Read La Bible en Sango courant – Mbeti ti Nzapa Awafango-ngbanga 7 Bible Online

Awafango-ngbanga 7 - La Bible en Sango courant – Mbeti ti Nzapa bible

Awafango-ngbanga 7

¹Na ndaperere, so ndo angba kâ, Gédéon so a iri nga lo Yerubaal alondo, lo na aturugu ti lo kue si ala gue, asara bâbâ ti ala nduru na li ti ngu ti Harod. Bâbâ ti aturugu ti Madian ayeke na mbage ti Banga, na lando ti More.

²*KOTA GBIA atene na Gédéon: “Aturugu so mo yeke na ni awu mingi, lege titene mbi zia azo ti Madian na maboko ti ala ayeke daa pepe, ndali ti azo ti Israel agonda tere ti ala atene: ‘Ngangu ti e laa asoo e!’

³Gue mo tene tënë na azo ti mo, mo tene: ‘Azo so kue ayeke do na mbeto, ayeke nzoni ala londo na hoto ti Galaad, ala kiri na kodro.’ ” Azo saki baleuse na use na popo ti ala alondo si akiri na kodro, gi azo saki baleoko laa angba.

⁴KOTA GBIA atene na Gédéon: “Azo ni angba ti wu mingi! Mo zu na ala na yanga ti ngu; kâ, mbi yeke soro ya ti ala na mo. Zo so mbi yeke tene lo gue na mo, lo yeke gue na mo; zo so mbi yeke tene lo gue na mo pepe, lo yeke gue pepe.”

⁵Tongaso, Gédéon amu azo ni si azu na ala na yanga ti ngu. KOTA GBIA atene na Gédéon: “Azo so kue ayeke nyon ngu na menga ti ala tongana mbo, fade mo yeke zia ala na mbage; ala so kue ayeke kuku kukungo na sese ti nyon ngu, mo yeke zia nga ala na mbage.”

⁶Wungo ti azo so kue ato ngu na maboko ti ala si anyon ni na menga ti ala ayeke ngbangbo ota. Tanga ti azo ni kue akuku kukungo na sese ti nyon ngu ni.

⁷KOTA GBIA atene na Gédéon: “Na lege ti azo ngbangbo ota so anyon ngu na menga ti ala so laa mbi yeke soo azo ti Israel; na lege ti azo ni, mbi yeke zia azo ti Madian na maboko ti ala, azo ti Israel. Ayeke nzoni tanga ti azo ni kue akiri na ndo ti ala.”

⁸Gédéon amu lege na tanga ti azo ti Israel ti kiri na ndo ti ala; lo bata gi azo ngbangbo ota so na tere ti lo. Me ala mu gi akobe na atatalita ti azo so ayeke kiri na ndo ti ala so. Bâbâ ti azo ti Madian ayeke na mbage ti gbeni, na lando.

⁹Gi na bi ni so, *KOTA GBIA atene na Gédéon: “Londo, mo li na ya ti bâbâ ti azo ti Madian ti sara bira, ngbanga ti so mbi zia ala na maboko ti mo awe.

¹⁰Tongana mbeto ti guengo ni asara mo, mo mu Pura, zo ti kua ti mo si mo na lo ague.

¹¹Fade mo yeke ma atënë so azo ni ayeke tene. Tongaso si mo yeke wara ngangu ti gue ti sara bira na ala.” Gédéon na zo ti kua ti lo Pura amu lege ague ngbii, ala si na yanga ti bâbâ ti azo ti Madian.

¹²Azo ti Madian, azo ti Amalek na ambeni mara ti mbage ti To amu ya ti lando ni gbani gbani tongana angadi; wungo ti *azambala ti ala ayeke tongana wungo ti mbutu ti yanga ti kota ngu-ingo.

¹³So Gédéon asi awe, andaa mbeni koli ayeke tene peko ti mbeni bango-li na mba ti lo, atene: “Mbi baa li ti mbi si mapa so asara na *orze arule na ya ti bâbâ ti azo ti Madian; mapa ni ague ngbii akpo mbeni da ti bongo si da ni ati kue na sese.”

¹⁴Mba ti koli ni atene na lo: “Gbaa ye so mo baa so ayeke yongoro zeme ti Gédéon, molenge ti Yoash, zo ti Israel so laa. Nzapa azia azo ti Madian na bâbâ ti ala kue na maboko ti lo awe.”

¹⁵So Gédéon ama tënë ti bango-li so nga na nda ni kue awe, lo kuku, lo kpo li ti lo na sese ti mu singila na Nzapa. Na pekoni, lo kiri na ya ti bâbâ ti azo ti Israel si lo tene: “Ala londo! Baa, KOTA GBIA azia bâbâ ti azo ti Madian na maboko ti ala awe!”

¹⁶Gédéon akangbi azo ngbangbo ota so na ya ti bongbi ota. Lo mu na zo oko oko tatalita, ta so ya ni ayeke senge nga na *tanda so ayeke na ya ti ta ni.

¹⁷Lo tene na azo ni: “Fade ala yeke baa gi mbi si ala yeke sara gi ye so mbi yeke sara. Tongana mbi si na yanga ti bâbâ ti azo ti Madian, ye so mbi yeke sara, ala nga, ala sara gi ni.

¹⁸Tongana mbi huru tatalita, mbi na azo so aga na peko ti mbi, fade ala nga, ala huru tatalita angoro tere ti bâbâ ni kue, ala dekongo atene: ‘Ndali ti *KOTA GBIA! Ndali ti Gédéon!’ ”

¹⁹Gédéon na azo ngbangbo oko so ayeke na tere ti lo asi na yanga ti bâbâ ti azo ti Madian nduru na be ti bi. Andaa a zi asanziri ni awe si ambeni nde laa aga. Gédéon na azo ti lo ahuru tatalita si ala fâ ya ti ata so ayeke na maboko ti ala.

²⁰Ambeni bongbi use so ahuru nga tatalita si ala fâ ya ti ata ti ala. Ala gbu atanda na mbage ti maboko ti ala ti wali, atatalita na mbage ti maboko ti ala ti koli, ala dekongo atene: “E londo na bira ndali ti KOTA GBIA! Ndali ti Gédéon!”

²¹Ala luti angoro tere ti bâbâ ni kue, zo oko oko na ndo so a zia lo daa. Me azo so ayeke na ya ti bâbâ ni alondo ti kpe, ala dekongo si ala kpe kirikiri.

²²Na ndembe so azo ngbangbo ota so angba ti huru tatalita, KOTA GBIA asara si azo ti ya ti bâbâ ni kue alondo ti fâ tere na yongoro zeme. Ala so angba so akpe ngbii, ala si na Bet-Shita so ayeke na lege ti guengo na Sereda; ala kpe nga na gbata ti Abel-Mehola so ayeke nduru na Tabat.

²³Tongaso, a iri azo ti Israel so ayeke ti mara ti Neftali, ti Aser na ti Manase kue ti ga si ala tumba peko ti azo ti Madian.

²⁴Gédéon atokua azo na sese ti Efraim, ndo so ahoto ayeke daa; lo tene: “Ala kue azu, ala gue, akanga lege na azo ti Madian, ti londo na ando so ayeke fâ ngu ti Jourdain daa na gere, ngbii asi na Bet-Bara.” Azo ti Efraim abongbi tere si ala gue, akanga lege na azo ti Madian na ando so ayeke fâ ngu ti Jourdain daa na gere, ngbii asi na Bet-Bara.

²⁵Ala gbu amakonzi use ti azo ti Madian, Oreb na Zeb; ala fâ Oreb na tere ti têne ti Oreb, ala fâ Zeb na tere ti du so a yeke pete ale ti *vinye daa; a iri du ni Ti-Zeb. Ala zia tumbango peko ti azo ti Madian pepe. Ala mu li ti Oreb na ti Zeb, ala gue na ni na Gédéon kâ na mbage ti ngu ti Jourdain.