Read La Sankta Biblio esparanto Ijob 8 Bible Online

Ijob 8 - La Sankta Biblio esparanto bible

Ijob 8

¹Kaj ekparolis Bildad, la Ŝuĥano, kaj diris:

²Kiel longe vi tiel parolos, Kaj la vortoj de via buŝo estos kiel forta vento?

³Ĉu Dio falsas la juĝon? Ĉu la Plejpotenculo falsas la justecon?

⁴Se viaj filoj pekis kontraŭ Li, Li forpuŝis ilin pro ilia malbonago.

⁵Se vi serĉas Dion Kaj petegas la Plejpotenculon,

⁶Se vi estas pura kaj pia, Li maldormos super vi, Kaj restarigos la bonstaton en via virta loĝejo.

⁷Kaj se via komenco estis malgranda, Via estonteco forte kreskos.

⁸Ĉar demandu la antaŭajn generaciojn, Kaj primeditu tion, kion esploris iliaj patroj;

⁹Ĉar ni estas de hieraŭ, kaj ni nenion scias; Nia vivo sur la tero estas nur ombro.

¹⁰Ili instruos vin, diros al vi, Kaj el sia koro elirigos vortojn.

¹¹Ĉu povas kreski kano sen malsekeco? Ĉu kreskas junko sen akvo?

¹²En tia okazo ĝi velksekiĝas pli frue ol ĉiu herbo, Kiam ĝi estas ankoraŭ en sia freŝeco, Kiam ĝi ankoraŭ ne estas detranĉita.

¹³Tiaj estas la vojoj de ĉiuj, kiuj forgesas Dion; Kaj pereas la espero de hipokritulo,

¹⁴Kies fido dehakiĝas, Kaj kies espero estas araneaĵo.

¹⁵Li apogas sin al sia domo, sed ne restos staranta; Li ekkaptos ĝin, sed ne povos sin teni.

¹⁶Li estis verda antaŭ la suno, Kaj super lia ĝardeno etendiĝas liaj branĉoj;

¹⁷Amase plektiĝas liaj radikoj, Inter ŝtonoj ili tenas sin forte;

¹⁸Sed kiam oni elŝiras lin el lia loko, Ĝi malkonfesas lin: Mi vin ne vidis.

¹⁹Tia estas la ĝojo de lia vivo; Kaj el la tero kreskas aliaj.

²⁰Vidu, Dio ne forpuŝas virtulon Kaj ne subtenas la manon de malpiuloj.

²¹Li plenigos ankoraŭ vian buŝon per rido Kaj viajn lipojn per ĝojkrioj.

²²Viaj malamantoj kovriĝos per honto; Sed la tendo de malpiuloj malaperos.