Read La Bible en Sango courant – Mbeti ti Nzapa Jacques 1 Bible Online

Jacques 1 - La Bible en Sango courant – Mbeti ti Nzapa bible

Jacques 1

¹Mbi Jacques, zo ti kua ti Nzapa na ti *Kota Gbia Jésus Christ; mbi tokua mbeti so na amara baleoko na use ti azuife so akangbi na ya ti akodro nde nde. Mbi bara ala kue.

²A-ita ti mbi, ayeke nzoni be ti ala aduti na ngia na ya ti aye ti tarango be nde nde so ayeke si na ala.

³Ala hinga so, aye so ayeke tara mabe ti ala so asi na ala ti sara si ala hinga ti kanga be ti ala.

⁴Me alingbi kangango be ti ala ni aduti taa kangango be, tongaso si ala duti azo so ayeke nzoni kue, azo so alingbi si mbeni ye oko atia ala pepe.

⁵Tongana ndara atia mbeni zo na popo ti ala, ayeke nzoni lo hunda na Nzapa, fade Nzapa ayeke mu ni na lo. Biani, Nzapa ayeke mu ye na zo na nzoni be, lo yeke hunda yanga ti zo na peko ni pepe.

⁶Me alingbi zo ni ahunda ye ni na mabe, lo dekite pepe, ngbanga ti so zo so adekite akpa gi *mapo ti kota ngu-ingo so pupu ayeke mu ni na nduzu si ayeke yingi ni kirikiri.

⁷Mara ti zo tongaso, ayeke nzoni lo hinga lo tene, lo lingbi ti wara mbeni ye oko pepe na maboko ti *Kota Gbia.

⁸Lo yeke zo ti be use si lo hinga li ti lo na ye so lo ye ti sara pepe.

⁹Alingbi ita so ayeke wayere agonda tere ti lo, ngbanga ti so Nzapa azia lo na kota ndo.

¹⁰Alingbi ita so ayeke zo ti mosoro agonda tere ti lo, ngbanga ti so Nzapa akiri na lo na kete ndo. Biani, zo ti mosoro ayeke hon ande tongana kongo ti ngonda.

¹¹Lâ asigigi, asu ngangu si ahole pere ti kongo ni; kongo ni ati si pendere ni ahon. Ti zo ti mosoro ayeke nga gi tongaso: fade lo yeke kui si lo do akua ti lo ti zia.

¹²Ti lo nzoni, zo so akanga be ti lo ngangu na ya ti aye ti tarango be, ngbanga ti so tongana lo hon na ya ni awe, fade lo yeke wara futa; futa ni ayeke fini so Nzapa amu ando zendo ni na azo so aye lo.

¹³Tongana mbeni ye atara be ti zo, alingbi lo tene pepe: “Nzapa laa ayeke tara be ti mbi so”. Nzara ti sarango sioni ye ayeke gbu be ti Nzapa laoko pepe si Nzapa wani ayeke tara be ti zo oko pepe.

¹⁴Me gi nzara ti be ti zo wani laa ayeke tara be ti lo, ayeke gboto lo si ayeke handa lo.

¹⁵Tongana nzara ti be ti zo amu ngo awe, ayeke du siokpari. Tongana siokpari ni ahon ndoni awe, ayeke gue na zo na kuâ.

¹⁶A-ita ti mbi so mbi ye ala mingi, ala handa tere ti ala pepe.

¹⁷Nzoni ye so kue zo ayeke wara gi senge senge na matabisi so kue ayeke nzoni alondo na yayu, na maboko ti Nzapa, lo so lo sara ye so kue ayeke su na le ti nduzu. Lo yeke sanze pepe, lo yeke yingi pepe si vukongo ndo ayeke na mbage ti lo oko pepe, tongana lo turne tere ti lo.

¹⁸Tongana ti so be ti lo wani aye, lo mu na e fini na lege ti tënë ti lo so ayeke taa-tënë, tongaso si e ga tongana akozo zo ti lo na popo ti aye so kue lo sara.

¹⁹A-ita ti mbi so mbi ye ala mingi, ala dabe ti ala na tënë so: alingbi zo oko oko azi mê ti lo hio ti ma na tënë, me alingbi lo tene tënë hio hio pepe, lo sara ngonzo hio hio pepe.

²⁰Biani, zo so asara ngonzo ayeke sara ye ti mbirimbiri na le ti Nzapa pepe.

²¹Ndani laa, ala zia lege ti sarango aye ti potopoto kue nga na lege ti sarango sioni ye kue. Ala yeda na nzoni be na tënë so Nzapa alu na ya ti be ti ala, tënë ni alingbi ti soo ala.

²²Ala handa tere ti ala pepe: ala ma tënë ti Nzapa gi na mê pepe, me ala sara ye alingbi na ni.

²³Biani, zo so ama tënë ni si lo sara ye alingbi na ni pepe, lo yeke tongana zo so abaa le ti lo so a du lo na ni na ya ti tatara.

²⁴Na peko ti bango le ti lo ni, lo mu lege, lo hon si lo kiri lo girisa wala le ti lo ni ayeke tongana nyen.

²⁵Me zo so agi nda ti ndia mbirimbiri, ndia so ayeke nzoni kue si ayeke zi zo na gbe ti ngbaa, zo ni azia be ti lo kue na ndö ni, lo ma tënë ni si tënë ni ahuru mê ti lo pepe, me lo yeke sara ye alingbi na ni, fade lo yeke baa nzoni na lege ti aye ti lo so lo yeke sara.

²⁶Tongana mbeni zo atene na be ti lo atene, ni yeke voro Nzapa si lo bata yanga ti lo pepe, andaa lo yeke handa tere ti lo wani; vorongo Nzapa ti lo ni ayeke gi senge senge.

²⁷Mbirimbiri vorongo Nzapa so sioni ye oko ayeke daa pepe, ayeke mungo maboko na anyindu nga na awali-mua so ayeke baa pasi; mbirimbiri vorongo Nzapa ayeke nga ti ke sarango aye ti potopoto ti dunia so.