Read La Bible en Sango courant – Mbeti ti Nzapa Jacques 5 Bible Online

Jacques 5 - La Bible en Sango courant – Mbeti ti Nzapa bible

Jacques 5

¹Ala azo ti mosoro, ala ma si! Ala dekongo, ala toto ndali ti pasi so ayeke ga ande na ndö ti ala!

²Amosoro ti ala afun kue awe si akangi ate abongo ti ala kue awe.

³*Soko amu tere ti lôro ti ala na nginza ti ala kue awe, soko ni laa ayeke bi ande tënë na li ti ala; ayeke te tere ti ala tongana ti so wâ ayeke gbi ye. Lango ti ndani aga nduru awe si ala ngba ti ala ti bongbi amosoro na ndö ni na ndö ni!

⁴Ala baa, azo so ayeke sara kua ti fango ale ti kobe ti ayaka ti ala, ala ke ti futa nginza ti ala na ala. Mbana ti ala ni ayeke dekongo! Dekongo ti azo ti fango ale ti kobe ti ala ni asi na mê ti *Kota Gbia so ayeke na ndö ti dunia kue.

⁵Na sese so, ala duti na ya ti mosoro mingi si ala duti gi na ngia. Ala te ye, ala kono kirikiri tongana abagara so aku lango ti fango ala.

⁶Zo so asara ye ti sioni pepe, ala fâ ngbanga na li ti lo si ala fâ lo; me lo wara ngangu ti zi yanga ti lo na ala oko pepe.

⁷A-ita, ala kanga be ti ala ti ku lango ti gango ti *Kota Gbia. Ala baa zo ti fango yaka: lo yeke kanga be ti lo ti ku anzoni kobe ti yaka ti lo, lo yeke ku ngbii akozo ngu-Nzapa na angu ti ndani apika si.

⁸Ala nga, ala kanga be ti ala ti ku, ala gbu ngangu, ngbanga ti so lango ti gango ti Kota Gbia aga nduru awe.

⁹A-ita, ala dema na iri ti amba ti ala pepe, tongaso si Nzapa afâ ngbanga na li ti ala pepe. Ala baa, wafango-ngbanga ayeke luti na yanga ti da!

¹⁰A-ita, tongana ayeke tënë ti pasi na kangango be na ya ti pasi, ala mu gi tapande ti awayanga-Nzapa so atene tënë na iri ti Kota Gbia ando so.

¹¹Ala baa, azo so akanga be ti ala na ya ti aye ti pasi so, e tene: ti ala nzoni! Ala ma tënë ti kangango be ti Job awe, ala baa ye so Kota Gbia amu na lo na pekoni, ngbanga ti so Kota Gbia ayeke na nzoni be mingi si lo yeke baa mawa ti azo.

¹²Gi ye oko, a-ita ti mbi, alingbi ala deba na iri ti yayu, wala na iri ti sese, wala na iri ti mbeni ye pepe. Me tongana ala yeda na mbeni tënë, ala tene gi “een, mbi yeda”; tongana ala ke mbeni tënë, ala tene “ên-en, mbi ke”. Tongaso si ala ti na gbe ti ngbanga ti Nzapa pepe.

¹³Mbeni zo na popo ti ala ayeke baa pasi? Alingbi lo sambela Nzapa. Mbeni zo ayeke na ngia? Alingbi lo he bia ti gonda Nzapa.

¹⁴Mbeni zo na popo ti ala ayeke na kobela? Alingbi lo iri *akangba ti *Eglize; fade ala yeke sara mafuta na tere ti lo na iri ti Kota Gbia, ala sambela na ndö ti lo.

¹⁵Tongana ala sambela na mabe, sambela ni ayeke soo zo ti kobela ni; Kota Gbia ayeke mu lo na nduzu. Tongana zo ni asara siokpari, Nzapa ayeke zi ni na li ti lo.

¹⁶Ala fa siokpari ti ala na gigi na amba ti ala, ala sambela ndali ti amba ti ala si kobela ti ala akai. Sambela ti zo ti mbirimbiri ayeke na ngangu mingi ti sara ye.

¹⁷Élie ayeke ando zo tongana e: lo sambela ngangu titene ngu apika pepe si na ya ti ngu ota na nze omene, ngu apika na ndö ti sese pepe.

¹⁸Na pekoni, lo kiri lo sambela si ngu apika, sese adu ale ti kobe.

¹⁹A-ita ti mbi, tongana mbeni zo na popo ti ala agirisa lege ti taa-tënë, mbeni mba ti lo alingbi ti kiri na lo daa.

²⁰Alingbi ala hinga atene, zo so agboto zo na sioni lege ti siokpari si akiri na lo na nzoni lege, fade lo yeke sara titene zo ni asoo kuâ; lo yeke sara nga titene Nzapa azi gba ti asiokpari so ayeke na li ti zo ni.