Read La Sankta Biblio esparanto Ijob 27 Bible Online

Ijob 27 - La Sankta Biblio esparanto bible

Ijob 27

¹Kaj Ijob daŭrigis siajn sentencojn, kaj diris:

²Kiel vivas Dio, kiu rifuzis al mi miajn rajtojn, Kaj la Plejpotenculo, kiu afliktas mian animon:

³Tiel longe, kiel mia animo estas en mi Kaj la spiro de Dio en mia nazo,

⁴Miaj lipoj ne eldiros malĝustaĵon, Kaj mia lango ne diros malveraĵon.

⁵Malproksime estas de mi, Rigardi vin kiel pravajn; Ĝis mia morto mi ne ĉesos rigardi min kiel senkulpan.

⁶Mian pravecon mi tenas forte, kaj mi ne ellasos ĝin; Dum mia tuta vivo mia koro ne faros al mi riproĉon pri tio.

⁷Mia malamiko estu rigardata kiel malvirtulo, Kaj mia kontraŭulo kiel malpiulo.

⁸Ĉar kio estas la espero de hipokritulo, Kiam Dio faras al li finon, elŝiras lian animon?

⁹Ĉu lian kriadon Dio aŭskultos, Kiam trafos lin malfeliĉo?

¹⁰Ĉu li povas havi ĝuon de la Plejpotenculo, Voki al Dio en ĉiu tempo?

¹¹Mi instruos vin pri la mano de Dio; Mi ne kaŝos antaŭ vi tion, kio estas ĉe la Plejpotenculo.

¹²Jen vi ĉiuj mem vidis; Kial do vi parolas senenhavaĵon?

¹³Tia estas la sorto de malbona homo ĉe Dio, Kaj la parto, kiun tiranoj ricevas de la Plejpotenculo:

¹⁴Se li havos multe da filoj, ili iros sub la glavon; Kaj lia devenantaro ne havos sate panon.

¹⁵Tiujn, kiuj restos ĉe li, enterigos la morto; Kaj liaj vidvinoj ne ploros.

¹⁶Se li kolektos arĝenton kiel polvon Kaj pretigos al si vestojn kiel argilon,

¹⁷Tiam li pretigos, sed justulo metos sur sin la vestojn, Kaj senkulpulo dividos la arĝenton.

¹⁸Li konstruas sian domon kiel tineo, Kaj kiel gardisto, kiu faras al si laŭbon.

¹⁹Li kuŝiĝas riĉa, kaj nenion kunportas; Li malfermas la okulojn, kaj jam nenio ekzistas.

²⁰Teruro superfalos lin kiel akvo; En la nokto forportos lin ventego.

²¹Levos lin vento orienta, kaj foriros, Kaj forblovos lin de lia loko.

²²Li tion ĵetos sur lin senkompate; De Lia mano li kuros kaj kuros.

²³Oni kunfrapos pri li la manojn, Kaj oni fajfos pri li sur lia loko.