikoniom, na Listre. Aye ti ngangu ti nyen laa asi na mbi pepe? Me *Kota Gbia azi mbi na ya ni kue.

¹²Biani, azo so kue aga oko na Jésus Christ si ala gbu tënë ti Nzapa mingi, fade a yeke sara ngangu na ala.

¹³Ti azo ti sioni na azo ti handango amba ti ala, fade ala yeke ngba ti sara sioni ti gue na ni; ala yeke handa azo si azo ayeke handa nga ala.

¹⁴Me ti mo, ayeke nzoni mo ngba na ndö ti ye so lani a fa na mo, mo yeda na ni si mo hinga, mo tene, ayeke taa-tënë so; mo hinga azo so afa ye ni na mo awe.

¹⁵Ti londo na ndembe so mo de kete molenge ngbii asi fadeso, mo hinga Mbeti ti Nzapa; mbeti ni alingbi ti mu na mo ndara. Ndara ni ayeke fa na mo lege titene mo soo kuâ na lege so mo ma na be na Jésus Christ.

¹⁶Atënë kue ti Mbeti ti Nzapa alondo na yanga ti Nzapa wani. Atënë ni ayeke nzoni ti fa ye na zo, ti ke na zo sioni so lo sara, ti kiri zo na nzoni lege, ti fa na zo ye so ayeke mbirimbiri

¹⁷si zo ti Nzapa akpengba, lo wara anzoni ye so kue alingbi titene lo sara na nzoni kua.