Read La Bible en Sango courant – Mbeti ti Nzapa Ahebro 9 Bible Online

Ahebro 9 - La Bible en Sango courant – Mbeti ti Nzapa bible

Ahebro 9

¹Kozo *mbuki ayeke na andia so ayeke fa na azo lege ti vorongo Nzapa; ayeke nga na da ti vorongo Nzapa so azo aleke na ndö ti sese so.

²Ndali ni, azo aleke mbeni da ti bongo. Kozo ndo ti ya ti da ti bongo ni, a iri ni “ndo so ayeke nde si ayeke nzoni kue”. Na ndo ni so, ala zia gere ti alamba na meza daa, meza so mapa ti mungo na Nzapa ayeke na ndö ni.

³Na peko ti use ridoo ni, mbeni ndo ayeke daa so a iri ni “ndo so ayeke nde si ayeke nzoni kue ahon atanga ni”.

⁴Na ndo ni so, gbalaka ti zongo dukani ayeke daa so ala leke ni na lôro. Sanduku ti mbuki so ala leke tere ni kue na lôro ayeke nga daa. Ta ti lôro so *mane ayeke na ya ni, keke ti Aaron so akongo asigigi na tere ni nga na akpangbara têne so a su atënë ti mbuki na ndö ni ayeke na ya ti sanduku ni.

⁵Na ndö ti sanduku ni, limo ti *asheruben ayeke daa so afa atene, Nzapa ayeke na ndo so. Asheruben azi ya ti *akpangi ti ala na ndö ti *ye ti kangango na yanga ti sanduku ni. Me ndembe ni laa pepe titene mbi fa nda ti aye so oko oko kue fadeso.

⁶So a leke aye ni tongaso kue awe, awayango-sandaga ayeke li lakue na ya ti kozo ndo ni ti sara kua ti ala.

⁷Me zo so ayeke li na ya ti use ndo ni ayeke gi kota wayango-sandaga oko. Lo yeke li na ya ni gi fani oko na ya ti ngu oko. Tongana lo yeke li na ya ni, alingbi lo mu mene ti anyama ti mu na *sandaga na Nzapa ndali ti asiokpari ti lo wani, na pekoni, lo yeke mu sandaga ndali ti asiokpari so azo asara ni si ala hinga pepe so.

⁸Na lege so, Yingo-Vuru ayeke fa atene, so kozo da ti bongo ni angba so, lege ti si na use ndo ni ade ti zi pepe, ndo so ayeke nde si ayeke nzoni kue ahon atanga ni.

⁹Aye so kue ayeke fa na e ye na ndö ti ngoi so e yeke daa so: aye ni afa na e atene, aye so azo ayeke mu na Nzapa, wala asandaga ti anyama so ala yeke mu na lo, alingbi ti sara si be ti azo aga nzoni kue pepe, so ti tene be ti azo so ayeke voro Nzapa.

¹⁰Aye so kue ayeke gi asenge ndia ti azo, andia so ayeke na ndö ti tengo akobe, na nyongo ye, na tënë ti *sukulango asioni nde nde. Ndia so ayeke ngba ngbii asi na ndembe so Nzapa asara titene ye oko oko kue akiri aga fini ni.

¹¹Me Christ aga awe, lo yeke kota wayango-sandaga so ayeke mu na e anzoni ye so ayeke daa awe. Lo li na ya ti da ti bongo so ayeke kota ye mingi si ayeke nzoni kue ahon ti so azo aleke na ndö ti sese so. Maboko ti zo laa asara da ni pepe, so ti tene da so ayeke da ti ndö ti dunia so pepe.

¹²So Christ ali na ya ti da ti bongo ni, lo li fani oko biani biani na ndo so ayeke nde si ayeke nzoni kue ahon atanga ni. So lo li, lo ya mene ti angasa wala mene ti akete bagara pepe, me lo ya mene ti lo wani si lo zi e biani biani na ya ti asiokpari awe.

¹³Azo ayeke mu ando mene ti akoli-ngasa na ti akoli-bagara nga na mburu ti wâ ti wali-bagara so agbi lo, ala yeke tuku ni na tere ti azo so aga *sioni, ndali ti so azo ni asara mbeni ye so alingbi na tënë ti ndia pepe. Ala sara aye so kue ti sukula asioni ti azo ni, tongaso si azo ni akiri aga azo so alingbi ti voro Nzapa.

¹⁴Ye ni ayeke tongaso taa-tënë, me mene ti Christ ayeke na ngangu ti sara kua ahon ambeni ye so kue! Na lege ti Yingo so ayeke ngba kpu na kpu, Christ amu tere ti lo wani na sandaga na Nzapa, sandaga so sioni ye oko ayeke daa pepe. Mene ti lo ayeke sukula asioni so ayeke na be ti e si aye so ayeke gue na e na kuâ, fade e yeke kiri ti sara ni pepe, tongaso si e yeke sara kua ti Nzapa so ayeke na fini.

¹⁵Ndani laa, Christ ayeke zo ti lekengo songo na popo ti azo na Nzapa na lege ti mbeni fini mbuki. Azo so Nzapa airi ala alingbi ti wara anzoni ye so ayeke ngba ande lakue lakue, aye so Nzapa amu zendo ni. Azo ni so alingbi ti wara aye ni, ngbanga ti so Christ akui awe si na lege ti kuâ ti lo, azo so asara siokpari na ndembe so ala ngba na gbe ti kozo mbuki, lo lingbi ti zi ala na ya ti siokpari.

¹⁶Biani, tongana zo asu mbeti ti fa lege ti kangbingo ya ti aye ti lo na peko ti kuâ ti lo, alingbi zo ni akui awe si azo akangbi ya ti aye ti lo ni.

¹⁷Biani, tongana zo ni ade na fini, tënë ti ya ti mbeti ni ayeke na ngangu pepe; tënë ti ya ti mbeti ni ayeke na ngangu gi na peko ti kuâ ti lo.

¹⁸Ndani laa kozo mbuki ni ato nda ti wara ngangu gi na ndembe so mene ti nyama atuku.

¹⁹Moïse ato mbela ando na azo ti Israel na atënë ti ambela oko oko kue alingbi na ndia. Na pekoni, lo mu mene ti akete bagara na ti akoli-ngasa, lo mu nga ngu, kete keke ti *izope nga na ambeni bengba kua ti tere ti taba, lo yoro aye ni na ya ti mene ni si lo wani, lo fi na tere ti mbeti ti *Ndia nga na tere ti azo kue.

²⁰Lo tene: “Mene so afa atene, ala na Nzapa asara mbuki awe; lo mu yanga na ala ti bata lege ti mbuki ni.”

²¹Na pekoni, Moïse amu mene ni si lo fi na tere ti da ti bongo ni nga na tere ti akungba so kue ala mu ti sara na kua ti Nzapa.

²²Na lege ti ye so ndia afa, aye so a lingbi ti sukula asioni ni na mene pepe ayeke mingi pepe. Tongana mene atuku pepe, a lingbi ti zi siokpari na li ti azo pepe.

²³Aye so azo ayeke mu ti sara na kua na Nzapa ayeke tongana limo ti aye so ayeke na yayu. *Asandaga so e tene tënë ni so, alingbi fade ti mu ni ti *sukula asioni so ayeke na tere ti alimo ni; me ti ataa ye so ayeke na yayu, a yeke sukula ni gi na lege ti ambeni sandaga so ayeke nzoni ahon atanga ni kue.

²⁴Da ti Nzapa so azo aleke ni lani na maboko ti ala so, ayeke gi limo ti taa ndo ti nzoni kue. Da so azo aleke ni, ni laa Christ ali lani na ya ni pepe, me lo li na yayu si lo luti na le ti Nzapa ndali ti nzoni ti e.

²⁵Na ya ti ngu oko oko, kota wayango-sandaga ayeke mu mene ti anyama si lo yeke li na ni na da ti Nzapa. Me ti Christ, lo li na yayu pepe ti ka tere ti lo wani na kuâ fani mingi.

²⁶Tongana ye ni ayeke fade tongaso, ngbene ye so dunia abaa gigi, ka Christ abaa pasi fani mingi awe. Me so lango ti ndani aga nduru awe, Christ asi fani oko biani biani titene lo zi asiokpari ti azo na lege ti mene ti lo wani.

²⁷A diko na zo kue ti kui gi fani oko, na pekoni, Nzapa ayeke fâ ngbanga na li ti lo.

²⁸Legeoko nga, Christ amu tere ti lo na sandaga fani oko titene lo zi siokpari ti azo mingi. Ti fani use ni, lo yeke kiri ti ga ti zi siokpari ti azo pepe, me ti soo azo so kue ayeke ku lo.