Read La Bible en Sango courant – Mbeti ti Nzapa Ruth 4 Bible Online

Ruth 4 - La Bible en Sango courant – Mbeti ti Nzapa bible

Ruth 4

¹Booz ague, aduti na yanga ti kodro ni, na ndo so azo ayeke leke ka tënë daa. Andaa zo ti sewa ti Elimelek ayeke hon, lo so lo lingbi fade ti mu Ruth ti bata lo, lo so lani Booz atene tënë ti lo na Ruth so. Booz airi lo, atene: “Koli, ga, mo duti ge.” Koli ni aga si aduti.

²Booz airi ambeni *kangba ti kodro ni, li ti ala baleoko titene ala duti na tere ti lo. Tongaso ala ga aduti.

³Lo tene na zo so alingbi ti mu Ruth ti bata lo so, lo tene: “Noemi so lani alondo na sese ti Moab si aga so, lo yeke ka yaka ti ita ti e Elimelek.

⁴Nilaa, mbi ye ti tene tënë ni na mo. Tongana mo yeda, na le ti azo so kue ayeke ge so, nga na le ti akangba ti kodro ti e, mo vo ni, mo bata ni. Tongana mo ye ti vo ni ti bata ni, mo vo ni mo bata; tongana mo ye pepe, mo tene tënë ni na mbi si mbi hinga, ngbanga ti so mbeni zo nde alingbi ti vo ni ti bata ni pepe. Na peko ti mo, ayeke mbi.” Koli ni akiri tënë, atene: “Mbi laa mbi yeke vo ni.”

⁵Booz akiri tënë, atene: “Na ndembe so mo yeke vo yaka so na maboko ti Noemi, alingbi mo mu nga Ruth, zo ti mara ti Moab so lani koli ti lo akui si lo ga wali ti mo. Mo mu lo si mo sara titene iri ti ita ti mo angba na ndö ti aye so lo zia.”

⁶Koli so alingbi fade ti mu Ruth ti bata lo so akiri tënë, atene: “Mbi lingbi ti mu Ruth titene lo ga wali ti mbi pepe, ngbanga ti fade mbi buba aye so mbi yeke zia na peko ti mbi. Mbi laa mbi lingbi fade ti mu lo biani, me mbi mu lege na mo ti mu lo, ngbanga ti so mbi lingbi ti mu lo pepe.”

⁷Ando na kodro ti Israel, tongana azo aye ti vo ye wala ti sanze ye na popo ti ala, mbeni zo oko ayeke zi pâpä ti lo ti mu na mba ti lo ti fa atene, ala ma tere na ndö ti ye ni awe.

⁸Nilaa, koli so alingbi fade ti mu aye ti peko ti Elimelek so atene na Booz, atene: “Ayeke nzoni mo mu aye ni.” Na pekoni, lo zi pâpä ti lo si lo mu na lo.

⁹Booz atene na akangba nga na azo ti kodro ni kue, atene: “Ala kue abaa so mbi lingbi ti wara na maboko ti Noemi aye ti peko ti Elimelek, ti Kilion na ti Malon.

¹⁰Na ndö ni kue, mbi mu Ruth, zo ti Moab, wali ti Malon titene lo ga wali ti mbi. Tongaso si mbi sara titene iri ti Malon so akui angba na ndö ti aye so lo zia ni si a-ita ti lo agirisa iri ti lo pepe si iri ti lo angba nga na ndo so azo ayeke leke ka tënë daa so. Ala kue laa ayeke laso na tere ti tënë ni.”

¹¹Akangba na azo ti kodro so kue ayeke na ndo so azo ayeke leke ka tënë daa so atene: “Een, e kue laa, e yeke na tere ti tënë ni. Ayeke nzoni *KOTA GBIA asara si wali so ayeke li na ya ti da ti mo so aga tongana Rachel na Lea, so gi ala use asara si sewa ti Israel aga kota so. Ayeke nzoni mo wara mosoro mingi na ya ti kodro ti Efrata, iri ti mo awu amu ya ti kodro ti Betlehem kue.

¹²Ayeke nzoni KOTA GBIA asara si na lege ti maseka-wali so, mo du amolenge gbani gbani si azo ti sewa ti mo alingbi na azo ti sewa ti Peres, so Tamar adu na Juda.”

¹³Tongaso Booz amu Ruth si lo ga wali ti lo; lo na lo aduti. *KOTA GBIA asara tufa na ndö ti lo si lo mu ngo; lo du molenge-koli.

¹⁴Nilaa awali atene na Noemi, atene: “E gonda KOTA GBIA! Lo mu na mo zo ti batango mo awe. Ayeke nzoni iri ti molenge so a du lo so awu amu ya ti kodro ti Israel kue.

¹⁵Fade lo yeke sara titene mo duti nzoni; lo laa lo yeke bata mo na ngoi so mo yeke ga kangba biani biani; molenge ni ayeke bata mo, ngbanga ti so wali ti molenge ti mo so aye mo mingi so laa adu lo. Wali ti molenge ti mo ni asara nzoni na mo ahon amolenge-koli mbarambara.”

¹⁶Noemi amu molenge ni, lo yo lo na kate ti lo si lo ga zo ti batango molenge ni.

¹⁷Awali so ayeke lango nduru na tere ti lo atene: “A du molenge-koli na Noemi awe.” Ala di iri ti molenge ni Obed. Obed ayeke babâ ti Yese so ayeke babâ ti David.

¹⁸So ayeke molongo ti iri ti *ahale ti Peres: Peres adu Hesron;

¹⁹Hesron adu Ram; Ram adu Aminadab;

²⁰Aminadab adu Nashon; Nashon adu Salma;

²¹Salma adu Booz; Booz adu Obed;

²²Obed adu Yese; Yese adu David.