Read La Bible en Sango courant – Mbeti ti Nzapa Aye so Nzapa afa 18 Bible Online

Aye so Nzapa afa 18 - La Bible en Sango courant – Mbeti ti Nzapa bible

Aye so Nzapa afa 18

¹Na pekoni, mbi baa mbeni *ange nde so alondo na yayu si ayeke zu. Lo yeke na kota ngangu, tere ti lo aza ahon ndoni si zango ni amu ndö ti sese kue.

²Lo dekongo ngangu, lo tene: “Lo ti awe! Babilone, kota gbata ati awe! Lo ga fadeso ndo ti duti ti asioni yingo, ti ayingo ti kirikiri; lo ga ndo ti hondengo tere ti asioni ndeke kue nga na andeke so azo ake ala.

³Amara kue anyon vin ti lo, vin ti kota nzara ti aye ti ndumba so lo yeke sara. Agbia ti sese asara aye ti ndumba na lo, azo ti dengo buze ti sese aga azo ti mosoro gi na lege ti kota nzara ti warango ye ti lo.”

⁴Mbi kiri mbi ma mbeni go so alondo na yayu, atene: “Ala sigigi! Azo ti mbi, ala sigigi na ya ti gbata so, tongaso si ala bongbi na lo ti sara asiokpari ti lo pepe, tongaso si aye ti sioni so a leke ndali ti lo so asi na ala pepe.

⁵Asiokpari ti lo adu na ndö ti tere, na ndö ti tere ngbii asi na le ti nduzu; Nzapa adabe ti lo na aye ti kirikiri ti lo.

⁶Ala sara na lo ye alingbi gi na ye so lo sara na ala. Aye so lo sara na ala so, ala kiri peko ni na lo fani use. Vin so lo leke ni ti mu na ala ti nyon so, ala mu kopo, atuku mbeni vin na ya ni so ngangu ni ahon ti ti lo fani use si ala mu na lo.

⁷Ala sara pasi na lo, ala bi lo na ya ti aye ti vundu alingbi gi na gondango tere ti lo nga na kota nzara ti warango ye ti lo. Ala sara na lo aye ni so ndali ti so lo yeke tene na be ti lo, lo tene: ‘Mbi yeke gbia-wali, mbi so mbi duti ge so! Mbi yeke wali-mua pepe si mbi yeke sara mua laoko pepe.’

⁸Ndani laa, gi na ya ti lango oko, fade aye ti sioni so a leke ndali ti lo ayeke si na lo: kuâ, mua na kota nzara. Fade wâ ayeke gbi lo, ngbanga ti so Kota Gbia, Nzapa so ayeke na ngangu afâ ngbanga na li ti lo awe.”

⁹Agbia ti sese so asara aye ti ndumba na lo si ala na lo asara kota nzara ti warango ye, fade ala yeke dema tere si ala yeke toto ndali ti lo na ndembe so wâ ayeke gbi lo si ala baa guru ni so ayeke sigigi.

¹⁰Mbeto ti pasi so lo yeke baa ayeke sara ala; ala yeke luti yongoro si ala yeke tene: “Mawa-ee! So mawa! Kota gbata-ee, Babilone-ee! Ngangu gbata! Gi na ya ti ngbonga oko, a fâ ngbanga na li ti mo awe!”

¹¹Azo ti dengo buze ti sese ayeke toto si ala yeke sara mua, ngbanga ti so zo ti vongo akungba ti ala ayeke daa mbeni pepe.

¹²Akungba ni ayeke lôro, wen ti nginza, atêne ti ngangu ngere, alenge, amara ti pendere bongo nde nde ti ngangu ngere, akeke so afun yombo, aye so a leke ni na pembe ti doli, akeke ti ngangu ngere, bengba wen, wen, apendere têne ti sarango na da,

¹³anzoni ye nde nde ti tongo na kobe, amara ti yombo nde nde, *mire, dukani, vin, mafuta, farini, *ble, abagara, ataba, ambarata, apusu ti mbarata, angbaa na azo so a gbu ala na ya ti bira.

¹⁴Azo ti dengo buze ni atene na lo: “Aye so kue mo yeke sara nzara ni ando so, aye ni kue ahon yongoro na tere ti mo awe; apendere ye ti mo na aye ti mosoro ti mo ahon kue awe, mo yeke kiri wara ni oko pepe!”

¹⁵Azo ti dengo buze so aga azo ti mosoro na lege ti dengo buze na ya ti gbata ni ayeke luti yongoro, ngbanga ti so mbeto ti pasi so lo yeke baa ayeke sara ala; ala yeke toto, ala yeke sara mua si

¹⁶ala yeke tene: “Mawa-ee! So mawa! Kota gbata so ayu bongo so a sara na *len, na apendere bengba bongo so ayeke za zango, so tere ti lo ayeke za na lôro, na atêne ti ngangu ngere, nga na alenge!

¹⁷Gi na ya ti ngbonga oko, gba ti amosoro ti lo so kue abuba awe!” Amakonzi kue ti amangboko, azo so kue ayeke sara kua na ya ni, azo so ayeke tambula na amangboko ni, na azo so kue ayeke wara nginza na lege ti sarango kua na le ti ngu,

¹⁸ala luti yongoro si na bango gbata ni so ayeke gbi si guru ni ayeke sigigi so, ala dekongo, atene: “Ae, azo! Gbata wa laa alingbi fade na Babilone, kota gbata so?”

¹⁹Ala tuku fuku ti sese na ya ti li ti ala, ala toto, ala sara mua, ala dekongo, atene: “Mawa-ee! So mawa! Kota gbata so na lege ti gba ti amosoro ti lo awa ti amangboko aga azo ti mosoro mingi so, gi na ya ti ngbonga oko aye ti lo kue abuba awe!”

²⁰Ala so kue ayeke na yayu, ala duti na ngia ndali ti so Babilone ati awe! Ala azo ti Nzapa, *awatokua ti Nzapa, awayanga-Nzapa, ala duti na ngia ndali ti so Nzapa afâ ngbanga na li ti Babilone ndali ti ye so lo sara na ala!

²¹Tongaso, mbeni ngangu ange amu mbeni ngbongboro têne so akono alingbi na têne ti nikango na ye, lo bi na ya ti kota ngu-ingo si lo tene: “A yeke bi Babilone, kota gbata ni na ngangu tongaso. Fade azo ayeke kiri ti baa ni pepe!

²²Babilone, zo ayeke kiri ti ma ngombi ti azo ti pikango kundi, na go ti azo ti hengo bia, na toto ti *ngoli na ti tatalita na ndo ti mo pepe. Zo ayeke kiri ti wara azo ti sarango akua nde nde na kode na ndo ti mo pepe; zo ayeke kiri ti ma nga toto ti têne ti nikango na ye na ndo ti mo pepe.

²³Wâ ti lamba akiri ti za na ndo ti mo pepe. Na ndo ti mo, zo ayeke kiri ti ma pepe go ti koli na wali so amu tere fini fini. Nda ni ayeke so: azo ti dengo buze ti mo ayeke ngangu ahon ala ti sese si mo handa amara kue na lege ti sarango aye ti mazi ti mo!”

²⁴Kâ na Babilone laa a tuku mene ti awayanga-Nzapa, ti azo ti Nzapa na ti azo so kue a fâ ala na ndö ti sese.