Read La Bible en Sango courant – Mbeti ti Nzapa Awafango-ngbanga 8 Bible Online

Awafango-ngbanga 8 - La Bible en Sango courant – Mbeti ti Nzapa bible

Awafango-ngbanga 8

¹Azo ti Efraim atene na Gédéon: “Mo sara mara ti ye tongaso na e ngbanga ti nyen? Na guengo ti mo ti sara bira na azo ti Madian, mo iri e ti mu maboko na mo pepe ngbanga ti nyen?” Ala suku na lo ngangu mingi.

²Gédéon akiri tënë na ala, atene: “Kua so mbi sara alingbi na kua so ala sara? Kua so ala, azo ti mara ti Efraim asara ayeke kota mingi ahon kua so azo ti kete mara ti mbi, mara ti Abiezer asara!

³Nzapa azia amakonzi ti Madian, Oreb na Zeb na maboko ti ala. Kua so mbi sara alingbi na ti ala lawa!” Na peko ti tënë so, be ti azo ti Efraim ade.

⁴Gédéon na azo ngbangbo ota so ayeke na tere ti lo asi na ngu ti Jourdain si ala fâ ngu ni. Ataa so ala woko kue, ala ngba ti tumba peko ti awato ti ala.

⁵So ala si na gbata ti Sukot, Gédéon atene na azo ti gbata ni: “Mbi gbu gere ti ala, ala mu kobe ti tengo ni na azo ti mbi so! Baa, ala woko kue awe. Mbi ngba ti tumba peko ti agbia ti Madian, Zeba na Salmuna.”

⁶Me amakonzi ti gbata ti Sukot akiri tënë: “Mo zia maboko na ndö ti Zeba na Salmuna awe si mo hunda na e ti mu kobe na azo ti mo so?” —

⁷Gédéon akiri atene: “Nzoni ma! Tongana *KOTA GBIA azia Zeba na Salmuna na maboko ti mbi, mbi yeke kiri ti pika ala na akamba ti ki nga na akeke ti ki ti benyama.”

⁸Gédéon alondo na ndo so, lo gue na gbata ti Penuel. Kâ, lo hunda gi mara ti tënë so na azo ti gbata ni. Azo ni akiri tënë na lo gi tongana ti azo ti Sukot.

⁹Gédéon atene na ala: “Tongana mbi si kâ si mbi kiri nzoni, mbi yeke kungbi na sese kota da ti ala so ayo na nduzu so.”

¹⁰Andaa Zeba na Salmuna ayeke na Karkor, ala na aturugu ti ala. Aturugu so angba na ala ayeke nduru na saki baleoko na oku. Tanga ti aturugu ti ambeni mara so alondo na mbage ti To si aga so laa, ngbanga ti so a fâ ambeni saki ngbangbo oko na baleuse awe.

¹¹Gédéon amu lege so azo ti mbage ti To ayeke mu; lege ni ayeke na To ti Noba na ti Yogboha; lo kinda aturugu ni. Andaa ala baa ti ala fade atene, ani yeke na siriri.

¹²Zeba na Salmuna akpe. Gédéon atumba peko ti agbia use so ngbii lo gbu ala; lo bi tomboka na li ti aturugu ni si ala kpe kirikiri.

¹³Gédéon, molenge ti Yoash, alondo na peko ti bira ni si lo yeke kiri; lo mu lege ti Heres so ague na nduzu.

¹⁴Lo gbu mbeni maseka-koli ti gbata ti Sukot si lo hunda lo. Maseka-koli ni asara na le ti mbeti iri ti amakonzi na *akangba so kue ayeke na gbata ti Sukot; wungo ti amakonzi na akangba ni kue ayeke balembarambara na mbarambara.

¹⁵Na pekoni, Gédéon ague, abaa azo ti Sukot si lo tene na ala: “Ala he mbi lani atene: ‘Mo zia maboko na ndö ti Zeba na Salmuna awe si mo hunda na e ti mu kobe na azo ti mo so awoko kue awe so?’ Baa, Zeba na Salmuna ni laa mbi ga na ala so!”

¹⁶Tongaso, Gédéon amu akamba ti ki nga na akeke ti ki ti benyama si lo pika na akangba ti Sukot ti fa hingango ndo na ala.

¹⁷Lo kungbi nga na sese da ti gbata ti Penuel so ayo na nduzu si lo fâ azo ti gbata ni.

¹⁸Na pekoni, Gédéon ahunda Zeba na Salmuna, atene: “Akoli so ala fâ ala lani na hoto ti Tabor so ayeke tongana nyen?” Ala kiri tënë, atene: “Ala yeke tongana mo. Ala kue akpa gi amolenge ti gbia!”

¹⁹Gédéon atene na ala: “A-ita ti mbi, mama oko laa. KOTA GBIA ayeke na fini! Tongana ala fâ fade ala pepe, ka mbi nga, mbi fâ ala pepe!”

²⁰Gédéon atene na Yeter, kozo molenge ti lo ti koli, atene: “Londo, mo fâ ala!” Me molenge-koli ni agboto zeme ti lo na ya ti bozo ni pepe; mbeto asara lo, ngbanga ti so lo de maseka mingi.

²¹Zeba na Salmuna atene na Gédéon: “Mo wani, mo londo mo fâ e, ngbanga ti so mara ti kua so alingbi gi na zo so aga koli awe!” Gédéon alondo si lo fâ Zeba na Salmuna. Lo mu aye ti pendere so a kanga na go ti *azambala ti ala.

²²Na pekoni, azo ti Israel atene na Gédéon: “E ye titene mo ga gbia ti e; molenge ti mo na tara ti mo ayeke ga gbia na peko ti mo ti gue na ni, ngbanga ti so mo soo e na maboko ti azo ti Madian.”

²³Gédéon atene na ala: “Ataa mbi, ataa molenge ti mbi ayeke duti gbia ti ala pepe; gi *KOTA GBIA oko laa ayeke duti gbia ti ala!”

²⁴Na pekoni, Gédéon atene na ala: “Mbi ye ti hunda na ala mbeni ye: ayeke nzoni zo oko oko amu na mbi ye ti mê oko ti lôro so lo gbu na peko ti bira.” Biani, azo ti Madian ayeke na aye ti mê ti lôro, ngbanga ti so ala yeke azo ti mara ti Ismael.

²⁵Azo ti Israel akiri tënë: “Tënë ayeke daa pepe, fade e mu ni na mo senge.” Ala gbara mbeni kota bongo na sese si zo oko oko aga na ye ti mê ti lôro so lo gbu na peko ti bira, lo bi na ndö ti bongo ni.

²⁶Nengo ti aye ti mê ti lôro so kue Gédéon ahunda ayeke nduru na kilo baleuse. Lo wara nga aye ti pendere, aye ti mê na apendere bongo so abe bengo si ayeke ti agbia ti Madian nga na aye ti go so azo ni ayeke zia na go ti azambala ti ala.

²⁷Gédéon amu lôro so, lo leke na mbeni yanda si lo zia na Ofra, gbata ti lo. Azo ti Israel kue ayeke gue ti voro yanda ni. Tongaso yanda ni aga kuku ti gbungo Gédéon na asewa ti lo.

²⁸Ti londo na ngoi ni so, azo ti Madian ati biani na gbe ti azo ti Israel; lege titene ala yo li ti ala na nduzu ayeke daa mbeni pepe. Siriri akiri na ya ti kodro ni na ya ti ngu baleosio, so ti tene na ngoi so kue Gédéon angba na fini.

²⁹Yerubaal, so ti tene Gédéon, molenge ti Yoash akiri alango na da ti lo.

³⁰Lo yeke na amolenge-koli balembarambara, ngbanga ti so lo yeke na awali mingi.

³¹Mbeni wali ti lo ni ayeke lango na Sishem, lo du na lo molenge-koli; lo di iri ti lo Abimelek.

³²Gédéon aga mbakoro; lo duti nzoni na mbakoro ti lo ni si lo kui. A lu lo na du ti kuâ ti babâ ti lo Yoash, na Ofra, kodro ti kete mara ti Abiezer.

³³Na peko ti kuâ ti Gédéon, azo ti Israel akiri avoro anzapa *Baal. Ala mu Baal-Berit ti ga nzapa ti ala.

³⁴Ala girisa KOTA GBIA, Nzapa ti ala so azi ala na maboko ti awato so kue ayeke nduru na ala.

³⁵Na peko ti anzoni ye so kue Yerubaal, so ti tene Gédéon asara na azo ti Israel, azo ti Israel asara nzoni na azo ti sewa ti lo oko pepe.