Read La Sankta Biblio esparanto Ijob 5 Bible Online

Ijob 5 - La Sankta Biblio esparanto bible

Ijob 5

¹Voku do! ĉu iu respondos al vi? Kaj al kiu el la sanktuloj vi vin turnos?

²Malsaĝulon mortigas la kolero, Kaj sensenculon pereigas la incitiĝemeco.

³Mi vidis malsaĝulon, kiu enradikiĝis, Kaj mi malbenis subite lian loĝejon.

⁴Malproksimaj de savo estos liaj filoj; Oni disbatos ilin ĉe la pordego, Kaj neniu ilin savos.

⁵Lian rikoltaĵon formanĝos malsatulo, El inter la dornoj li ĝin prenos, Kaj soifantoj englutos lian havaĵon.

⁶Ne el la polvo eliras malpiaĵo, Kaj ne el la tero elkreskas malbonago.

⁷Sed homo naskiĝas por suferoj, Kiel birdoj por flugado supren.

⁸Sed mi min turnus al Dio, Kaj al Li mi transdonus mian aferon;

⁹Al Tiu, kiu faras grandaĵojn, kiujn neniu povas esplori, Mirindaĵojn, kiujn neniu povas kalkuli;

¹⁰Kiu donas pluvon sur la teron Kaj sendas akvon sur la kampojn,

¹¹Por starigi malaltulojn alte, Ke la afliktitoj leviĝu savite.

¹²Li detruas la intencojn de ruzuloj, Ke iliaj manoj ne plenumas sian entreprenon.

¹³Li kaptas la saĝulojn per ilia ruzaĵo; Kaj la decido de maliculoj fariĝas senvalora.

¹⁴En la tago ili renkontas mallumon, Kaj en tagmezo ili palpas, kiel en nokto.

¹⁵Li savas kontraŭ glavo, Kontraŭ la buŝo kaj mano de potenculo Li savas malriĉulon.

¹⁶Al la senhavulo aperas espero, Kaj la malboneco fermas sian buŝon.

¹⁷Feliĉa estas la homo, kiun punas Dio; Kaj la moralinstruon de la Plejpotenculo ne malŝatu;

¹⁸Ĉar Li vundas, sed ankaŭ bandaĝas; Li batas, sed Liaj manoj ankaŭ resanigas.

¹⁹En ses malfeliĉoj Li vin savos; En la sepa ne tuŝos vin la malbono.

²⁰En tempo de malsato Li savos vin de la morto, Kaj en milito el la mano de glavo.

²¹Kontraŭ la vipo de lango vi estos kaŝita; Kaj vi ne timos ruinigon, kiam ĝi venos.

²²Dum ruinigo kaj malsato vi ridos; Kaj la bestojn de la tero vi ne timos;

²³Ĉar kun la ŝtonoj de la kampo vi havos interligon, Kaj la bestoj de la kampo havos pacon kun vi.

²⁴Kaj vi ekscios, ke paco estas en via tendo; Vi esploros vian loĝejon, kaj nenio mankos.

²⁵Kaj vi ekscios, ke grandnombra estas via idaro Kaj via naskitaro estas kiel la herbo de la tero.

²⁶En maljuneco vi iros en la tombon, Kiel envenas garbaro en sia tempo.

²⁷Vidu, ni tion esploris, kaj tiel ĝi estas; Atentu tion, kaj sciu tion.