Read La Sankta Biblio esparanto Ijob 17 Bible Online

Ijob 17 - La Sankta Biblio esparanto bible

Ijob 17

¹Mia spirito senfortiĝis, miaj tagoj mallongiĝis, Tomboj estas antaŭ mi.

²Mokado min ĉirkaŭas; En aflikto pro tio restas mia okulo.

³Estu Vi mem mia garantianto antaŭ Vi; Alie kiu donos la manon pro mi?

⁴Ĉar ilian koron Vi kovris kontraŭ prudento; Tial Vi ne donos al ili triumfon.

⁵Se iu fanfaronas antaŭ siaj amikoj pri sia parto, La okuloj de liaj infanoj konsumiĝos.

⁶Li faris min proverbo por la popoloj; Kaj mi fariĝis homo, al kiu oni kraĉas en la vizaĝon.

⁷Mia okulo mallumiĝis de ĉagreno, Kaj ĉiuj miaj membroj fariĝis kiel ombro.

⁸La justuloj eksentos teruron pro tio, Kaj la senkulpulo ekscitiĝos kontraŭ la hipokritulo.

⁹Tamen la virtulo forte konservos sian vojon, Kaj la purmanulo pli firmiĝos.

¹⁰Kaj kiom ajn vi ĉiuj revenos, Mi ne trovos inter vi saĝulon.

¹¹Miaj tagoj forpasis, pereis miaj intencoj, Kiujn havis mia koro.

¹²La nokton ili volas fari tago, La lumon alproksimigi al la mallumo.

¹³Se mi atendas, tamen Ŝeol estas mia domo, En la mallumo estas pretigita mia lito.

¹⁴Al la kavo mi diras: Vi estas mia patro; La vermojn mi nomas mia patrino kaj mia fratino.

¹⁵Kion mi devas atendi? Kiu atentos mian esperon?

¹⁶En la profundon de Ŝeol ĝi malsupreniros, Ni ambaŭ kune kuŝos en la polvo.