Read La Bible en Sango courant – Mbeti ti Nzapa Ahebro 8 Bible Online

Ahebro 8 - La Bible en Sango courant – Mbeti ti Nzapa bible

Ahebro 8

¹Kota tënë so e ye ti luti na ndö ni ayeke so: e yeke na mara ti kota wayango-sandaga so, lo yeke duti na yayu na tere ti mbata ti Gbia Nzapa na mbage ti maboko ti lo ti koli, Nzapa so ngangu ti lo ahon ndoni.

²Lo yeke sara kua ti lo ti kota wayango-sandaga ni na ndo so ayeke nde si ayeke nzoni kue, so ti tene, na ya ti taa da ti bongo so *Kota Gbia Nzapa asara ni; maboko ti zo laa asara ni pepe.

³Kota wayango-sandaga kue, a mu lo titene lo ya aye wala *sandaga na Nzapa. Nilaa, alingbi Jésus ayeke na mbeni ye na maboko ti lo ti ya na Nzapa.

⁴Tongana lo yeke fade na sese so, ka lo duti wayango-sandaga oko pepe, ngbanga ti so awayango-sandaga ayeke daa awe, ala so ayeke ya aye na Nzapa alingbi na *Ndia ti Moïse.

⁵Kua so ala yeke sara ayeke gi tongana limo ti aye so ayeke na yayu. Ye ni ayeke legeoko tongana ye so asi na Moïse na ngoi so lo ye ti leke da ti bongo. Nzapa atene na lo: “Fade mo yeke sara kue ti sara ye ni alingbi gi na kode so mbi fa na mo na li ti hoto so.”

⁶Biani, Nzapa amu na Jésus kota kua so ahon ti ambeni wayango-sandaga kue, ngbanga ti so lo yeke zo ti lekengo tënë ti mbeni *mbuki so ayeke nzoni ahon ti kozo ni. Mbuki ni so ayeke na ndö ti aye so Nzapa amu zendo ni na azo, aye so ayeke nzoni ahon atanga ni kue.

⁷Tongana ye ti sioni oko ayeke fade na ya ti kozo mbuki ni pepe, ka lege ayeke daa pepe ti sara mbeni fini mbuki nde.

⁸Andaa Nzapa asuku na azo ti lo, atene: “Kota Gbia atene: Ambeni lango ayeke ga so fade mbi na azo ti Israel nga na azo ti Juda, e yeke sara fini mbuki.

⁹Mbuki ni ayeke duti nde na ti so lani mbi na akotara ti ala e sara na ngoi so mbi gbu maboko ti ala ti sigigi na ala na Ezipte. Kota Gbia atene: Akotara ti ala angba na ya ti mbuki ni pepe, nilaa mbi nga, mbi do ala, mbi zia.

¹⁰Kota Gbia atene: Baa, mbuki so mbi na azo ti Israel, e yeke sara ni ayeke so: Na peko ti alango ni so, mbi yeke mu andia ti mbi na ala, mbi yeke su ni na ya ti li ti ala nga na ndö ti be ti ala. Mbi yeke duti Nzapa ti ala si ala yeke duti azo ti mbi.

¹¹Zo oko ayeke kiri ti fa ye na mba ti lo wala na ita ti lo oko pepe, atene: ‘Mo hinga Kota Gbia!’ Biani, ti londo na kete zo asi na kota zo, fade ala kue ayeke hinga mbi.

¹²Biani, mbi yeke zi tënë na li ti ala, mbi yeke kiri ti dabe ti mbi na siokpari ti ala oko pepe.”

¹³So Nzapa atene tënë ti fini mbuki so, lo sara si kozo mbuki ni aga ngbene ye. E hinga so, ye so aga ngbene ye si aga gbagbara ni, aga nduru ti hon awe.