Read La Bible en Sango courant – Mbeti ti Nzapa 1 Samuel 10 Bible Online

1 Samuel 10 - La Bible en Sango courant – Mbeti ti Nzapa bible

1 Samuel 10

¹Samuel amu ngbenda ti mafuta, lo tuku mafuta ni na li ti Saul. Lo su ngbangba ti Saul si lo tene na lo: “*KOTA GBIA wani laa atuku mafuta na li ti mo titene mo ga makonzi na ndö ti azo ti lo.

²So mo yeke zia mbi laso ti hon so, fade mo yeke wara akoli use. Ala yeke nduru na tere ti du ti kuâ ti Rachel so ayeke na sese ti azo ti mara ti Benjamin na ti kodro ti Selsa. Akoli ni ayeke tene na mo: ‘Amama ti lele so mo gue ti gi ala so, a wara ala awe. Fadeso be ti babâ ti mo agirisa na tënë ti amama ti lele ni awe; me lo yeke gi be ti lo ndali ti ala, lo yeke hunda tere ti lo, lo tene: Fade mbi yeke sara tongana nyen ti wara molenge ti mbi?’

³Tongana mo londo na ndo so, mo hon yongoro kete, fade mo yeke si na tere ti keke ti shene ti Tabor. Kâ, fade ambeni koli ota ayeke ga ti wara mo. Ala yeke gue na da ti Nzapa so ayeke na Betel. Mbeni oko ayo akete ngasa ota, use koli ni ayo mapa ota si ota koli ni ayo bozo ti poro so vin ayeke na ya ni.

⁴Fade ala yeke bara mo si ala yeke mu na mo mapa use; mo yeke mu ni na maboko ti ala.

⁵Na pekoni, mo yeke si na Gibea-Elohim, agovoronere ti azo ti Filistii ayeke kâ. Na lingo ti mo na ya ti gbata ni, mo yeke tengbi na mbeni bongbi ti awayanga-Nzapa so alondo na ndo so a leke na ndö ti hoto si ala yeke zu. Azo ti pikango kota kundi, kete kundi, kete ngo na azo ti hurungo ngoli ayeke na dawa ti ala. Awayanga-Nzapa ni ayeke sara ye tongana azo so Yingo agbu ala.

⁶Fade Yingo ti KOTA GBIA ayeke ga na ndö ti mo, mo yeke sara nga ye tongana ti ala si mo yeke ga mbeni zo nde.

⁷Tongana mo baa aye so kue asi, sara ye so kue mo lingbi ti sara, ngbanga ti so Nzapa ayeke na mo.

⁸Fade mo yeke gue na Gilgal kozo ti mbi. Mbi yeke gue na peko ti wara mo kâ ti mu na Nzapa *sandaga so a yeke gbi ni kue na wâ nga na sandaga ti beoko. Fade mo yeke ku mbi na ya ti lango mbarambara ngbii mbi ga, mbi wara mo si. Tongana mbi ga, mbi yeke fa na mo ye so mo lingbi ti sara.”

⁹Gi so Saul azia Samuel ti kiri, Nzapa asanze be ti Saul. Aye so kue Samuel atene tënë ni, asi gi na lango ni so.

¹⁰So Saul na zo ti kua ti lo asi na Gibea awe, mbeni bongbi ti awayanga-Nzapa aga awara lo. Yingo ti Nzapa aga na ndö ti Saul si lo na ala kue asara ye tongana azo so Yingo ti Nzapa agbu ala.

¹¹Azo so kue ahinga lo kozoni ayeke baa lo na sarango ye tongana awayanga-Nzapa; ala hunda tere ti ala, atene: “Nyen laa asi na molenge ti Kish so? Saul nga aga wayanga-Nzapa awe?”

¹²Mbeni koli ti kodro ni ahunda ndo, atene: “Me ala so, wa ti ala ayeke zo wa?” Ndani laa azo ti kodro ni ayeke tene mbeni *mato, atene: “Saul nga aga wayanga-Nzapa awe?”

¹³So Saul akai ti sarango ye tongana wayanga-Nzapa awe, lo gue na ndo so a leke na ndö ti hoto ti voro Nzapa daa.

¹⁴Ita ti babâ ti lo ahunda lo nga na zo ti kua ti lo, atene: “Ala gue fade na ndo wa?” Saul akiri tënë: “E gue fade ti gi amama ti lele, me e wara ala pepe; na pekoni, e gue na ndo ti Samuel.”

¹⁵Ita ti babâ ti Saul atene: “Tene na mbi peko ti tënë so Samuel atene na ala so ma.”

¹⁶Saul atene na babâ-kete ti lo: “Samuel atene na e, atene: ‘A wara amama ti lele ni awe.’ ” Me tënë ti gango gbia so Samuel atene tënë ni so, Saul atene ni na lo pepe.

¹⁷Samuel airi azo ti Israel ti bongbi na Mispa na dawa ti *KOTA GBIA.

¹⁸Lo tene na ala: “Tënë so KOTA GBIA, Nzapa ti Israel, atene ayeke so: ‘Mbi laa mbi sara si ala sigigi na Ezipte; mbi zi ala na maboko ti azo ti Ezipte nga na gbe ti akodro-gbia kue so asara lani pasi na ala.’

¹⁹Me fadeso, ala ke Nzapa ti ala awe, lo so lo zi ala na ya ti mawa nga na ya ti ye ti ngangu so; ala tene na lo: ‘Mu na e mbeni gbia.’ Fadeso ala ga aluti na le ti KOTA GBIA, mara na mara, kete mara na kete mara.”

²⁰Samuel airi amara ti Israel kue ti ga. Lo bi mbeni ye ti soro mbeni mara oko. Ye ni afa mara ti Benjamin.

²¹Lo iri azo ti mara ti Benjamin. Azo ni aga na lege ti kete mara ti ala. Ye ni afa kete mara ti Matri. Na pekoni, ye ni afa Saul, molenge ti Kish. Azo agi Saul, me ala wara lo pepe.

²²Ala kiri ahunda KOTA GBIA, atene: “Koli so asi ge?” KOTA GBIA atene: “Baa lo laa, lo honde tere ti lo na popo ti akungba so.”

²³Azo akpe loro, ague, amu lo na popo ti kungba ni. Ala ga na lo si lo luti na popo ti azo ti gbata ni. Lo yo li ti lo ahon ti azo ni kue.

²⁴Samuel atene na azo ni: “Ala baa, zo so KOTA GBIA asoro lo so laa! Na popo ti azo kue, mbeni zo ti lingbi na lo ayeke daa pepe.” Azo kue adekongo na ngia, atene: “E mu gbia na nduzu!”

²⁵Samuel afa na azo ni andia ndali ti gbia. Lo su ni kue na mbeti, lo zia ni na dawa ti KOTA GBIA. Na pekoni Samuel azia lege na azo kue titene zo oko oko akiri na ndo ti lo.

²⁶Saul nga akiri na ndo ti lo na gbata ti Gibea. Ambeni ngangu turugu so Nzapa andu be ti ala amu peko ti lo.

²⁷Me ambeni buba zo atene: “Koli so ayeke soo ande e na kuâ tongana nyen?” Ala baa lo tongana mbeni mbumbuse zo si ala ke ti ga na akadoo na lo. Me Saul azi yanga daa oko pepe.