Read La Sankta Biblio esparanto Ijob 23 Bible Online

Ijob 23 - La Sankta Biblio esparanto bible

Ijob 23

¹Ijob respondis kaj diris:

²Eĉ hodiaŭ mia parolado restas maldolĉa; Mia suferado estas pli peza, ol miaj ĝemoj.

³Ho, se mi scius, kiamaniere mi povas Lin trovi, Veni al Lia trono!

⁴Mi prezentus al Li juĝan aferon, Kaj mian buŝon mi plenigus per argumentoj.

⁵Mi ekscius la vortojn, kiujn Li respondus al mi; Mi komprenus, kion Li dirus al mi.

⁶Ĉu en la grandeco de Sia forto Li luktus kontraŭ mi? Ne, Li nur atentu min;

⁷Tiam pravulo procesus kun Li, Kaj mi liberiĝus por ĉiam de mia Juĝanto.

⁸Sed jen mi iras antaŭen, kaj Li tie ne estas; Mi iras malantaŭen, kaj mi Lin ne rimarkas;

⁹Se Li faras ion maldekstre, mi Lin ne trovas; Se Li kaŝas Sin dekstre, mi Lin ne vidas.

¹⁰Sed mian vojon Li konas; Se Li min elprovos, mi eliros kiel oro.

¹¹Sur Lia irejo forte teniĝas mia piedo; Lian vojon mi konservis, kaj ne forkliniĝis.

¹²Mi ne deturnas min de la ordonoj de Liaj lipoj; Pli ol mian propran leĝon mi konservis la dirojn de Lia buŝo.

¹³Sed Li estas sola: kiu kontraŭstaros al Li? Kion Lia animo deziras, tion Li faras.

¹⁴Kio estas destinita por mi, tion Li plenumos; Kaj Li havas multe da similaj aferoj.

¹⁵Tial mi tremas antaŭ Lia vizaĝo, Mi primeditas, kaj mi timas Lin.

¹⁶Dio senkuraĝigis mian koron, Kaj la Plejpotenculo min konfuzis.

¹⁷Ĉar mi ne estas neniigita antaŭ la mallumo, Kaj antaŭ mia vizaĝo Li ne kovris la mallumon.