Read La Bible en Sango courant – Mbeti ti Nzapa 1 Samuel 9 Bible Online

1 Samuel 9 - La Bible en Sango courant – Mbeti ti Nzapa bible

1 Samuel 9

¹Mbeni koli ti mara ti Benjamin ayeke daa; iri ti lo ayeke Kish. Lo yeke molenge ti Abiel, Abiel ayeke molenge ti Seror, Seror ayeke molenge ti Bekorat, Bekorat ayeke molenge ti Afia. Kish ayeke zo ti mosoro;

²lo yeke na molenge-koli so iri ti lo Saul; lo yeke mbeni maseka-koli so lo yeke pendere mingi. Na popo ti azo ti Israel, mbeni zo so apendere ti lingbi na lo ayeke daa pepe. Lo yo lo hon azo ti Israel kue.

³Mbeni lâ, amama ti lele ti Kish, babâ ti Saul agirisa. Kish atene na molenge ti lo Saul, atene: “Mo mu mbeni zo ti kua oko na tere ti mo, mo gue, mo gi amama ti lele so agirisa so.”

⁴Saul na zo ti kua ni ahon na sese ti Efraim, ndo so ahoto ayeke daa; ala hon na ya ti sese ti Shalisha, ala wara anyama ni pepe. Ala hon na ya ti sese ti Shaalim, ye oko ala wara pepe. Ala hon na ya ti sese ti Benjamin, ala gi ndo gbaa.

⁵So ala si na sese ti Suf awe, Saul atene na zo ti kua ti lo: “E kiri na kodro. Tongana e kiri pepe, fade be ti babâ ti mbi ayeke girisa na tënë ti amama ti lele ni si lo yeke gi be ti lo ndali ti e.”

⁶Zo ti kua ni atene na lo: “Mbeni zo ti Nzapa ayeke na ya ti gbata so. Azo ane lo mingi; tënë so kue lo yeke tene, ye ni ayeke si biani. E gue, e baa lo si. E hinga pepe, fade lo yeke fa na e lege so e lingbi ti mu ni.”

⁷Saul atene na zo ti kua ti lo ni: “Tongana e gue na ndo ti zo ti Nzapa so, nyen laa e yeke mu ande na lo, nyen? Mbeni mapa oko angba na ya ti bozo ti e pepe; e yeke nga na mbeni kadoo ti mu na lo pepe. Nyen laa e yeke na ni, nyen?”

⁸Zo ti kua ni akiri tënë na Saul: “Mbi yeke na kete le ti nginza na maboko ti mbi. Fade mbi yeke mu ni na zo ti Nzapa si lo fa na e lege so e lingbi ti hon daa.”

⁹Ando na kodro ti Israel, tongana azo aye ti gue ti hunda mbeni ye na Nzapa, ala yeke tene: “Ala ga, e gue, e baa zo ti bango nda ti aye.” Biani, zo so azo ayeke iri lo fadeso wayanga-Nzapa, ando ala yeke iri lo “zo ti bango nda ti aye.”

¹⁰Saul atene na zo ti kua ti lo: “So nzoni! E gue.” Tongaso ala mu lege ague na gbata so zo ti Nzapa ayeke lango daa.

¹¹So ala ma hoto ti gue na gbata ni, ala wara amaseka-wali so ague ti to ngu. Ala hunda amaseka-wali ni atene: “Zo ti bango nda ti aye ayeke daa?”

¹²Amaseka-wali ni akiri tënë na ala: “Een, lo yeke daa! Singo ti lo laa! Ala gue hio si. Lo ga na ya ti gbata ni laso laso, ngbanga ti so azo ti gbata ni ayeke mu *sandaga laso na Nzapa na ndo so a leke na ndö ti hoto.

¹³Gi so ala yeke li na ya ti gbata ni, ala yeke wara lo kozoni si lo gue na ndö ti hoto ti te kobe. Zo oko alingbi ti te kobe pepe kozoni si lo ga, ngbanga ti so lo laa lo yeke sara tufa na ndö ti sandaga ni. Azo so a tisa ala so ayeke te ande ti ala kobe ni na peko. Ala gue hio fafadeso si ala wara lo.”

¹⁴Ala gue ti li na ya ti gbata ni. Na ndembe so ala yeke li na ya ti gbata ni, andaa Samuel ayeke sigigi ti gue na ndö ti hoto si ala wara tere.

¹⁵Lango oko kozoni si Saul aga, *KOTA GBIA atene tënë ni na Samuel awe, atene:

¹⁶“Kekereke gi na oko ngbonga so, fade mbi yeke tokua na mo mbeni zo ti mara ti Benjamin titene mo tuku mafuta na li ti lo si lo ga makonzi ti azo ti Israel, azo ti mbi. Lo laa lo yeke zi azo ti mbi na maboko ti azo ti Filistii. Biani, mbi baa mawa ti azo ti mbi si mbi ma toto ti ala.”

¹⁷Gi so Samuel abaa Saul awe, KOTA GBIA atene na lo: “Baa koli so mbi tene tënë ti lo na mo laa. Lo laa lo yeke sara ande komandema na ndö ti azo ti mbi.”

¹⁸Saul ague nduru na tere ti Samuel na yanga ti gbagba ti gbata ni si lo tene na lo: “Mbi gbu gere ti mo, fa na mbi da so zo ti bango nda ti aye ayeke lango daa.”

¹⁹Samuel akiri tënë na Saul, atene: “Mbi zo ti bango nda ti aye laa. Mo hon na dawa, e gue na ndö ti hoto. Fade mbi na ala e yeke te kobe laso. Kekereke na ndaperere, mbi yeke fa na mo tënë na ndö ti aye so agbu be ti mo. Na pekoni, mbi yeke zia lege na mo ti gue.

²⁰Ti amama ti lele ti mo so agirisa asara lango ota awe so, mo kiri mo gi be ti mo ndali ti ala pepe, a wara ala awe. Anzoni ye so ayeke na Israel so ayeke ti zo wa? Ayeke ti mo wala ti asewa ti babâ ti mo pepe?”

²¹Saul akiri tënë: “So tënë ti nyen? Mbi yeke ti mbi zo ti mara Benjamin. Benjamin ayeke mbeni kete mara na popo ti amara ti Israel. Sewa ti mbi ayeke gi kete sewa na ya ti amara ti azo ti Benjamin. Mo tene mara ti tënë tongaso na mbi ngbanga ti nyen?”

²²Samuel amu Saul nga na zo ti kua ti lo, ala li na ya ti da si lo mu na ala kozo ndo na dawa ti azo so a tisa ala. Wungo ti azo so kue atisa ala ayeke nduru na baleota.

²³Samuel atene na zo ti tongo kobe ni: “Nyama so mbi tene na mo ti zia nde so, ga na ni.”

²⁴Zo ti tongo kobe ni aga na ngbongboro gere ti nyama nga na damba ni, lo zia na gbe ti Saul. Samuel atene: “Tanga ti kobe ni laa. Na lango so mbi tisa azo so, mbi bata ni ndali ti mo, mu ni mo te.” Na lango ni so, Saul na Samuel ate kobe.

²⁵Na pekoni, ala londo na ndö ti hoto si ala kiri na kodro. Samuel na Saul asara lisoro na li ti da, na ndo so a leke titene azo aduti daa.

²⁶Na ndade ni na kota ndaperere, Saul na zo ti kua ti lo azingo. So ndo ahan awe, Samuel airi Saul na li ti da, lo tene na lo: “Saul, londo mbi gue, mbi zia peko ti mo na lege.” Saul alondo si lo na Samuel kue ahon.

²⁷So ala si na maka ti gbata ni awe, Samuel atene na Saul: “Mo tene na zo ti kua ti mo ti hon na dawa ti e.” Zo ti kua ni ahon. Samuel atene: “Ti mo, luti kete si. Mbi ye ti fa na mo tënë so KOTA GBIA atene.”