Read La Bible en Sango courant – Mbeti ti Nzapa 1 Samuel 7 Bible Online

1 Samuel 7 - La Bible en Sango courant – Mbeti ti Nzapa bible

1 Samuel 7

¹Azo ti gbata ti Kiriat-Yearim aga si ala mu sanduku ti *mbuki ti *KOTA GBIA ague na ni; ala zia ni na da ti Abinadab so ayeke na ndö ti hoto. Na pekoni, ala mu Elazar, molenge ti Abinadab azia lo nde titene lo bata sanduku ti mbuki ni.

²Ngbene ye na lango so ala zia sanduku ti mbuki ti KOTA GBIA na Kiriat-Yearim, sanduku ni aduti kâ asara ngu baleuse awe. Azo ti Israel kue aye ti kiri ti mu peko ti KOTA GBIA.

³Tongaso, Samuel atene na azo ti Israel kue, atene: “Tongana ala kiri na KOTA GBIA na be ti ala kue, ayeke nzoni ala zi na popo ti ala anzapa ti awande nga na ayanda ti *Astarte. Ala zia be ti ala na ndö ti KOTA GBIA, ala sara kua gi na lo oko si fade lo zi ala na maboko ti azo ti Filistii.”

⁴Azo ti Israel azi ayanda ti nzapa *Baal na ti nzapa-wali Astarte na popo ti ala si ala sara kua gi na KOTA GBIA oko.

⁵Samuel atene: “Ala bongbi azo ti Israel kue na Mispa. Fade mbi yeke sambela KOTA GBIA ndali ti ala.”

⁶Azo ti Israel abongbi na Mispa. Ala to ngu si ala tuku ni na sese na dawa ti KOTA GBIA. Na lango ni so, ala ke ti te kobe si ala tene: e sara siokpari so ake KOTA GBIA. Kâ na Mispa laa, Samuel asara kua ti wayango-sandaga na popo ti azo ti Israel.

⁷Azo ti Filistii ama a tene, azo ti Israel abongbi tere ti ala na Mispa si agbia ti azo ti Filistii alondo ti gue ti tiri bira na azo ti Israel. Azo ti Israel ama tënë ni si mbeto asara ala.

⁸Ala tene na Samuel: “Mo zia e pepe; mo voro KOTA GBIA, Nzapa ti e titene lo soo e na maboko ti azo ti Filistii.”

⁹Samuel amu kete taba so angba ti nyon me si lo mu na *sandaga so a yeke gbi ni kue na wâ na KOTA GBIA. Samuel avoro KOTA GBIA ndali ti azo ti Israel. KOTA GBIA ama lo.

¹⁰Na ndembe so Samuel ayeke mu sandaga so a yeke gbi ni kue na wâ, azo ti Filistii aga nduru ti tiri bira na azo ti Israel. Me na lango ni so, KOTA GBIA asara si bekpa asungba ngangu na ndö ti azo ti Filistii. Lo zia kota mbeto na be ti ala si ala ti na gbe ti azo ti Israel.

¹¹Azo ti Israel asigigi na Mispa, ala tumba peko ti azo ti Filistii ngbii asi na Bet-Kar si ala fâ azo ti Filistii gbani.

¹²Samuel amu mbeni têne si lo zia ni na popo ti Mispa na ndo so a iri ni Pembe. Lo di iri ti têne ni Eben-Ezer si lo tene: “KOTA GBIA amu maboko na e ngbii asi na ndo so.”

¹³Azo ti Filistii ati na gbe ti azo ti Israel. Ala kiri ali na sese ti Israel pepe. Na ya ti alango so kue Samuel angba na fini, maboko ti KOTA GBIA asara ngangu na azo ti Filistii.

¹⁴Agbata ti azo ti Israel so lani azo ti Filistii amu ni so, agbata ni akiri na maboko ti azo ti Israel, ti londo na Ekron ngbii asi na Gat. Azo ti Israel amu sese so angoro agbata ni. Siriri akiri nga na popo ti azo ti Israel na azo ti mara ti Amori.

¹⁵Samuel aduti wafango-ngbanga na Israel na lango so kue lo ngba na fini.

¹⁶Na ya ti ngu oko oko, lo yeke gue na Betel, na Gilgal nga na Mispa ti fâ ngbanga ti azo ti Israel na ando so kue.

¹⁷Na pekoni, lo yeke kiri na Rama, ngbanga ti so da ti lango ti lo ayeke kâ. Kâ laa lo yeke fâ ngbanga ti azo ti Israel si lo sara nga gbalaka ndali ti KOTA GBIA.