Read La Bible en Sango courant – Mbeti ti Nzapa 1 Samuel 26 Bible Online

1 Samuel 26 - La Bible en Sango courant – Mbeti ti Nzapa bible

1 Samuel 26

¹Azo ti Zif ague, awara Saul na gbata ti Gibea si ala tene na lo: “David ahonde tere ti lo na li ti hoto ti Hakila so abaa le na benyama, mo hinga pepe?”

²Saul amu akpengba turugu ti Israel saki ota na tere ti lo, lo mu lege, lo gue na benyama ti Zif ti gi David.

³Saul asara bâbâ ti lo na li ti hoto ti Hakila so abaa le na benyama, na tere ti lege. David angba ti duti na benyama; lo ma a tene, Saul aga na benyama ti tumba peko ti lo.

⁴Lo tokua ambeni zo ti *bembe ndo. Tongaso lo hinga so Saul asi biani.

⁵David alondo ague, asi na ndo so Saul asara bâbâ ti lo daa. Lo baa ndo so Saul na Abner, molenge ti Ner, makonzi ti aturugu ayeke lango daa. Saul alango taa gi na ya ti bâbâ ni si aturugu ti lo ayeke lango na tere ti lo, angoro lo.

⁶David airi Ahimelek, zo ti mara ti Het, na Abishai, ita ti Yoab so iri ti mama ti lo ayeke Seruya; lo hunda ala, lo tene: “Zo wa laa aye titene mbi na lo, e gue ngbii e si na ya ti bâbâ ti Saul, zo wa?” Abishai akiri tënë: “Fade mbi na mo, e yeke gue.”

⁷David na Abishai alondo na bi ni, ala gue, asi na tere ti aturugu ni. Baa, Saul ayeke lango ti lo taa gi na ya ti bâbâ ni. Lo kpo likongo ti lo na sese, nduru na mbage ti li ti lo. Abner na aturugu ni ayeke lango na tere ti lo angoro lo.

⁸Abishai atene na David: “Laso Nzapa azia wato ti mo na maboko ti mo awe. Tongana mo ye mbi kpo lo na likongo, mbi pete lo na sese. Mbi ye ti kpo lo gi fani oko awe.”

⁹Me David atene na Abishai: “Fâ lo pepe. Zo so *KOTA GBIA atuku mafuta na li ti lo awe so, tongana mbeni zo afâ lo, fade a yeke zia zo ni senge?”

¹⁰David atene: “KOTA GBIA ayeke na fini! KOTA GBIA wani laa ayeke fâ lo. Tongana lango ti kuâ ti lo alingbi, fade lo yeke kui, wala tongana lo gue na bira, fade lo yeke kui.

¹¹Ayeke nzoni KOTA GBIA abata mbi si mbi sara sioni pepe na zo so KOTA GBIA atuku mafuta na li ti lo! Mu gi likongo so ayeke nduru na mbage ti li ti lo, nga na ngângâ ti ngu si e gue.”

¹²David amu likongo nga na ngângâ ti ngu so ayeke nduru na mbage ti li ti Saul si ala hon. Mbeni zo oko abaa ala pepe, mbeni zo oko ahinga ye daa pepe, mbeni zo oko azingo na lango pepe. Ala kue akui na lango; KOTA GBIA laa asara si kota lango ahon ndö ti ala biani.

¹³David ahon na mbage ti popo-hoto. Kâ, lo luti yongoro na li ti hoto; popo ti lo na Saul ayo.

¹⁴David adekongo na mbage ti aturugu; lo iri Abner, molenge ti Ner, lo tene: “Abner, mo kiri tënë na mbi pepe?” Abner akiri tënë, atene: “Mo so mo yeke dekongo na mê ti gbia so, mo yeke zo wa?”

¹⁵David atene na Abner: “Mo yeke taa koli laa? Mbeni turugu na Israel ti lingbi na mo ayeke daa pepe! Ngbanga ti nyen si mo bata gbia, kota zo ti mo pepe? Mbeni zo aga ti fâ gbia, kota zo ti mo.

¹⁶Ye so mo sara so ayeke nzoni pepe. KOTA GBIA ayeke na fini! Ala lingbi na kuâ, ngbanga ti so ala bata kota zo ti ala pepe, lo so KOTA GBIA atuku mafuta na li ti lo. Fadeso, baa si. Likongo ti gbia na ngângâ ti ngu so ayeke nduru na mbage ti li ti lo so ayeke na ndo wa?”

¹⁷Saul ahinga atene, so go ti David laa; lo hunda ndo, lo tene: “David, molenge ti mbi, so taa go ti mo laa?” David akiri tënë: “Go ti mbi laa gbia, kota zo ti mbi.”

¹⁸David akiri atene: “Gbia ti mbi, mo yeke tumba peko ti mbi, zo ti kua ti mo ngbanga ti nyen? Nyen laa mbi sara, nyen? Sioni ti nyen laa mbi sara?

¹⁹Fadeso, ayeke nzoni gbia, kota zo ti mbi ama tënë ti mbi, zo ti kua ti lo nzoni. Tongana KOTA GBIA laa apusu mo ti sara sioni na mbi, ayeke nzoni *sandaga so azo amu na lo ade be ti lo. Me tongana azo laa apusu mo, ayeke nzoni KOTA GBIA adeba ala, ngbanga ti so ala laa atumba mbi na kodro fadeso; ala laa ake titene mbi lango na kodro so KOTA GBIA amu na azo ti lo. Na sarango ye tongaso, ala ye ti tene na mbi: ‘Gue, mo voro ambeni nzapa nde!’

²⁰Fadeso mbi ye titene mene ti mbi atuku na sese yongoro na le ti KOTA GBIA pepe. Gbia ti Israel amu azo na tere ti lo ti tumba peko ti buba mandere tongana ti so azo ayeke tumba peko ti dodoro na li ti ahoto so.”

²¹Saul atene: “Mbi sara siokpari awe. Molenge ti mbi David, kiri, mo ga. Mbi yeke kiri ti sara sioni na mo oko pepe, ngbanga ti so na bi so fini ti mbi aga mbeni kota ye na le ti mo. Taa-tënë mbi sara ye tongana zo so mbeni ye ayeke sara li ti lo. Mbi handa tere ti mbi ngangu.”

²²David akiri tënë: “Baa, likongo ti gbia laa; mbeni zo ti kua ti mo oko aga amu ni.

²³Fade KOTA GBIA ayeke sara na zo oko oko alingbi na mbirimbiri ye nga na nzoni ye so lo sara. Laso, KOTA GBIA azia mo na maboko ti mbi si mbi ke ti sara sioni na zo so KOTA GBIA atuku mafuta na li ti lo titene lo ga gbia so.

²⁴Tongana fini ti mo aga mbeni kota ye na le ti mbi laso, ayeke nzoni fini ti mbi aga nga mbeni kota ye na le ti KOTA GBIA si lo soo mbi na ya ti ye ti ngangu kue.”

²⁵Saul atene na David: “Ayeke nzoni Nzapa asara tufa na ndö ti mo, molenge ti mbi. Taa-tënë, mo yeke sara ande akota ye si mo yeke so benda.” David ahon ti lo si Saul akiri na ndo ti lo.