Read La Sankta Biblio esparanto Ijob 40 Bible Online

Ijob 40 - La Sankta Biblio esparanto bible

Ijob 40

¹Kaj la Eternulo plue parolis al Ijob, kaj diris:

²Ĉu povas blasfemanto disputi kun la Plejpotenculo? La mallaŭdanto de Dio tion respondu.

³Kaj Ijob respondis al la Eternulo, kaj diris:

⁴Jen mi estis facilanima; kion mi povas respondi al Vi? Mi metas mian manon sur mian buŝon.

⁵Unu fojon mi parolis, kaj mi ne respondos; Tion mi ne faros duan fojon.

⁶Kaj la Eternulo respondis al Ijob el la ventego, kaj diris:

⁷Zonu kiel viro viajn lumbojn; Mi vin demandos, kaj vi sciigu al Mi.

⁸Ĉu vi volas senvalorigi Mian verdikton, Akuzi Min, por ke vi montriĝu prava?

⁹Se vi havas tian brakon, kiel Dio, Kaj se vi povas tondri per voĉo simile al Li,

¹⁰Tiam ornamu vin per majesto, kaj altiĝu, Vestu vin per gloro kaj belegeco;

¹¹Elverŝu la furiozon de via kolero; Ekrigardu ĉion fieran kaj humiligu ĝin;

¹²Ekrigardu ĉiun fierulon kaj konfuzu lin; Kaj frakasu la malpiulojn sur ilia loko;

¹³Kaŝu ilin ĉiujn en la tero; Ilian vizaĝon kovru per mallumo.

¹⁴Tiam Mi gloros vin, Se via dekstra mano vin helpos.

¹⁵Vidu la hipopotamon, kiun Mi kreis apud vi; Herbon ĝi manĝas, kiel bovo.

¹⁶Vidu, ĝia forto estas en ĝiaj lumboj, Kaj ĝia fortikeco estas en la muskoloj de ĝia ventro.

¹⁷Ĝi streĉas sian voston kiel cedron, La tendenoj de ĝiaj femuroj estas interplektitaj.

¹⁸Ĝiaj ostoj estas kiel kupraj tuboj, Ĝiaj ostoj estas kiel feraj stangoj.

¹⁹Ĝi estas la komenco de la vojoj de Dio; Ĝia Kreinto donis al ĝi ĝian glavon.

²⁰La montoj alportas al ĝi manĝaĵon, Kaj ĉiuj bestoj de la kampo tie ludas.

²¹Sub ombroriĉaj arboj ĝi kuŝas, Sub kovro de kanoj kaj en ŝlimo.

²²Ombroriĉaj arboj ŝirmas ĝin per sia ombro, Ĉirkaŭas ĝin salikoj apud torentoj.

²³Se la rivero tumultas, ĝi ne konfuziĝas; Ĝi staras trankvile, se eĉ Jordan enverŝiĝus en ĝian buŝon.

²⁴Ĉu iu povas preni ĝin antaŭ ĝiaj okuloj, Ĉu iu povas trabori per ŝnuroj ĝian nazon?