Read La Bible en Sango courant – Mbeti ti Nzapa 1 Samuel 30 Bible Online

1 Samuel 30 - La Bible en Sango courant – Mbeti ti Nzapa bible

1 Samuel 30

¹David na azo ti lo atambula na ya ti lango ota si ala si na Siklag. Andaa azo ti Amalek aga atiri bira na Mbongo ti Israel nga na Siklag. Ala buba gbata ni si ala gbi ni.

²Ala gbu awali ti gbata ni, amolenge nga na akota zo ti ga azo ti kanga. Ala fâ zo oko pepe; me ala mu azo ni kue ague na ala.

³Tongana David na azo ti lo asi na gbata ni, ala baa so azo agbi gbata ni; ala mu awali ti azo ni, amolenge ti ala ti koli na ti wali ahon na ala.

⁴David na amba ti lo ati na kota toto; ala toto ngbii ala woko kue, ala yeke na ngangu ti kiri ti toto pepe.

⁵Azo ni amu awali use ti David ahon na ala: Ahinoam, zo ti gbata ti Yizreel na Abigail so ayeke lani wali ti Nabal, zo ti Karmel.

⁶Be ti David afun kue, ngbanga ti azo aye ti bo lo na têne ti fâ lo. Be ti zo oko oko aso mingi ndali ti amolenge ti lo ti koli na ti wali. Me David awara ngangu ndali ti *KOTA GBIA, Nzapa ti lo.

⁷David atene na wayango-sandaga Abiatar, molenge ti Ahimelek, atene: “Mbi gbu gere ti mo, ga na mbi aye ti hundango na nda ti ye na Nzapa.” Abiatar aga na lo aye ni.

⁸David ahunda KOTA GBIA, atene: “Tongana mbi tumba peko ti bongbi ti azo so ahon so, fade mbi yeke wara ala?” KOTA GBIA atene na lo: “Mo tumba peko ti ala; fade mo yeke wara ala si mo yeke zi azo ti mo na maboko ti ala.”

⁹David na azo ti lo ngbangbo omene alondo ti gue. Ala si na kete ngu ti Besor si ambeni zo ni angba na ndo so.

¹⁰Azo ngbangbo use awoko kue, ala lingbi ti fâ kete ngu ti Besor pepe si ala ngba na ndo so. David na azo ngbangbo osio laa angba ti tumba peko ti azo ni.

¹¹Azo ti David awara mbeni maseka-koli ti Ezipte na ya ti ngonda. Ala mu lo, aga na lo na David. Ala mu na lo kobe lo te, ala mu na lo ngu, lo nyon.

¹²Ala mu na lo gba ti aholengo le ti fige nga na gba ti aholengo le ti vinye so akpa gatoo. Tongana lo te ni awe, ngangu akiri na ya ti tere ti lo, ngbanga ti so na ya ti lango ota kue, lo te kobe pepe, lo nyon ngu pepe.

¹³David ahunda lo, atene: “Wa ti mo ayeke zo wa? Mo londo na ndo wa?” Lo kiri tënë: “Mbi yeke zo ti Ezipte, mbi yeke ngbaa ti mbeni zo ti Amalek. Wa ti mbi azia mbi ahon asara laso lango ota, ngbanga ti so tere ti mbi aso.

¹⁴E gue lani e tiri bira na mbage ti Mbongo ti azo ti Kereti, na sese ti Juda nga na Mbongo ti azo ti Kaleb. E gbi gbata ti Siklag.”

¹⁵David atene na lo: “Mo lingbi ti fa na mbi lege so azo ni ahon daa pepe?” Lo kiri tënë: “Ayeke nzoni mo deba yanga ti mo na iri ti Nzapa so fade mo yeke fâ mbi pepe, mo yeke kiri ti zia mbi na maboko ti wa ti mbi pepe si mbi gue na mo na ndo so bongbi ti azo so ayeke daa.”

¹⁶Tongaso zo ti Ezipte so ague na David na ndo so azo ti Amalek ayeke daa. Azo ti Amalek amu ya ti kodro kue, ala yeke te, ala yeke nyon, ala yeke sara matanga na gba ti aye so ala gbu na peko ti bira na kodro ti azo ti Filistii nga na kodro ti Juda.

¹⁷David afâ ala, ti londo na ndaperere ngbii asi kekereke na lakui. Mbeni zo oko awara lege ti kpe pepe; gi amaseka ngbangbo osio so ako na ndö ti *azambala laa akpe ahon.

¹⁸Aye so kue azo ti Amalek amu so, David azi ni na maboko ti ala; lo zi nga awali ti lo use.

¹⁹Azo so lani azo ti Amalek agbu ala so, amolenge wala akota zo, wala amolenge-koli na amolenge-wali, zo oko na popo ti ala agirisa pepe. Ataa aye so ala gbu na peko ti bira, ye oko agirisa nga pepe. David amu aye so kue akiri na ni.

²⁰David amu ataba, angasa nga na abagara kue. Azo so ayeke tambula na dawa ti anyama ni ti fa lege na ala atene: “Baa aye so David agbu na peko ti bira laa!”

²¹David asi nduru na tere ti azo ngbangbo use so lani awoko kue si ala lingbi ti mu peko ti lo pepe si ala ngba na tere ti kete ngu ti Besor so. Azo ni alondo ti ga ti wara David na azo ti lo na lege. David ague nduru na tere ti ala si lo bara ala.

²²Na popo ti azo so amu peko ti David, ambeni zo ti sioni na abuba zo ayeke daa. Ala tene: “Aye so e gbu na peko ti bira so, azo so e na ala, e gue na bira pepe, fade e yeke mu na ala ye oko pepe. Me e yeke mu na ala gi awali ti ala na amolenge ti ala titene ala mu ala ague na ala.”

²³Me David atene: “A-ita ti mbi, ye so *KOTA GBIA amu na e so, e sara ni tongaso pepe. KOTA GBIA laa abata e, lo laa lo zia na maboko ti e bongbi ti azo so aga abuba kodro ti e.

²⁴Zo wa laa ayeke yeda ande na tënë ti ala so? Azo so ague ti tiri bira na azo so aduti na tere ti akungba ti bata ni, fade ala kue awara ye legeoko.”

²⁵Gi na lango ni so, yanga so David amu aga tongana ndia ndali ti azo ti Israel; ngangu ti ndia so angba laso.

²⁶So David asi na Siklag awe, lo tokua ambeni ye so ala gbu na peko ti bira so na *akangba ti Juda, ala so ayeke akamarade ti lo; lo tene na ala: “Aye so e gbu na peko ti bira na maboko ti awato ti KOTA GBIA so, ti ala laa.”

²⁷Lo tokua nga ambeni ye ni na akangba ti Betel, ala ti Ramot so ayeke na mbage ti Mbongo ti Israel, ala ti Yatir,

²⁸ala ti Aroer, ala ti Sifmot, ala ti Eshtemoa,

²⁹ala ti Rakal, ala ti agbata ti azo ti Yerameli, ala ti azo ti mara ti Keni,

³⁰ala ti Horma, ala ti Bor-Ashan, ala ti Atak,

³¹ala ti Hebron nga na ando so kue David na aturugu ti lo azia gere ti ala daa.