Read La Bible en Sango courant – Mbeti ti Nzapa Jacques 2 Bible Online

Jacques 2 - La Bible en Sango courant – Mbeti ti Nzapa bible

Jacques 2

¹A-ita ti mbi, ala ma na be awe na *Kota Gbia ti e Jésus Christ so e yeke gonda lo. Tongaso, ala ne ambeni zo ahon ambeni pepe.

²E mu mbeni tapande: mbeni zo ti mosoro ayu pendere bongo, bage ti lôro ayeke na maboko ti lo, lo ga lo li na ya ti bongbi ti ala si mbeni wayere so ayu gbagba bongo aga ali nga na ya ti bongbi ni.

³Tongana ala ne gi zo so ayu pendere bongo so si ala tene na lo: “Kota zo, mo ga, mo duti na ndö ti nzoni ngende so!” Na pekoni, ala tene na wayere ni: “Mo so, ngba ti mo na nduzu!” wala “Duti ge na sese, na tere ti mbata ti gere ti mbi!”

⁴So ala sara tongaso so, ala ne mbeni zo ahon mbeni pepe? Ala yeke na sioni tënë na be ti ala si ala yeke fâ na ngbanga pepe?

⁵A-ita ti mbi so mbi ye ala mingi, ala ma mbi si: Nzapa asoro azo so azo ti dunia so abaa ala tongana awayere titene ala ga azo ti mosoro na lege ti mabe si *Kodro-gbia so Nzapa amu zendo ni aga ti ala. Biani, lo mu zendo ni na azo so aye lo!

⁶Me ti ala, ala yeke baa awayere na le ti ala tongana abuba zo! A-ita, azo wa laa ayeke gboto ala na sese si ayeke gue na ala na gbe ti azo ti fango ngbanga? Azo ti mosoro pepe?

⁷Gi azo ti mosoro so laa ayeke he nzoni iri so Nzapa azia na ndö ti ala!

⁸Biani, ndia ti *Kodro-gbia ti Nzapa so Mbeti ti Nzapa atene tënë ni, atene: “Mo ye mba ti mo zo tongana ti so mo ye tere ti mo wani”, tongana ala sara ye alingbi na ni, so ayeke nzoni.

⁹Me tongana ala ne ambeni zo ahon ambeni, andaa ala sara siokpari awe. Ndia apika kate ti ala, ngbanga ti so ala sara ye so ndia ake ni.

¹⁰Tongana mbeni zo asara aye so kue ndia atene tënë ni, me lo buba lege ti mbeni tënë ti ndia ni oko, andaa ngbanga ti tanga ti ndia ni kue ayeke na li ti lo.

¹¹Biani, Nzapa so atene: “Mo gi wali wala koli ti zo pepe”, gi lo laa lo tene: “Mo fâ zo pepe.” Nilaa tongana mo gi wali wala koli ti zo pepe si mo fâ zo, andaa mo buba lege ti atënë ti ndia kue awe.

¹²A-ita, ala tene tënë, ala sara nga ye tongana ti azo so ahinga atene, Nzapa ayeke fâ ande ngbanga ti ala na lege ti ndia so ayeke zi zo na gbe ti ngbaa.

¹³Biani, zo so abaa mawa ti mba ti lo pepe, tongana Nzapa ayeke fâ ande ngbanga ti azo, lo yeke baa nga mawa ti zo ni pepe; me zo so abaa mawa ti mba ti lo, fade lo yeke sigigi na ya ti ngbanga.

¹⁴A-ita ti mbi, tongana mbeni zo atene, ni yeke na mabe si lo sara mbeni ye ti fa ni pepe, mabe ti lo ni ayeke sara nyen na lo? Mabe so alingbi ti soo lo?

¹⁵Tongana mbeni ita ti koli wala ti wali ayeke na bongo ti yungo ni pepe wala kobe ti tengo ni pepe

¹⁶si mbeni zo oko na popo ti ala atene na ita ni: “Gue nzoni! Mo duti na tere ti wâ, mo te kobe, ya ti mo asi!” Me, ye so lo lingbi fade ti wara ndali ti fini ti lo, ala mu ni na lo pepe, asenge senge tënë ti ala so asara nyen?

¹⁷Tënë ti mabe ayeke nga gi tongaso. Tongana zo ayeke na mabe, me lo sara kua ni pepe, andaa mabe ti lo ni akui awe.

¹⁸Me fade mbeni zo ayeke tene: “Ti mo, mo yeke na mabe, ti mbi, mbi yeke sara akua!” Tongaso, mbi yeke kiri tënë na lo, mbi tene: “Fa na mbi lege so mabe ti mo alingbi ti duti daa, me mo yeke sara akua ni pepe so. Ti mbi, fade mbi yeke fa na mo mabe ti mbi na lege ti akua so mbi yeke sara.”

¹⁹Mo ma na be so Nzapa ayeke gi oko? So nzoni. Asioni yingo nga ama na be so lo yeke gi oko si tere ti ala yeke do.

²⁰Mo so li ti mo ayeke daa pepe so, tongana mbeni zo ayeke na mabe si kua ni ayeke daa pepe, mabe ti lo ni ayeke gi senge senge; mo ye mbi fa na mo?

²¹Kotara ti e Abraham aga ando mbirimbiri na le ti Nzapa tongana nyen? Lo ga ando mbirimbiri na le ti Nzapa ngbanga ti ye so lo sara: lo mu molenge ti lo Isaac, lo zia na ndö ti gbalaka ti *sandaga.

²²Mo baa, mabe ti lo na sarango ye ti lo ayeke sara gi kua oko! Ye so lo sara laa asara si mabe ti lo aga nzoni kue.

²³Ye so asi alingbi na tënë so Mbeti ti Nzapa atene: “Abraham ama na be na Nzapa, tongaso Nzapa abaa lo tongana zo ti mbirimbiri”. Nzapa airi lo kamarade ti ni.

²⁴Ala baa, zo ayeke ga mbirimbiri na le ti Nzapa na lege ti sarango akua, me gi na lege ti mabe oko pepe.

²⁵Tënë so ayeke nga tongana ti Rahab, wali-ndumba so. Lo ga ando mbirimbiri na le ti Nzapa na lege ti kua so lo sara: azuife so a tokua ala, ague, asi na ndo ti lo si lo yamba ala. Na pekoni, lo mu maboko na ala ti mu mbeni lege nde ti hon.

²⁶Tongana zo ayeke wu pepe, andaa lo kui awe. Legeoko nga, zo so ayeke na mabe, me lo yeke sara kua ni pepe, andaa mabe ti lo akui awe.