Read La Bible en Sango courant – Mbeti ti Nzapa Tite 3 Bible Online

Tite 3 - La Bible en Sango courant – Mbeti ti Nzapa bible

Tite 3

¹Mo kiri mo tene na azo kue: alingbi ala ma yanga ti azo ti komandema na ti azo so ayeke na li ti kodro; alingbi ala sara ye so azo ni ahunda na ala, ala duti nduru ti sara nzoni ye lakue.

²Alingbi ala tene sioni tënë na iri ti zo pepe, ala papa na zo pepe, ala sara nzoni be na azo; lakue, ala sara ye na azo kue gi na wokongo be.

³E nga, e yeke ando azo so li ti e ayeke daa pepe, azo ti ngangu li, azo so agirisa lege. Ando, e mu be ti e kue ti sara aye so anzere na be ti e si nzara ti aye nde nde ahon ndö ti e; e yeke azo ti sioni si e yeke sara kota be na tere ti amba ti e. Azo ayeke ke e; e nga, e yeke ke tere na popo ti e.

⁴Me na ndembe so Nzapa, Wasongo e, afa nzoni be ti lo na azo si lo fa nga yengo so lo ye azo na ni,

⁵lo soo e na kuâ. Mbeni ye ti nzoni so e wani, e sara na lege ti mbirimbiri ti e titene lo soo e ndali ni ayeke daa pepe, me lo soo e, ngbanga ti so lo baa mawa ti e. Lo soo e, lo sukula e na lege ti Yingo-Vuru so asara si e ga fini zo si e wara fini kode ti dutingo ni.

⁶Nzapa asara si Yingo-Vuru aga mingi na ndö ti e na lege ti Jésus Christ, Wasongo e.

⁷Tongaso, na lege ti nzoni be ti lo, e ga mbirimbiri na le ti Nzapa si e wara nga fini so angba lakue lakue so e zia be ti e ti ku ni.

⁸Tënë so ayeke taa-tënë. Mbi ye mo tene tënë na ndö ni ngangu si azo so ama na be na Nzapa azia be ti ala na sarango anzoni ye. So laa ayeke nzoni si azo alingbi ti wara ye daa.

⁹Me mo kpe lege ti gingo nda ti asenge senge tënë: tënë ti nda ti mara ti azo, apapa na *abingbingo tënë na ndö ti atënë ti *Ndia. Aye so kue ayeke senge senge, zo alingbi ti wara ye daa pepe.

¹⁰Zo so ayeke ga na kangbi na ya ti Eglize, mo gboto mê ti lo kozoni. Tongana lo ngba daa, mo kiri mo gboto mê ti lo ti fani use. Na pekoni, tongana lo ma mo pepe, mo zia lo na gigi.

¹¹Mo hinga so mara ti zo tongaso, lo girisa lege awe. So lo ngba ti sara siokpari, lo fâ ngbanga na li ti lo wani awe.

¹²Tongana mbi tokua Artemas wala Tishike na mo, mo gi lege ngangu ti ga ti wara mbi na gbata ti Nikopolis. Mbi leke be ti mbi ti ngba kâ na ngoi ti de.

¹³Mo mu maboko na Zenas, wagbungo-koko, lo na Apolos ngbanga ti tambula ti ala si mbeni ye atia ala pepe.

¹⁴Alingbi azo ti e nga amanda lege ti mu tere ti ala kue ti sara anzoni ye. Tongaso, tongana mbeni ye atia, ala lingbi ti mu maboko ndali ni, ala duti gi senge pepe.

¹⁵Azo so kue ayeke na tere ti mbi ge abara mo. Mo bara amba ti e so e na ala, e ye tere si ala ma na be tongana e so. Ayeke nzoni Nzapa asara nzoni be na ala kue!