Read La Sankta Biblio esparanto 1 Kroniko 16 Bible Online

1 Kroniko 16 - La Sankta Biblio esparanto bible

1 Kroniko 16

¹Kaj oni alportis la keston de Dio, kaj metis ĝin interne de la tendo, kiun David starigis por ĝi; kaj oni alportis bruloferojn kaj pacoferojn antaŭ Dion.

²Kiam David finis la oferadon de la bruloferoj kaj de la pacoferoj, li benis la popolon en la nomo de la Eternulo.

³Kaj li disdonis al ĉiuj Izraelidoj, kiel al la viroj, tiel ankaŭ al la virinoj, al ĉiu po unu bulo da pano, po unu porcio da viando, kaj po unu peniko da sekvinberoj.

⁴Kaj li starigis antaŭ la kesto de la Eternulo el la Levidoj servantojn, por kantadi gloron, dankon, kaj laŭdon al la Eternulo, Dio de Izrael:

⁵la ĉefo estis Asaf, la dua estis Zeĥarja, poste Jeiel, Ŝemiramot, Jeĥiel, Matitja, Eliab, Benaja, Obed-Edom, kaj Jeiel, kun psalteroj kaj harpoj, kaj Asaf sonigadis per cimbaloj;

⁶Benaja kaj Jaĥaziel, la pastroj, estis kun trumpetoj ĉiam antaŭ la kesto de interligo de Dio.

⁷Tiam, en tiu tago, David la unuan fojon aranĝis dankokanton al la Eternulo per Asaf kaj liaj fratoj:

⁸Gloru la Eternulon, voku Lian nomon; Sciigu inter la popoloj Liajn farojn.

⁹Kantu al Li, muziku al Li; Parolu pri ĉiuj Liaj mirakloj.

¹⁰Laŭdu Lian sanktan nomon; Ĝoju la koro de tiuj, kiuj serĉas la Eternulon.

¹¹Turnu vin al la Eternulo kaj al Lia potenco; Serĉu ĉiam Lian vizaĝon.

¹²Memoru Liajn miraklojn, kiujn Li faris; Liajn signomiraklojn kaj la juĝojn de Lia buŝo;

¹³Vi, semo de Izrael, Lia sklavo, Filoj de Jakob, Liaj elektitoj.

¹⁴Li estas la Eternulo, nia Dio; Sur la tuta tero estas Liaj juĝoj.

¹⁵Memoru eterne Lian interligon, La vorton, kiun Li testamentis por mil generacioj,

¹⁶Kiun Li interkonsentis kun Abraham Kaj ĵuris al Isaak.

¹⁷Li metis ĝin por Jakob kiel leĝon, Por Izrael kiel eternan interligon,

¹⁸Dirante: Al vi Mi donos la landon Kanaanan Kiel vian parton heredan.

¹⁹Kiam vi estis malgrandnombraj, Malmultaj, kaj fremduloj en ĝi,

²⁰Kaj ili iradis de popolo al popolo, El unu regno al alia gento,

²¹Tiam Li al neniu permesis premi ilin, Kaj Li punis pro ili reĝojn;

²²Dirante: Ne tuŝu Miajn sanktoleitojn, Kaj al Miaj profetoj ne faru malbonon.

²³Kantu al la Eternulo la tuta tero; Proklamu de tago al tago Lian savon.

²⁴Rakontu inter la popoloj Lian gloron, Inter ĉiuj gentoj Liajn miraklojn.

²⁵Ĉar la Eternulo estas granda kaj tre glorinda; Li estas timinda super ĉiuj dioj;

²⁶Ĉar ĉiuj dioj de la popoloj estas idoloj; Sed la Eternulo kreis la ĉielon.

²⁷Gloro kaj majesto estas antaŭ Li; Forto kaj beleco estas sur Lia loko.

²⁸Tributu al la Eternulo, familioj de la popoloj; Tributu al la Eternulo gloron kaj potencon.

²⁹Tributu al la Eternulo honoron de Lia nomo; Alportu donacon, kaj venu antaŭ Lin; Adorkliniĝu antaŭ la Eternulo en sankta ornamo.

³⁰Tremu antaŭ Li la tuta tero; Li aranĝis ja la mondon, ke ĝi ne ŝanceliĝu.

³¹Ĝoju la ĉielo, kaj estu gaja la tero; Kaj oni diru inter la nacioj: La Eternulo reĝas.

³²Bruu la maro, kaj ĉio, kio ĝin plenigas; Ĝoju la kampo, kaj ĉio, kio estas sur ĝi.

³³Tiam kantu ĉiuj arboj de la arbaro antaŭ la Eternulo, Ĉar Li venas, por juĝi la teron.

³⁴Laŭdu la Eternulon, ĉar Li estas bona; Ĉar eterna estas Lia favorkoreco.

³⁵Kaj diru: Savu nin, ho Dio de nia savo, Kolektu nin kaj liberigu nin el inter la nacioj, Por ke ni danku Vian sanktan nomon, Por ke ni gloru nin per Via majesto.

³⁶Benata estu la Eternulo, Dio de Izrael, De eterne ĝis eterne. Kaj la tuta popolo diris: Amen! kaj gloro al la Eternulo!

³⁷Kaj li restigis tie antaŭ la kesto de interligo de la Eternulo Asafon kaj liajn fratojn, por servadi antaŭ la kesto konstante, laŭ la ordo de ĉiu tago;

³⁸kaj Obed-Edomon kaj liajn fratojn, sesdek ok; Obed-Edom, filo de Jedutun, kaj Ĥosa, restis kiel pordegistoj;

³⁹kaj la pastron Cadok kaj liajn fratojn, la pastrojn, antaŭ la loĝejo de la Eternulo sur la altaĵo en Gibeon,

⁴⁰por ke ili alportadu bruloferojn al la Eternulo sur la altaro de bruloferoj konstante, matene kaj vespere, kaj por ĉio, kio estas skribita en la instruo de la Eternulo, kiun Li donis al Izrael.

⁴¹Kaj kun ili estis Heman kaj Jedutun, kaj la aliaj elektitoj, difinitaj laŭnome, por kantadi laŭdon al la Eternulo, ĉar eterna estas Lia favorkoreco;

⁴²kun ili estis Heman kaj Jedutun, kun trumpetoj kaj cimbaloj kaj aliaj instrumentoj por kantado antaŭ Dio; kaj la filoj de Jedutun estis ĉe la pordego.

⁴³Kaj la tuta popolo disiris ĉiu en sian domon; kaj David iris returne, por beni sian domon.