Read La Bible en Sango courant – Mbeti ti Nzapa 1 Pierre 3 Bible Online

1 Pierre 3 - La Bible en Sango courant – Mbeti ti Nzapa bible

1 Pierre 3

¹Awali, ala nga, ala ma yanga ti akoli ti ala. Tongaso, fade ambeni koli so ake ti ma na be na tënë ti Nzapa alingbi ti ma na be ndali ti sarango ye ti ala. Ataa so ala, awali ni, ala tene tënë ti Nzapa na akoli ti ala pepe,

²akoli ni ayeke baa gi sarango ye ti ala so ayeke *nzoni nga na nengo so ala, awali ni ayeke ne tere ti ala.

³Awali, ala gi ti ga pendere pepe na lege ti aye so zo ayeke baa ni bango: kangango kua ti li ti ala na kode ahon ndoni, yungo aye ti pendere nde nde ti lôro, yungo abongo ti kota ngere.

⁴Me ala gi ti ga pendere na be ti ala. Aye ti pendere ni ayeke be so aduti kpoo, aduti na siriri si ane mingi na le ti Nzapa; aye ti pendere so laa ayeke buba pepe.

⁵Na lege so laa awali so ando ayeke nde si ayeke nzoni kue, ala so azia be ti ala na Nzapa, asara ti ga pendere; ala yeke ma yanga ti akoli ti ala.

⁶Mbeni tapande ni ayeke ti Sara so ama yanga ti Abraham si lo iri Abraham, atene: “Gbia ti mbi”. Ala awali ti laso, tongana ala sara nzoni ye si mbeto ti mbeni ye asara nga ala pepe, ala ga amolenge ti Sara awe.

⁷Akoli, ala nga, na dutingo so ala na awali ti ala ayeke duti, ayeke nzoni ala hinga so, awali ti ala ayeke tongana ta so akpengba pepe. Ala ne ala, ngbanga ti so ala, na awali ti ala kue laa ayeke wara nzoni ye so Nzapa ayeke mu na zo; nzoni ye ni ayeke dutingo na fini. Ala sara tongaso si mbeni ye akanga lege na sambela ti ala pepe.

⁸Ti hunzi na tënë ti mbi, alingbi ala kue tënë ti be ti ala aduti gi oko; ala baa mawa ti amba ti ala, ala ye tere na popo ti ala tongana a-ita, ala sara nzoni na amba ti ala, ala baa tere ti ala tongana akota zo pepe.

⁹Ala kiri sioni ndali ti sioni pepe, ala kiri zonga ndali ti zonga pepe. Me ala sara tufa na ndö ti azo, ngbanga ti so Nzapa airi ala ndali ni, tongaso si fade Nzapa ayeke sara tufa na ndö ti ala.

¹⁰Biani, Mbeti ti Nzapa atene: “Zo so aye tënë ti gigi ti lo si lo ye nga ti duti nzoni, alingbi lo bata yanga ti lo na sioni tënë, lo bata yanga ti lo na atënë ti mvene;

¹¹lo zia ti sara sioni ye si lo sara nzoni ye; lo gi lege ti siriri, lo ngba daa.

¹²Biani, le ti *Kota Gbia ayeke na ndö ti azo ti mbirimbiri, mê ti lo ayeke ma sambela ti ala; me ti azo so ayeke sara ye ti sioni, Kota Gbia ayeke londo ti ke ala.”

¹³Tongana ala mu be ti ala kue ti sara nzoni ye, zo wa laa alingbi ti sara ye ti sioni na ala, zo wa?

¹⁴Gi so oko pepe, me ti ala nzoni, tongana ala baa pasi ndali ti ye ti mbirimbiri so ala sara! Ala sara mbeto ti azo so pepe, be ti ala agi ala pepe!

¹⁵Na be ti ala, ala ne Christ, *Kota Gbia ti ala. Ala duti lakue nduru ti kiri tënë na azo so ayeke hunda na ala tënë na ndö ti ye so ala zia be ti ala ti ku.

¹⁶Ala kiri tënë na azo ni na ngangu pepe, ala ne azo ni. Alingbi mbeni sioni ye oko aduti na be ti ala pepe. Tongaso, taa ye so azo ayeke bi tënë na li ti ala senge senge ndali ni, kamene ayeke gbu azo so atene sioni tënë na tere ti ala ndali ti nzoni dutingo ti ala oko na Christ.

¹⁷Tongana Nzapa aye titene ala baa pasi ndali ti sarango nzoni ye, so laa ayeke nzoni ahon titene ala baa pasi ndali ti sarango sioni ye.

¹⁸Biani, Christ wani akui fani oko biani biani ndali ti siokpari ti azo; lo so lo yeke mbirimbiri, lo kui ndali ti azo ti kirikiri titene lo gue na ala na le ti Nzapa. Azo afâ gi tere ti lo ti zo, me Nzapa akiri na lo na fini na lege ti Yingo-Vuru.

¹⁹Na lege ti Yingo so laa Christ ague, afa Nzoni Tënë na ayingo so ayeke na kanga,

²⁰so ti tene lo gue, lo fa tënë na ayingo ti azo so ake ando yanga ti Nzapa na ngoi so Noe aleke mangboko. Na ndembe so Nzapa akanga be ti lo ti ku titene ala kiri na be ti ala na lo, gi azo miombe senge laa ali na ya ti mangboko si na lege ti ngu, Nzapa asoo ala.

²¹So ayeke limo ti bateme so ayeke soo ala fadeso. Bateme ni ayeke ye ti sukulango zende na tere ti zo pepe, me ayeke ti hunda na Nzapa titene mbeni ye ti sioni aduti na be ti zo ni pepe. Bateme ni ayeke soo ala na kuâ, ngbanga ti so Jésus Christ azingo na kuâ awe.

²²Lo gue na yayu, lo duti na tere ti Nzapa na mbage ti maboko ti lo ti koli si *a-ange, ayingo so ayeke na komandema na ala so ayeke na ngangu ayeke na gbe ti lo.