Read La Sankta Biblio esparanto Psalmo 10 Bible Online

Psalmo 10 - La Sankta Biblio esparanto bible

Psalmo 10

¹Kial, ho Eternulo, Vi staras malproksime? Kial Vi kaŝas Vin en la tempo de la mizero?

²Pro la malhumileco de malbonulo suferas malriĉulo; Ili kaptiĝu per la artifikoj, kiujn ili elpensis.

³Ĉar malbonulo fanfaronas pri la kapricoj de sia animo; Rabanto forlasas, malŝatas la Eternulon.

⁴Malpiulo en sia malhumileco ne esploras; En ĉiuj liaj pensoj Dio ne ekzistas.

⁵Li ĉiam iras forte laŭ siaj vojoj; Viaj juĝoj estas tro alte super li; Ĉiujn siajn malamikojn li forspitas.

⁶Li diris en sia koro: Mi ne ŝanceliĝos, De generacio al generacio neniam estos al mi malbone.

⁷Lia buŝo estas plena de malbenado, trompo, kaj malico; Sub lia lango estas suferigo kaj malvero.

⁸Inside li sidas en la vilaĝoj; Kaŝe li mortigas senkulpulon; Liaj okuloj spionas malriĉulon.

⁹Li sidas inside en kaŝita loko, kiel leono en la kaverno; Li insidas, por kapti malriĉulon; Kaj li kaptas malriĉulon, tirante lin en sian reton.

¹⁰Li insidas, alpremiĝas, Kaj la malriĉulo falas en liajn fortajn ungegojn.

¹¹Li diras en sia koro: Dio forgesis, Li kovras Sian vizaĝon, Li neniam vidos.

¹²Leviĝu, ho Eternulo; ho Dio, levu Vian manon; Ne forgesu mizerulojn.

¹³Por kio malpiulo malŝatas Dion, Kaj diras en sia koro, ke Vi ne postulos respondon?

¹⁴Vi vidas ja, ĉar mizerojn kaj suferojn Vi rigardas, por redoni laŭ Via forto. Al Vi fordonas sin malriĉulo; Por orfo Vi estas helpanto.

¹⁵Rompu la brakon de malpiulo kaj malbonulo, Por ke eĉ serĉante lian malbonon, oni ĝin ne trovu.

¹⁶La Eternulo estas Reĝo por eterne kaj ĉiam, Pereis la idolistoj de Lia tero.

¹⁷Deziron de humiluloj Vi aŭdas, ho Eternulo; Vi fortigas ilian koron, Vi atentigas Vian orelon,

¹⁸Por doni juĝon al orfo kaj premato, Por ke oni ĉesu peli homon de la tero.