Read La Bible en Sango courant – Mbeti ti Nzapa Tite 2 Bible Online

Tite 2 - La Bible en Sango courant – Mbeti ti Nzapa bible

Tite 2

¹Ti mo, mo tene gi tënë so alingbi na fango ye so ayeke mbirimbiri.

²Mo tene na ambakoro-koli titene ala sara ye ahon ndoni pepe, me na legeni; ala ne tere ti ala, ala tene tënë na legeni, ala kpengba na lege ti mabe, na lege ti yengo tere nga na lege ti kangango be na ya ti aye kue.

³Mo tene nga na ambakoro-wali titene ala duti tongana azo so aduti nde ndali ti Nzapa: alingbi ala tene sioni tënë na iri ti zo pepe, ala yeke angbaa ti samba pepe, ala fa na azo ye so ayeke nzoni,

⁴ala fa na amaseka-wali so amu koli ti ye akoli ti ala na amolenge ti ala,

⁵ti sara ye ahon ndoni pepe, me na legeni, ti bata li ti ala nzoni, ti duti anzoni wali ti da, ti duti na nzerengo be, ti ma yanga ti akoli ti ala. Tongaso, fade mbeni zo ayeke zonga tënë ti Nzapa pepe.

⁶Mo mu nga wango na amaseka-koli titene ala sara ye ahon ndoni pepe, me na legeni;

⁷ala sara tongaso na ya ti aye kue. Mo nga, mo duti tapande na lege ti sarango anzoni ye: mo fa ye na azo na legeni mbirimbiri, mo ne tere ti mo.

⁸Mo tene gi tënë so ayeke na legeni si zo alingbi ti kasa ni pepe, tongaso si wato agi tënë ti bi na li ti e gbaa si kamene agbu lo.

⁹Alingbi angbaa ama yanga ti awa ti ala na ya ti aye kue. Ala sara ye so anzere na be ti awa ti ala ni: ala *bingbi tënë na awa ti ala pepe,

¹⁰ala nzi nga ye ti awa ti ala ni pepe. Lakue ala sara ye titene awa ti ala alingbi ti zia be ti ala na ndö ti ala. So laa ayeke sara titene azo ane tënë so e yeke fa si alondo na Nzapa, Wasongo e.

¹¹Biani, Nzapa afa nzoni be ti lo na azo kue awe titene na lege ti nzoni be ti lo ni, ala soo kuâ.

¹²Nzoni be ti lo afa na e titene e zia lege ti kengo Nzapa, e zia nzara ti aye ti gigi so. Tongaso, na lege ti dutingo ti e, e sara ye ahon ndoni pepe, me na legeni, e sara ye ti mbirimbiri, e ngba ti gbu tënë ti Nzapa ngangu

¹³si e zia be ti e ti ku nzoni lango so fade e yeke baa kota Nzapa ti e na Wasongo e, Jésus Christ, na ya ti gonda ti lo.

¹⁴Lo ka ando tere ti lo na kuâ ndali ti e, ti zi e na ya ti aye ti sioni kue, ti sukula e si e ga azo ti lo wani, titene e mu ngangu ti e kue ti sara anzoni ye.

¹⁵Lege so mo lingbi ti tene tënë na azo, ti mu wango na ala, ti suku na ala laa; mo sara ni na ngangu so Nzapa amu na mo. Mo sara si mbeni zo oko abaa mo tongana buba zo pepe.