Read La Bible en Sango courant – Mbeti ti Nzapa 1 Samuel 1 Bible Online

1 Samuel 1 - La Bible en Sango courant – Mbeti ti Nzapa bible

1 Samuel 1

¹Mbeni koli ayeke daa, iri ti lo Elkana; lo yeke lango na Ramataim-Sofim, na sese ti Efraim, ndo so ahoto ayeke daa. Lo yeke molenge ti Yeroam; Yeroam ayeke molenge ti Elihu; Elihu ayeke molenge ti Tohu; Tohu ayeke molenge ti Suf, zo ti mara ti Efraim.

²Elkana ayeke na awali use: iri ti mbeni ayeke Anne, iri ti mbeni ayeke Penina. Penina adu amolenge, me Anne adu pepe.

³Na ya ti ngu oko oko, Elkana ayeke londo na kodro ti lo ti gue na gbata ti Silo ti voro *KOTA GBIA so ayeke na ndö ti dunia kue, ti mu nga *sandaga na lo. Kâ, ambeni wayango-sandaga ti KOTA GBIA ayeke daa. Iri ti mbeni Hofni si iri ti mbeni Pinas; ala yeke amolenge ti Heli.

⁴Na lango ti mungo sandaga ni, Elkana ayeke mu ka sandaga na Nzapa, lo yeke mu nga mbage ti kasa ti nyama ti sandaga ni na Penina nga na amolenge ti lo ti koli na ti wali kue.

⁵Me kasa ti nyama so lo yeke mu na Anne akono fani use ahon ti Penina na amolenge ti lo, ngbanga ti so lo ye Anne mingi, ataa so KOTA GBIA akanga ya ti lo si lo du molenge pepe.

⁶Lakue sambâ ti Anne ayeke zonga lo mingi si ayeke he lo ti zia kamene na le ti lo, ngbanga ti so lo du pepe.

⁷Na ya ti ngu oko oko, tongana Anne ayeke gue na da ti Nzapa, ye ni ayeke duti lakue tongaso. Na ya ti mbeni ngu oko, Anne ati na toto si lo ke ti te kobe.

⁸Koli ti lo Elkana atene na lo: “Anne, mo yeke toto si mo ke ti te kobe ngbanga ti nyen? Be ti mo ayeke na vundu ngbanga ti nyen? Na le ti mo, mbi hon amolenge-koli baleoko pepe?”

⁹So ala te si ala nyon na Silo awe, Anne alondo ague na yanga ti da ti Nzapa. Wayango-sandaga Heli ayeke duti na ndö ti mbata ti lo na yanga ti da ti KOTA GBIA.

¹⁰Vundu ahon ndö ti Anne, lo yeke toto mingi si lo yeke sambela KOTA GBIA.

¹¹Lo mu zendo, lo tene: “KOTA GBIA, mo so mo yeke na ndö ti dunia kue, baa mawa ti mbi, zo ti gbe ti mo. Dabe ti mo na mbi, mo girisa mbi pepe. Mu na mbi molenge-koli, fade mbi kiri mbi mu lo na mo, KOTA GBIA titene lo sara kua na mo na lango ti fini ti lo kue. Fade a yeke kio kua ti li ti lo oko pepe.”

¹²So Anne angba ti sambela KOTA GBIA si sambela ni aninga, Heli ayeke baa yanga ti lo.

¹³Anne ayeke tene tënë gi na ya ti be ti lo; gi aporo ti yanga ti lo laa ayeke yingi tere. Zo ayeke ma go ti lo pepe. Nilaa Heli abaa ti lo atene, lo nyon samba ahon ndö ti lo awe.

¹⁴Heli atene na lo: “Samba ti mo ni ayeke hon ande na le ti mo pepe? Mo gi ndo, mo hon na ni daa.”

¹⁵Anne akiri tënë na lo: “Babâ, mbi nyon samba oko pepe. Mbi yeke wali so mawa ahon ndö ti mbi. Nilaa mbi yeke fa tënë ti be ti mbi na KOTA GBIA.

¹⁶Mo baa mbi, zo ti gbe ti mo tongana mbeni buba zo pepe. Mbeni tënë laa aso be ti mbi ahon ndoni si ayeke mu na mbi vundu. Nilaa mbi sambela ngbii aninga so.”

¹⁷Tongaso, Heli akiri tënë na lo: “Gue nzoni! Ayeke nzoni Nzapa ti Israel amu na mo ye so mo hunda na lo.”

¹⁸Anne atene: “Ayeke nzoni mo ngba ti sara nzoni be na mbi.” Lo kiri, lo te kobe; vundu ayeke na le ti lo mbeni pepe.

¹⁹Na kota ndaperere, Elkana na asewa ti lo alondo si ala kuku na gbe ti KOTA GBIA. Na pekoni, ala kiri na kodro ti ala na Rama. Elkana na wali ti lo Anne aduti koli na wali si *KOTA GBIA adabe ti lo na Anne.

²⁰Anne amu ngo si lo du molenge-koli, lo di iri ti lo Samuel. Anne atene: “Mbi di iri ti lo Samuel, ngbanga ti so ayeke molenge so mbi hunda na maboko ti KOTA GBIA.”

²¹Na pekoni, Elkana na asewa ti lo kue akiri ague na gbata ti Silo ti mu *sandaga na KOTA GBIA tongana ti so ala yeke mu ka na lo na ya ti ngu oko oko. Elkana ague kâ ti sara nga ye alingbi na tënë ti mbeni zendo so lo mu na KOTA GBIA.

²²Me ti so ni, Anne ague pepe. Lo tene na koli ti lo: “Mbi yeke ku ti zi molenge ni na me si mbi gue na lo na Silo; mbi yeke fa lo na KOTA GBIA si lo yeke ngba kâ biani biani.”

²³Koli ti lo Elkana atene na lo: “Sara ye so be ti mo aye. Mo ngba ge na da ngbii mo zi molenge ni na me si. Ayeke nzoni KOTA GBIA asara ye alingbi na tënë ti yanga ti lo.” Nilaa, Anne angba na da ti mu me na molenge ni ngbii asi na ngoi so lo zi molenge ni na me.

²⁴Na pekoni so Anne azi molenge ni na me awe, lo gue na lo na da ti KOTA GBIA na Silo. Lo mu nga na tere ti lo koli-bagara ti ngu ota, kota sembe ti farini oko, na vin so lo zia na ya ti bozo ti poro ti nyama. Andaa na ndembe ni so, Samuel ade kete molenge.

²⁵Ala mu koli-bagara ni na sandaga na Nzapa si ala gue na molenge ni na Heli.

²⁶Anne atene na Heli: “Babâ, mbi gbu gere ti mo; mo laa mo ngba na le ti mo so. Wali so lani aluti na tere ti mo ge ti sambela KOTA GBIA so, ayeke mbi.

²⁷Baa molenge so lani mbi sambela KOTA GBIA ngbanga ti lo so laa. KOTA GBIA ama sambela ti mbi si amu lo na mbi.

²⁸Fadeso, mbi nga, mbi ye ti mu lo na KOTA GBIA; mbi mu lo na KOTA GBIA titene lo ga zo ti KOTA GBIA na lango ti fini ti lo kue.” Na pekoni, Elkana na asewa ti lo akuku, akpo li ti ala na sese na gbe ti KOTA GBIA.