Read La Bible en Sango courant – Mbeti ti Nzapa Philémon 1 Bible Online

Philémon 1 - La Bible en Sango courant – Mbeti ti Nzapa bible

Philémon 1

¹Mbi Paul, so mbi yeke na da ti kanga ndali ti Jésus Christ, mbi na ita ti e Timothée laa e tokua mbeti so na mo Philémon, mba ti e, zo ti kua so e ye mo mingi.

²E tokua nga mbeti so na ita ti e ti wali Apia, lo na Arshipe, mba ti e so abongbi na e ti tiri bira; e tokua nga mbeti so na azo ti *Eglize so ayeke bongbi na da ti mo.

³Ayeke nzoni Nzapa Babâ na *Kota Gbia Jésus Christ asara nzoni be na ala si amu na ala siriri!

⁴Ita Philémon, mbi yeke zia mo lakue na ya ti sambela ti mbi si mbi yeke mu singila na Nzapa ti mbi.

⁵Biani, mbi ma tënë ti yengo so mo ye na azo ti Nzapa nga na tënë ti mabe ti mo na ndö ti *Kota Gbia Jésus.

⁶Mbi hunda na Nzapa titene beoko so mbi na mo, e yeke na ni na lege ti mabe asara si azo ahinga anzoni ye so kue e lingbi ti sara ndali ti Christ.

⁷Ita ti mbi, so mbi ma tënë ti yengo so mo ye na azo, ngia asi be ti mbi si be ti mbi ade. Ye so mo sara so amu ngangu na be ti azo ti Nzapa.

⁸So e ga oko na Christ awe so, mbi lingbi ti mu yanga na mo senge ti sara ye so mo lingbi ti sara.

⁹Mbi ye fade ti mu yanga na mo pepe, me ndali ti so mbi na mo, e ye tere, mbi ye mingi ti hunda mbeni ye na mo. Mbi Paul, mbakoro zo, mbi yeke fadeso na da ti kanga ndali ti Jésus Christ.

¹⁰Mbi gbu gere ti mo ndali ti Onezime; lo ga molenge ti mbi ge na da ti kanga ndali ti so lo ma na be na lege ti mbi.

¹¹Ando, mo wara nzoni ye na lege ti lo pepe, me fadeso mbi na mo kue, e yeke wara nzoni ye na lege ti lo.

¹²Fadeso mbi yeke kiri lo na mo, lo yeke tongana mbeni mbage ti tere ti mbi wani.

¹³Mbi yeke fade na nzara ti bata lo na tere ti mbi, tongaso si lo sara kua so mo wani, mo lingbi fade ti sara na mbi, na ndembe so mbi yeke na da ti kanga ndali ti Nzoni Tënë.

¹⁴Me mbi ye ti sara mbeni ye pepe gi tongana mbi hinga tënë ti be ti mo si. Titene mo sara nzoni na mbi, mbi ye ti gbu mo na ngangu pepe, me mbi ye mo sara ye so be ti mo afa na mo ti sarango ni.

¹⁵Mbi hinga pepe, Onezime akangbi na mo na ya ti kete ngoi titene na pekoni, mo kiri mo wara lo si lo ngba na mo lakue lakue.

¹⁶Ti fadeso, lo yeke gi ngbaa pepe, me lo hon ngbaa awe; lo yeke ita so e ye lo mingi. Mbi ye lo ahon ndoni, mo nga, fade mo yeke ye lo ahon ndoni, ngbanga ti so lo yeke mba ti mo zo si lo yeke nga mba ti mo, zo ti *Kota Gbia.

¹⁷Tongaso, tongana mo baa mbi tongana mba ti mo, zo ti kua ti Christ, ayeke nzoni mo yamba lo tongana ti so mo yeke yamba mbi.

¹⁸Tongana lo sara sioni na mo, wala mbeni yongo ti mo angba na li ti lo, ayeke nzoni mo zia ni na li ti mbi.

¹⁹Mbi Paul laa mbi yeke su tënë so na maboko ti mbi wani: fade mbi yeke futa yongo ni na mo. — Mbi ye ti dabe ti mo na ndö ti mbeni ye: yongo ti mbi ayeke na li ti mo, yongo ni ayeke fini ti mo wani. —

²⁰Biani, ita, sara ye so na mbi, ngbanga ti so mo ga oko na *Kota Gbia awe. Ndali ti so mo yeke ita ti mbi, zo ti Christ, sara titene be ti mbi awara ngangu.

²¹Na ndembe so mbi yeke su mbeti so na mo, mbi hinga, mbi tene, fade mo yeke sara ye so mbi hunda na mo. Biani, mo yeke sara ande ye ni ahon ti so mbi hunda na mo.

²²Mo leke nga mbeni ndo ti lango ndali ti mbi, ngbanga ti so mbi zia be ti mbi ti ku so fade Nzapa ayeke ma sambela ti ala si lo yeke zi lege titene mbi kiri na popo ti ala.

²³Epafras, mba ti mbi zo ti kanga ndali ti Jésus Christ, abara mo.

²⁴Marc, Aristarke, Demas na Luc, amba ti mbi, azo ti kua, ala nga abara mo.

²⁵Ayeke nzoni *Kota Gbia Jésus Christ asara nzoni be na ala!