Read La Bible en Sango courant – Mbeti ti Nzapa Tite 1 Bible Online

Tite 1 - La Bible en Sango courant – Mbeti ti Nzapa bible

Tite 1

¹Mbi Paul, mbi yeke zo ti kua ti Nzapa si mbi yeke nga *watokua ti Jésus Christ. Nzapa atokua mbi ti sara si azo so lo soro ala ama na be si ala hinga taa-tënë so alingbi gi na lege ti vorongo Nzapa,

²tongaso si ala zia be ti ala ti ku fini so angba lakue lakue. Nzapa ayeke tene mvene pepe; kozo si dunia abaa gigi, Nzapa amu zendo ti mu na ala fini ni so.

³So ngoi ni alingbi awe, Nzapa, Wasongo e afa tënë ti lo, lo mu na mbi tënë ni si mbi yeke fa ni na peko ti yanga so lo mu na mbi.

⁴Mbi tokua mbeti so na mo Tite so mo yeke taa molenge ti mbi na lege ti oko mabe so e yeke na ni. Ayeke nzoni Nzapa Babâ na Wasongo e, Jésus Christ asara nzoni be na mo si amu na mo siriri!

⁵Mbi zia mo na zoa ti Krete titene mo leke tanga ti gere ti kua ni si mo zia nga *akangba na ndö ti a-Eglize so ayeke na ya ti agbata ni oko oko kue. Ayeke nzoni mo sara aye ni tongana ti so mbi fa na mo.

⁶Alingbi kangba ayeke zo so tënë ayeke na li ti lo pepe, lo yeke gi na wali oko; amolenge ti lo ayeke azo so ama na be, zo ti bingo tënë na li ti ala ndali ti sarango ye ti kirikiri wala ti sarango ngangu li ayeke daa pepe.

⁷Zo ti li ti Eglize ayeke wabatango lege ti aye ti Nzapa, nilaa alingbi lo yeke zo so tënë ayeke na li ti lo pepe. Lo yeke zo ti pikango kate pepe, zo ti ngonzo pepe, ngbaa ti samba pepe, zo ti tiri pepe; lo yeke zo ti warango nginza na lege ti likisi pepe.

⁸Me lo yeke yamba azo nzoni na da ti lo, lo ye ti sara gi nzoni ye; lo yeke tene tënë na legeni, lo yeke zo ti mbirimbiri, lo duti nde ndali ti Nzapa, lo hinga ti kanga anzara ti tere ti lo.

⁹Alingbi lo ngba gi na ndö ti tënë ti Nzapa so ayeke taa-tënë si alingbi gi na ti so azo ti Nzapa afa kozoni. Tongaso si lo lingbi ti mu wango na azo na lege ti fango ye so ayeke mbirimbiri, lo lingbi nga ti fa na azo ti kengo tënë so, ala girisa lege awe.

¹⁰Biani, ambeni zo mingi ayeke daa so li ti ala akpengba, ala yeke diko abuba tënë si ala yeke handa azo; mingi ti ala ayeke azuife so aga azo ti Christ.

¹¹Alingbi mo kanga yanga ti ala, ngbanga ti so ala sara si mabe ti azo kue na ya ti ambeni sewa ati. Ala ye ti gi nginza na lege ti sioni, nilaa ala yeke fa tënë so zo alingbi fade ti fa pepe.

¹²Mbeni zo oko na popo ti ala, mbeni wayanga-nzapa ti ala wani atene: “Azo ti Krete ayeke tene gi mvene lakue, ala yeke asioni nyama, ala yeke azo ti sopo so ayeke te kobe gi na mbana.”

¹³Tënë so lo tene so ayeke taa-tënë. Ndani laa, alingbi mo suku na ala ngangu si mabe ti ala aduti na legeni;

¹⁴alingbi ala zia be ti ala pepe na ndö ti atoli ti azuife nga na ndö ti fango tënë ti azo so azia lege ti taa-tënë.

¹⁵Ye kue ayeke *nzoni ndali ti azo so be ti ala avuru. Me ti azo so ayeke *sioni si ala ke ti ma na be, mbeni *nzoni ye oko ndali ti ala ayeke daa pepe. Hingango ndo ti ala nga na be ti ala kue aga *sioni awe.

¹⁶Ala tene na yanga ti ala atene, ala hinga Nzapa, me ye so ala yeke sara afa so, ala bere tënë ti lo awe. Ala yeke azo so sioni ti ala ahon ndoni, azo ti ngangu li, ala lingbi ti sara nzoni ye oko pepe.