Read La Bible en Sango courant – Mbeti ti Nzapa Awafango-ngbanga 19 Bible Online

Awafango-ngbanga 19 - La Bible en Sango courant – Mbeti ti Nzapa bible

Awafango-ngbanga 19

¹Na ngoi ni so, gbia ayeke na Israel pepe. Mbeni zo ti mara ti Lévi ayeke daa, lo lango tongana gene na mbeni ndo yongoro na sese ti Efraim, ndo so ahoto ayeke daa. Lo mu mbeni wali na gbata ti Betlehem, na sese ti Juda.

²Wali ti lo ni apapa na lo si lo kiri na ndo ti babâ ti lo na Betlehem; lo ngba kâ nze osio.

³Koli ti lo alondo, ague na peko ti lo ti de be ti lo ti kiri na lo. Koli ni amu zo ti kua ti lo na alele use si ala gue. Wali ni amu lo ali na lo na ya ti da ti babâ ti lo; so babâ ti wali ni abaa koli ni, babâ ni ayamba lo na ngia.

⁴Kogara ti lo agbanzi lo si lo sara lango ota na ndo ti lo. Ala te, ala nyon si ala ngba alango gi na ndo so.

⁵Na lango osio ni, so ndo angba kâ, ala londo ti gue. Me babâ ti wali ni atene na koli ti molenge ti lo, atene: “Te ye kete mo wara ngangu si fade ala gue.”

⁶Tongaso akoli use so aduti, ala te si ala nyon. Na pekoni, babâ ti wali ni atene na zo ti mara ti Lévi ni, atene: “Yeda, mo ngba mo lango ge na bi so, be ti mo awara ngia si!”

⁷Koli ni alondo ti gue, me kogara ti lo ahara yanga na lo ngbii, lo ngba lo lango.

⁸Na lango oku ni, so ndo angba kâ, lo londo ti gue. Me kogara ti lo atene na lo: “Mbi gbu gere ti mo, te ye, mo wara ngangu si. Ala ku asi na peko ti bekombite si fade ala gue.” Tongaso ala use kue aduti ate ye.

⁹Koli ni alondo ti gue, lo na wali ti lo na zo ti kua ti lo. Me kogara ti lo atene na lo: “Baa, lâ akui awe si ndo aga nduru ti vuko awe. Ngba mo lango, be ti mo awara ngia si. Kekereke na kota ndaperere, ala mu lege ti kiri na ndo ti ala senge.”

¹⁰Ti so ni, koli ni ake; lo londo lo gue, lo na wali ti lo, na alele ti lo use so a zia aye ti dutingo na ndö ti ala. Ala gue ngbii, ala si nduru na gbata ti Yebus, so ti tene Jérusalem.

¹¹So ala si nduru na gbata ni, andaa lâ akui awe. Zo ti kua ni atene na wa ti lo, atene: “Kota zo, ayeke nzoni e gue na gbata ti azo ti Yebus so, e lango kâ.”

¹²Kota zo ti lo ni akiri tënë na lo: “E lingbi ti luti na kodro ti awande pepe. Ge so mbeni zo ti mara ti Israel ayeke daa pepe; e gue na gbata ti Gibea, e lango kâ.”

¹³Lo kiri lo tene na zo ti kua ti lo: “E gi lege ti si na gbata ti Gibea wala ti Rama, e lingbi ti lango na ya ti mbeni gbata ni oko.”

¹⁴Ala tambula ngbii, ndo ato nda ti vuko si ala si nduru na Gibea, na sese ti Benjamin.

¹⁵Ala hon gi kete ala si na Gibea titene ala lango kâ. So ala li na ya ti kodro ni awe, ala duti gi na be ti kodro ni. Zo oko ti yamba ala na da ti lo ayeke daa pepe.

¹⁶Na lakui ni, mbeni mbakoro-koli alondo na yaka si lo yeke kiri na kodro. Koli ni ayeke zo ti Efraim, ndo so ahoto ayeke daa; lo yeke lango tongana gene na Gibea. Azo ti gbata ni ayeke ti ala azo ti mara ti Benjamin.

¹⁷Koli ni ayo le ti lo na nduzu, lo baa gene so ayeke duti na ndo so azo ayeke bongbi tere ti ala daa na ya ti gbata ni. Mbakoro-koli ni ahunda lo, atene: “Mo londo na ndo wa? Mo yeke gue na ndo wa?”

¹⁸Zo ti mara ti Lévi ni akiri tënë na lo: “E londo na Betlehem, na sese ti Juda, e yeke gue na mbeni yongoro ndo, na sese ti Efraim, ndo so ahoto ayeke daa. Ndo ti mbi ayeke kâ. Mbi gue lani na Betlehem, na sese ti Juda. Fadeso mbi yeke gue na da ti KOTA GBIA; me zo oko ayamba mbi na da ti lo pepe.

¹⁹Andaa e yeke na pere na kobe ti tengo ni ndali ti alele ti e, e yeke nga na kobe na vin ndali ti mbi, wali ti mbi na zo ti kua ti mbi. Ye oko atia e pepe.”

²⁰Mbakoro-koli ni atene na lo: “Duti kpoo! Fade mbi yeke baa lege ti aye so kue alingbi ti tia mo; me mo lango na gigi pepe!”

²¹Koli ni ague na ala na da ti lo; lo mu kobe na alele ni. Agene ni asukula gere ti ala, ala te, ala nyon.

²²So ala ngba ti te, ti nyon, akoli ti gbata ni na agodobe aga si ala ngoro da ni kue. Ala pika yanga ti da ni ngangu si ala tene na mbakoro-koli ni so ayeke wa ti da ni, atene: “Sigigi na koli so ayeke na ya ti da ti mo so. E ye ti lango na lo.”

²³Wa ti da ni asigigi si atene na ala: “A-ita ti mbi, mbi gbu gere ti ala, ala sara sioni tongaso pepe! Koli so aga gene na da ti mbi awe. Ala lingbi ti sara sioni ye tongaso na lo pepe.

²⁴Baa, mbeni molenge ti mbi ti wali ayeke daa, ade lo hinga koli pepe; gene ni ayeke nga na mbeni wali ti lo. Mbi yeke sigigi na ala, ala lingbi ti sara ye so kue be ti ala aye na ala. Me ala sara ye ti buba na koli so pepe.”

²⁵Me azo ni ake ti ma tënë ti lo. Tongaso, zo ti mara ti Lévi ni agbu wali ti lo, asigigi na lo na ala. Ala lango na wali ni, ala sara ye ti be ti ala na lo ngbii asi na ndaperere. So ndo ato nda ti han, ala do lo azia.

²⁶So ndo aga nduru ti han, wali ni aga ati na sese na yanga ti da ti mbakoro-koli ni, ndo so koli ti lo alango daa so. Lo ngba na ndo so ngbii lâ asigigi.

²⁷Na ndaperere, koli ni alondo azi yanga ti da, lo sigigi titene lo mu lege ti gue. Lo baa wali ti lo so ayeke lango na sese na yanga ti da, amaboko ti lo ayeke na ndö ti keke ti yanga ti da ni.

²⁸Koli ni atene na lo: “Londo, e gue!” Me ndo ade ngii; wali ni akiri tënë oko pepe. Koli ni azia kuâ ti wali ti lo na ndö ti lele ti lo si lo mu lege ti gue na ndo ti lo.

²⁹So lo si na da awe, lo mu zeme si lo fâ ya ti kuâ ti wali ni na ndo so abio atengbi tere daa alingbi baleoko na use. Lo tokua kasa oko na amara ti Israel oko oko kue.

³⁰Azo so kue abaa ye so, atene: “Ti londo na ndembe so azo ti Israel alondo na sese ti Ezipte asigigi ngbii asi laso, zo ade ti baa mara ti ye so laoko pepe! Ye tongaso ade ti si laoko pepe! Ayeke nzoni ala gi nda ti tënë ni, ala ma tere si ala fa ye so ala lingbi ti sara.”