Read La Bible en Sango courant – Mbeti ti Nzapa Ruth 1 Bible Online

Ruth 1 - La Bible en Sango courant – Mbeti ti Nzapa bible

Ruth 1

¹Ando, na ngoi so awafango-ngbanga ayeke na li ti kodro ti Israel, mbeni kota nzara ati na ya ti kodro ni. Tongaso, mbeni koli ti kodro ti Betlehem, na sese ti Juda, lo na wali ti lo, na amolenge ti lo ti koli use, alondo na kodro ti ala ti gue ti duti ndali ti mbeni ngoi na ndo so azo ayeke fâ yaka daa, na sese ti Moab.

²Iri ti koli so ayeke Elimelek; iri ti wali ti lo ayeke Noemi; iri ti amolenge ti lo ti koli use ayeke Malon na Kilion. Ala yeke azo ti kete mara ti Efrata na kodro ti Betlehem, na sese ti Juda. Ala si na sese ti Moab si ala sara kodro kâ.

³Na pekoni, Elimelek, koli ti Noemi, akui. Noemi na amolenge ti lo use laa angba.

⁴Amolenge ni amu awali ti mara ti Moab. Iri ti mbeni wali ni ayeke Orpa, iri ti mbeni ayeke Ruth. Ala ngba na ndo so nduru na ngu baleoko.

⁵Na pekoni, Malon na Kilion nga akui. Noemi angba gi lo oko; koli ti lo ayeke daa pepe, amolenge ti lo use kue ayeke daa pepe.

⁶Kâ na sese ti Moab, Noemi ama a tene, *KOTA GBIA aga ti sara nzoni na azo ti lo si ala wara kobe ti tengo ni. Tongaso, Noemi na awali ti amolenge ti lo aleke tere ti ala ti zia sese ti Moab, ti kiri na sese ti Juda.

⁷Lo na akogara ti lo use kue alondo na ndo so ala yeke daa, ala mu lege ti kiri na sese ti Juda.

⁸Me Noemi atene na akogara ti lo use, atene: “Ala kiri! Zo oko oko ague na ndo ti mama ti lo. Ayeke nzoni KOTA GBIA angba ti sara nzoni be na ala tongana ti so ala sara ando nzoni be na amolenge ti mbi so akui awe si ala sara nga na mbi so.

⁹Ayeke nzoni KOTA GBIA asara titene zo oko oko amu koli si lo duti nzoni na da ti koli ni.” Na pekoni, Noemi agbu ala na ya ti maboko ti lo, lo su ngbangba ti ala ti hon. Me akogara ti lo ni ati na toto.

¹⁰Ala tene na lo: “E yeke kiri pepe; e na mo, e yeke kiri na popo ti azo ti mo.”

¹¹Me Noemi atene: “Amolenge ti mbi, ala kiri! Ala ye ti ga na peko ti mbi ngbanga ti nyen? Ngu ti mbi akpa titene mbi kiri mbi du amolenge-koli titene ala ga ande akoli ti ala?

¹²Amolenge ti mbi, ala kiri! Ala gue! Mbi ga mbakoro awe; ngu ti mbi ti kiri ti mu koli ahon awe. Ataa mbi tene: mbi lingbi ti mu koli ti du senge si gi na bi so, mbi na mbeni koli e duti, mbi yeke du amolenge-koli,

¹³fade ala yeke ku ande amolenge ni ngbii titene ala kono si ala mu ala? Ala yeke ke ti mu akoli ti ku ala? Amolenge ti mbi, tënë ni ayeke tongaso pepe. KOTA GBIA asara ngangu na mbi mingi; be ti mbi ayeke na vundu mingi ndali ti ala.”

¹⁴Ruth na Orpa akiri atoto ngangu. Na pekoni, Orpa agbu mama ti koli ti lo na ya ti maboko ti lo, lo su ngbangba ti lo ti kiri. Me Ruth angba gi na tere ti mama ti koli ti lo.

¹⁵Noemi atene na Ruth: “Baa, ita ti mo akiri na popo ti azo ti lo nga na tere ti anzapa ti lo awe. Mo sara tongana ti ita ti mo, mo kiri na ndo ti mo.”

¹⁶Me Ruth akiri tënë, atene: “Mo gbu mbi na ngangu titene mbi kiri na ndo ti mbi si mbi zia gi mo oko pepe. Ndo so mo yeke gue ande daa, mbi nga, mbi yeke gue daa. Ndo so mo yeke lango ande daa, mbi nga, mbi yeke lango daa. Azo ti mo ayeke ga azo ti mbi; Nzapa ti mo ayeke ga Nzapa ti mbi.

¹⁷Ndo so mo yeke kui ande daa, mbi nga, mbi yeke kui daa si a yeke lu mbi daa. Gi kuâ laa ayeke kangbi popo ti mbi na mo. Tongana mbi hon mbi zia mo, ayeke nzoni KOTA GBIA asara ye ti ngangu mingi na mbi!”

¹⁸So Noemi abaa Ruth aye gi titene lo na lo ague, Noemi azia lege ti tenengo na lo ti kiri.

¹⁹Ala use kue atambula ngbii asi na Betlehem. Na singo ti ala kâ, li ti azo ti kodro ni kue akpe na bango ala. Awali ahunda tere ti ala, atene: “So Noemi laa pepe?”

²⁰Noemi atene na ala: “Ala iri mbi Noemi pepe; me ala iri mbi Mara, so ti tene: ‘zo ti mawa’. Ala iri mbi zo ti mawa, ngbanga ti so Nzapa so ngangu ti lo ahon angangu kue asara si aye ti vundu mingi asi na mbi.

²¹So mbi londo ando na ndo so ti hon, aye asi singo na maboko ti mbi. KOTA GBIA asara si na kiringo ti mbi, mbi kiri maboko senge. Ala kiri airi mbi Noemi pepe, ngbanga ti so Nzapa so ngangu ti lo ahon angangu kue abi tënë na li ti mbi, lo sara si aye ti vundu mingi asi na mbi.”

²²Lege so laa Noemi na Ruth, wali ti molenge ti lo, zo ti Moab, alondo na sese ti Moab, ti kiri na Betlehem. Ala si na Betlehem na ndembe so azo ato nda ti fango ale ti *orze.