Read La Bible en Sango courant – Mbeti ti Nzapa 1 Samuel 12 Bible Online

1 Samuel 12 - La Bible en Sango courant – Mbeti ti Nzapa bible

1 Samuel 12

¹Samuel atene na azo ti Israel kue: “Atënë so kue ala tene na mbi so, mbi ma ni awe. Nilaa mbi mu na ala gbia titene lo duti na li ti ala.

²Ti fadeso, lo laa lo yeke tambula na dawa ti ala. Biani, mbi ga mbakoro awe, kua ti li ti mbi avuru awe. Amolenge ti mbi laa ayeke na popo ti ala so. Mbi ngba lani maseka si mbi tambula na dawa ti ala ngbii asi laso.

³Baa, mbi laa na dawa ti ala so. Tongana mbi sara mbeni ye ti sioni, ayeke nzoni ala fa ni na le ti *KOTA GBIA nga na le ti gbia so lo soro lo so. Zo wa laa mbi mu bagara ti lo wala lele ti lo, zo wa? Zo wa laa mbi mu ye ti lo na haram wala mbi sara ngangu na lo, zo wa? Zo wa laa apete goro na mbi si mbi kanga le na ndö ti tënë ti lo, zo wa? Fade mbi yeke kiri na ni na lo.”

⁴Azo ti Israel atene: “Mo mu ye ti e na haram pepe. Mo sara ngangu na e pepe. Mbeni zo oko apete nga goro na mo pepe.”

⁵Samuel akiri tënë na ala: “KOTA GBIA na gbia so lo soro lo ama tënë ti yanga ti ala laso awe. Ala wara mbeni tënë na li ti mbi pepe.” Azo ti Israel akiri tënë: “Een! KOTA GBIA ama tënë ti e awe.”

⁶Samuel akiri atene na azo ni: “KOTA GBIA ama ala awe, lo so airi ando Moïse na Aaron ti mu akotara ti ala na sese ti Ezipte si asigigi na ala.

⁷Fadeso, ala luti na le ti ngbanga na dawa ti KOTA GBIA. Mbi yeke dabe ti ala na anzoni ye so lo sara ndali ti ala nga ndali ti akotara ti ala.

⁸So Jacob asi lani na Ezipte, akotara ti ala atoto na KOTA GBIA. KOTA GBIA atokua Moïse na Aaron ti sara si akotara ti ala asigigi na sese ti Ezipte, ti zia ala na ya ti kodro so.

⁹Me be ti akotara ti ala agirisa na KOTA GBIA, Nzapa ti ala. Ndani laa KOTA GBIA azia ala na maboko ti Sisra, makonzi ti aturugu ti Hasor, na maboko ti azo ti Filistii nga na ti Moab so atiri bira na ala.

¹⁰Akotara ti ala akiri atoto na KOTA GBIA, atene: ‘KOTA GBIA, e sara siokpari awe, ngbanga ti so e zia mo si e sara kua na ayanda ti *Baal na ti *Astarte. Me fadeso, zi e na maboko ti awato ti e si fade e sara kua na mo.’

¹¹Tongaso KOTA GBIA atokua Gédéon, Bedan, Yefte na mbi Samuel ti zi ala na maboko ti awato so angoro ala. Tongaso si ala lingbi ti lango na ya ti kodro ni na siriri.

¹²Me so ala baa Nahash, gbia ti azo ti Amon aga ti tiri bira na ala, ala tene na mbi: ‘E ye mbeni gbia ti duti na li ti e!’ Andaa KOTA GBIA, Nzapa ti ala laa ayeke fade gbia ti ala.

¹³Fadeso, baa gbia so ala soro so laa; gbia so ala hunda so laa. KOTA GBIA amu na ala gbia awe.

¹⁴Tongana ala kpe mbeto ti KOTA GBIA, Nzapa ti ala, tongana ala sara kua na lo, ala ma yanga ti lo, tongana ala ke andia ti lo pepe, fade ala wani na gbia so ayeke na li ti ala, ala yeke ngba na peko ti KOTA GBIA, Nzapa ti ala; ye kue ayeke ga nzoni.

¹⁵Me tongana ala ma yanga ti KOTA GBIA pepe, tongana ala ke andia ti lo, fade maboko ti KOTA GBIA ayeke sara ngangu na ala tongana ti so lo sara ando na akotara ti ala so.

¹⁶Fadeso, ala luti ge, fade ala yeke baa na le ti ala ye ti kpene so KOTA GBIA ayeke sara.

¹⁷Ngoi so e yeke daa so, ayeke ngoi ti fango le ti *ble pepe? Mbi yeke sambela KOTA GBIA titene lo sara si bekpa asungba si ngu-Nzapa apika. Tongaso si ala hinga atene, ala sara sioni mingi na KOTA GBIA na lege so ala hunda mbeni gbia.”

¹⁸Samuel asambela KOTA GBIA si KOTA GBIA atokua bekpa na ngu-Nzapa gi na lango ni so. Mbeto ti KOTA GBIA na mbeto ti Samuel agbu azo ti kodro mingi.

¹⁹Azo ni kue atene na Samuel: “Sambela KOTA GBIA, Nzapa ti mo ndali ti e azo ti gbe ti mo si e kui pepe. Biani, na ndö ti asiokpari so kue e sara, e kiri e zia mbeni na ndö ni na lege ti so e hunda mbeni gbia.”

²⁰Samuel atene na azo ni: “Ala sara mbeto pepe! Ala wani laa asara asioni ye so kue. Me ala hon yongoro na KOTA GBIA pepe, ala sara kua na lo na be ti ala kue.

²¹Ala gue yongoro na lo pepe; tongaso pepe, fade ala yeke gue na peko ti anzapa so ayeke asenge ye, anzapa so alingbi nga ti zi ala na ya ti ye ti ngangu pepe, ngbanga ti so anzapa ni ayeke asenge ye.

²²Biani, ndali ti kota iri ti lo, KOTA GBIA ayeke zia azo ti lo pepe, ngbanga ti so lo ye ti mu ala ti ga azo ti lo.

²³Ti mbi, fade mbi yeke sambela KOTA GBIA lakue ndali ti ala; mbi yeke ngba ti fa na ala nzoni lege nga na lege so ayeke mbirimbiri. Tongana mbi sara tongaso pepe, andaa mbi sara sioni mingi na KOTA GBIA.

²⁴Gi ye oko, ala kpe mbeto ti KOTA GBIA, ala sara kua na lo na lege ti mbirimbiri, na be ti ala kue. Ayeke nzoni ala hinga aye ti kpene so lo sara ndali ti ala.

²⁵Me tongana ala sara sioni, fade a yeke nika ala, ala na gbia ti ala kue.”