Read La Bible en Sango courant – Mbeti ti Nzapa 1 Samuel 16 Bible Online

1 Samuel 16 - La Bible en Sango courant – Mbeti ti Nzapa bible

1 Samuel 16

¹*KOTA GBIA atene na Samuel: “Fade mo yeke ngba ti sara mawa ndali ti Saul ngbii asi lawa? Mbi ke lo awe; lo yeke ngba gbia ti Israel mbeni pepe. Mo tuku mafuta na ya ti didi ti mo, mo londo mo gue. Mbi yeke tokua mo na ndo ti Yese, zo ti Betlehem, ngbanga ti so mbi soro mbeni molenge ti lo oko titene lo ga gbia.”

²Samuel atene: “Mbi yeke gue tongana nyen? Tongana Saul ama tënë so, fade lo yeke fâ mbi!” KOTA GBIA atene: “Fade mo yeke mu mbeni molenge ti bagara na tere ti mo si mo tene mo ga ti mu *sandaga na KOTA GBIA.

³Na ndembe ti mungo sandaga ni, fade mo iri Yese. Mbi wani, mbi yeke fa na mo ye so mo lingbi ti sara. Zo so mbi yeke fa ande lo na mo, mo yeke tuku mafuta na li ti lo titene lo ga gbia.”

⁴Samuel asara ye so KOTA GBIA atene tënë ni si lo gue na Betlehem. *Akangba ti kodro aga awara lo, tere ti ala ayeke do na mbeto si ala hunda lo, atene: “Mo ga na e nzoni tënë?”

⁵Samuel akiri tënë: “Een, mbi ga ti mu sandaga na KOTA GBIA. Ala zia tere ti ala nde ndali ti Nzapa, ala ga, e gue, e mu sandaga ni.” Samuel azia Yese na amolenge ti lo nde ndali ti Nzapa si lo iri ala titene ala ga aduti na matanga ti mungo sandaga ni.

⁶So ala si awe, Samuel abaa Eliab si lo tene na be ti lo, lo tene: “Taa zo so KOTA GBIA asoro lo laa.”

⁷Me KOTA GBIA atene na Samuel: “Mo baa pendere ti lo wala yongo ti lo pepe. Mbi ke lo awe. Bango ndo ti mbi ayeke tongana bango ndo ti azo pepe. Azo ayeke baa ti ala gi ye so ayeke pika le ti ala; me mbi yeke baa ti mbi be ti zo.”

⁸Yese airi Abinadab titene lo ga si Samuel abaa lo. Me Samuel atene: “Lo so laa KOTA GBIA asoro lo pepe.”

⁹Yese airi Shama titene lo ga si Samuel abaa lo. Me Samuel atene: “Lo so laa KOTA GBIA asoro lo pepe.”

¹⁰Yese airi amolenge ti lo ti koli mbarambara titene Samuel abaa ala; Samuel atene na lo: “Ala so kue so, *KOTA GBIA asoro zo oko na popo ti ala pepe.”

¹¹Samuel atene na Yese: “Amolenge ni kue laa?” Yese akiri tënë: “Angba kete molenge ni. Lo laa lo yeke bata anyama.” Samuel atene na Yese: “Tokua mbeni zo airi lo. Lo ga kue si e te kobe.”

¹²Yese atokua mbeni zo, amu molenge ni aga na lo. Lo be, lo pendere, le ti lo ayeke za pendere. KOTA GBIA atene na Samuel: “Lo laa, londo mo tuku mafuta na li ti lo.”

¹³Samuel amu didi so mafuta ayeke na ya ni si lo tuku mafuta ni na li ti David na le ti a-ita ti lo. Gi na lango ni so, yingo ti KOTA GBIA aga na ndö ti David. Na pekoni, Samuel amu lege akiri na Rama.

¹⁴Yingo ti KOTA GBIA asigigi na tere ti Saul si mbeni sioni yingo so KOTA GBIA atokua ayeke sara lo kirikiri.

¹⁵Azo ti gbe ti Saul atene na lo: “Baa, Nzapa atokua sioni yingo si ayeke sara mo kirikiri.

¹⁶Ayeke nzoni gbia amu yanga si e gi mbeni koli so ahinga ti pika kundi. Na ndembe so sioni yingo aga na ndö ti mo, fade lo yeke pika kundi si be ti mo aduti nzoni.”

¹⁷Saul akiri tënë na azo ti kua ti lo: “Ala gi zo so ahinga ti pika mozoko nzoni, ala ga na lo na mbi.”

¹⁸Mbeni zo ti kua oko akiri tënë, atene: “Mbi baa mbeni molenge ti Yese so ayeke lango na Betlehem. Molenge ni ayeke pika mozoko nzoni, lo yeke mbeni kpengba molenge, lo yeke mbeni ngangu turugu; lo yeke tene tënë na ndara; lo yeke mbeni pendere koli, KOTA GBIA ayeke na lo.”

¹⁹Saul atokua azo na Yese ti tene na lo, atene: “Mo tokua na mbi molenge ti mo David; lo so lo yeke bata anyama so.”

²⁰Yese amu lele, mapa na bozo so a sara ni na poro ti nyama si vin ayeke na ya ni, lo mu nga molenge ti ngasa si lo mu na molenge ti lo David titene lo gue na ni na Saul.

²¹David asi na Saul si lo to nda ti sara kua na lo. Saul aye lo mingi, lo ga zo ti yongo aye ti bira ti Saul.

²²Saul atokua ndo na Yese, atene: “Ayeke nzoni David angba asara kua na mbi, ngbanga ti so mbi baa lo, lo yeke nzoni na le ti mbi.”

²³Na ndembe so sioni yingo so Nzapa atokua aga na ndö ti Saul, David ayeke mu kundi ti lo si lo yeke pika ni. Saul ayeke duti kpoo, be ti lo aduti nzoni si sioni yingo ni ayeke sigigi na ya ti lo ti hon.