Read La Bible en Sango courant – Mbeti ti Nzapa Jacques 4 Bible Online

Jacques 4 - La Bible en Sango courant – Mbeti ti Nzapa bible

Jacques 4

¹Atiri na apapa so ayeke na popo ti ala so alondo na ndo wa? Alondo gi na lege ti anzara ti be ti ala so ayeke tiri lakue na ya ti tere ti ala.

²Ala yeke sara nzara ti warango aye, me ala wara ni pepe. Tongaso ala ye ti fâ zo. Kota be ayeke sara ala, me ala lingbi ti wara ye so ala yeke sara nzara ni pepe, nilaa ala yeke papa, ala yeke tiri na popo ti ala. Ye so be ti ala aye, ala wara ni pepe, ngbanga ti so ala hunda na Nzapa pepe.

³Tongana ala hunda mbeni ye, ala yeke wara ni pepe, ngbanga ti so ala hunda na legeni pepe, me ala hunda ni ti buba gi na lege ti anzara ti be ti ala.

⁴Ala so ado lege ti Nzapa azia so! Ala hinga pepe? Zo so aye tënë ti aye ti dunia so, andaa lo ke Nzapa awe; zo so aye tënë ti aye ti dunia so, andaa lo ga wato ti Nzapa awe.

⁵Tënë so Mbeti ti Nzapa atene: “Yingo so Nzapa azia na ya ti e, lo ye ni ngangu mingi”, ala baa ni tongana senge senge tënë pepe.

⁶Me Nzapa akiri asara na e nzoni be mingi ahon ti so. Biani, Mbeti ti Nzapa atene: “Nzapa ake tënë ti azo ti baba, me lo yeke sara nzoni be na azo so asara tere ti ala kete.”

⁷Tongaso, ala ma yanga ti Nzapa, me ala do sese na Zabolo si fade lo yeke kpe yongoro na tere ti ala!

⁸Ala ga nduru na Nzapa si fade lo yeke ga nduru na ala. Azo ti siokpari, ala *sukula sioni ti ala! Azo ti be use use, ala zi aye ti sioni na be ti ala!

⁹Ala duti na vundu, ala dema tere ti ala, ala toto maa! Ala zia ti he ngia si ala toto, ala zia lege ti ngia si ala duti na vundu!

¹⁰Ala sara tere ti ala kete na gbe ti *Kota Gbia si fade lo yeke mu ala na nduzu.

¹¹A-ita, ala tene sioni tënë na iri ti amba ti ala pepe! Zo so atene sioni tënë na iri ti mba ti lo wala lo fâ ngbanga na li ti lo, andaa lo tene sioni tënë na ndö ti ndia, lo fâ nga ngbanga na li ti ndia awe. Tongana mo fâ ngbanga na li ti ndia, andaa ye so ndia ahunda na mo ti sarango ni, mo yeke sara ni pepe, me mo ga zo ti fango ngbanga na li ti ndia awe.

¹²E hinga so gi Nzapa oko laa aleke ndia, lo yeke nga wafango-ngbanga. Lo laa lo lingbi ti soo zo, lo lingbi nga ti sara si zo akui. Mo so mo yeke fâ ngbanga na li ti mba ti mo so, mo yeke ti mo zo wa?

¹³Fadeso, ala ma si, ala so ayeke tene: “Laso wala kekereke e yeke gue na gbata tongaso, e yeke sara ngu oko kâ, e yeke de buze si e yeke wara nginza mingi.”

¹⁴Ala hinga ye so ayeke si na gigi ti ala ti kekereke? Ala yeke gi tongana guru so asigigi na le ti ngu si kete na pekoni ahon.

¹⁵Tënë so ala lingbi fade ti tene ayeke so: “Tongana *Kota Gbia ayeda si e ngba na fini, fade e yeke sara ye tongaso, wala ye tongaso.”

¹⁶Me fadeso, ala yeke pika kate ti ala si ala yeke gonda tere ti ala. Mara ti pikango kate tongaso ayeke nzoni pepe.

¹⁷Tongaso, zo so ahinga ti sara nzoni ye si lo sara ni pepe, andaa lo sara siokpari awe.