Read La Bible en Sango courant – Mbeti ti Nzapa Ruth 2 Bible Online

Ruth 2 - La Bible en Sango courant – Mbeti ti Nzapa bible

Ruth 2

¹Mbeni kogara ti Noemi ayeke daa, lo yeke sewa ti Elimelek, koli ti Noemi. Iri ti lo ayeke Booz; lo yeke mbeni kota zo so ayeke na mosoro mingi.

²Ruth, zo ti mara ti Moab, atene na Noemi: “Mbi ye ti gue na yaka. Tongana mbeni zo asara nzoni be na mbi, fade mbi yeke ro ale ti kobe so atuku na sese na peko ti lo.” Noemi akiri tënë, atene: “Mo gue ma, molenge ti mbi!”

³Tongaso Ruth ague, asi na mbeni yaka si lo yeke ro ale ti kobe na peko ti azo ti fango ale ti kobe. Pasa ti lo, yaka so lo si daa ayeke yaka ti Booz, zo ti sewa ti Elimelek.

⁴Na pekoni, Booz alondo na Betlehem asi. Lo bara azo ti fango ale ti kobe ni, lo tene: “KOTA GBIA aduti na ala-oo!” Azo ti fango ale ti kobe ni abara lo, atene: “KOTA GBIA asara tufa na ndö ti mo-oo!”

⁵Booz ahunda zo so ayeke baa ndo na ndö ti azo ti fango ale ti kobe ni, atene: “So maseka-wali ti zo wa laa?”

⁶Zo ni akiri tënë, atene: “Mbeni maseka-wali ti mara ti Moab laa; lo na Noemi laa alondo na sese ti Moab si aga.

⁷Lo hunda e titene lo ro ale ti kobe so alondo na ya ti agba ni si atuku na sese na peko ti azo ti fango ale ti kobe. Ti londo na ndembe so lo si na ndaperere so ngbii asi fadeso, lo ngba gi na nduzu; lo wu tere ti lo gi kete na gbe ti da.”

⁸Tongaso Booz atene na Ruth: “Molenge ti mbi, ma tënë ti mbi nzoni. Mo gue, mo ro ale ti kobe na ya ti mbeni yaka nde pepe; ngba na ndo so, na tere ti awali so ayeke sara kua ti mbi.

⁹Baa yaka so azo ayeke fâ ale ti kobe daa so nzoni. Mu peko ti awali so ayeke ro ale ti kobe so. Mbi tene na azo ti kua ti mbi titene ala zia mo kpoo. Tongana nzara ti ngu asara mo, fade mo gue, mo nyon ngu na ya ti ta so azo ti kua ti mbi ato ngu daa so.”

¹⁰Ruth akuku akpo li ti lo na sese si lo tene na Booz: “Mo sara nzoni be na mbi tongaso ngbanga ti nyen? Mbi so mbi yeke zo ti mara nde so, mo ye tënë ti mbi tongaso ngbanga ti nyen?”

¹¹Booz akiri tënë, atene: “Aye so kue mo sara na mama ti koli ti mo na peko ti kuâ ti koli ti mo so, azo atene na mbi tënë ni; ala fa na mbi so mo zia babâ ti mo, na mama ti mo, na kodro so a du mo daa ti gue na popo ti azo so mo hinga ala kozoni pepe.

¹²Mbi sambela titene anzoni ye so mo sara so, KOTA GBIA akiri peko ni na mo. Ayeke nzoni KOTA GBIA, Nzapa ti Israel, so mo ga ti duti na gbe ti lo akiri peko ni kue na mo.”

¹³Ruth atene: “Kota zo, mo ngba ti sara nzoni na mbi; mo sara si be ti mbi ade. Tënë so mo tene so agbu be ti mbi mingi; mbi so mbi lingbi nga na awali so ayeke sara kua na gbe ti mo lawa!”

¹⁴Na ndembe ti tengo kobe, Booz atene na Ruth: “Ga mo te kobe. Mu mbeni mapa, mo fâ ya ni, mo yoro na ya ti ngu ti kasa si mo te.” Ruth aduti na tere ti azo ti fango ale ti kobe ni si Booz amu na lo mbeni gba ti ale ti kobe so a yoro ni yorongo. Lo te ni, ya ti lo asi si lo bata tanga ni.

¹⁵Na pekoni, Ruth alondo akiri ague ti ro ale ti kobe. Booz amu yanga na azo ti kua ti lo, atene: “Ala zia lege na lo, lo ro ale ti kobe so atuku na popo ti agba ni; ala kanga lege na lo pepe.”

¹⁶Ala gboto nga ambeni le ti kobe ni na ya ti gba ni, ala tuku na sese titene lo ro ni. Ala suku na lo pepe.

¹⁷Ruth aro ale ti kobe ni ngbii asi na lakui. Na pekoni, lo pika ya ti ale ti kobe so lo ro so. Ale ti kobe so lo wara so aga nduru ti si kota sembe oko.

¹⁸Lo mu ale ti kobe ni si lo kiri na kodro; lo fa ni na mama ti koli ti lo. Tanga ti kobe so lo te si angba so, lo sigigi nga na ni si lo mu ni na kogara ti lo.

¹⁹Kogara ti lo ahunda lo, atene: “Mo ro ale ti kobe laso na ndo wa? Mo sara kua ni na yaka ti zo wa? Nzapa asara tufa na ndö ti zo so asara nzoni be na mo so-oo!” Ruth afa na kogara ti lo ndo so lo sara kua daa so; lo tene: “Laso mbi sara kua na yaka ti mbeni koli so iri ti lo ayeke Booz.”

²⁰Noemi atene na Ruth: “KOTA GBIA so angba lakue ti sara nzoni be na azo so angba na fini nga na azo so akui awe, lo sara tufa na ndö ti koli so-oo.” Na pekoni, Noemi atene na Ruth: “Booz ayeke mbeni zo ti sewa ti e so popo ni ayo pepe, lo yeke mbeni zo so alingbi ti mu e, ti bata e.”

²¹Ruth, zo ti Moab atene: “Lo tene na mbi atene, fade mbi ngba na tere ti azo ti kua so ayeke fâ ale ti kobe ni so ngbii ala hunzi fango ale ti kobe ti yaka ni kue si.”

²²Tongaso Noemi atene na Ruth, wali ti molenge ti lo, lo tene: “Molenge ti mbi, mo ngba gi na tere ti awali so ayeke sara kua na Booz ti ro ale ti kobe. Mo gue na mbeni yaka nde pepe, ngbanga ti azo asara sioni na mo.”

²³Tongaso Ruth angba gi na tere ti awali so ayeke sara kua ti fango ale ti kobe ti Booz; lo ro ale ti kobe ni ngbii ngoi ti fango ale ti kobe so iri ni *orze na ale ti *ble ahunzi. Ruth angba ti lango na ndo ti kogara ti lo.