Read La Sankta Biblio esparanto Ijob 18 Bible Online

Ijob 18 - La Sankta Biblio esparanto bible

Ijob 18

¹Ekparolis Bildad, la Ŝuĥano, kaj diris:

²Kiam vi ĉesos ĵetadi vortojn? Pripensu, kaj poste ni parolos.

³Kial ni estu rigardataj kiel brutoj, Kaj ni estu malpuruloj en viaj okuloj?

⁴Ho vi, kiu disŝiras sian animon en sia kolero, Ĉu por vi estu forlasata la tero, Kaj roko forŝoviĝu de sia loko?

⁵La lumo de la malpiulo estingiĝos, Kaj ne brilos la flamo de lia fajro.

⁶La lumo mallumiĝos en lia tendo, Kaj lia lucerno super li estingiĝos.

⁷Mallongiĝos liaj fortaj paŝoj, Kaj lia propra intenco lin faligos.

⁸Ĉar li trafis per siaj piedoj en reton, Kaj li moviĝas en kaptilo.

⁹La maŝo enkroĉigos lian kalkanon, Kaj pereo lin atakos.

¹⁰Kaŝita en la tero estas lia falilo, Kaj kaptiloj kontraŭ li estas sur la vojo.

¹¹De ĉiuj flankoj timigos lin teruroj Kaj atakos liajn piedojn.

¹²Malsato konsumos lian forton, Kaj pereo estas preparita por liaj flankoj.

¹³Konsumiĝos la membroj de lia korpo, Liajn membrojn konsumos la unuenaskito de la morto.

¹⁴Lia espero estos elŝirita el lia tendo, Kaj ĝi pelos lin al la reĝo de teruroj.

¹⁵Nenio restos en lia tendo; Sur lian loĝejon ŝutiĝos sulfuro.

¹⁶Malsupre sekiĝos liaj radikoj, Kaj supre detranĉiĝos liaj branĉoj.

¹⁷La memoro pri li malaperos de sur la tero, Kaj sur la stratoj li ne havos nomon.

¹⁸Li estos elpelita el lumo en mallumon, Kaj el la mondo li estos elpuŝita.

¹⁹Nek filon nek nepon li havos en sia popolo, Kaj neniu restos ĉe li en lia loĝloko.

²⁰La posteuloj sentos teruron pri lia tago, Kaj la antaŭulojn kaptos timo.

²¹Tia estas la loĝejo de maljustulo, Kaj tia estas la loko de tiu, kiu ne konas Dion.