Read La Sankta Biblio esparanto Psalmo 105 Bible Online

Psalmo 105 - La Sankta Biblio esparanto bible

Psalmo 105

¹Gloru la Eternulon, voku Lian nomon; Sciigu inter la popoloj Liajn farojn.

²Kantu al Li, muziku al Li; Parolu pri ĉiuj Liaj mirakloj.

³Laŭdu Lian sanktan nomon; Ĝoju la koro de tiuj, kiuj serĉas la Eternulon.

⁴Turnu vin al la Eternulo kaj al Lia potenco; Serĉu ĉiam Lian vizaĝon.

⁵Memoru Liajn miraklojn, kiujn Li faris, Liajn signomiraklojn kaj la juĝojn de Lia buŝo;

⁶Vi, semo de Abraham, Lia sklavo, Filoj de Jakob, Liaj elektitoj.

⁷Li estas la Eternulo, nia Dio; Sur la tuta tero estas Liaj juĝoj.

⁸Li memoras eterne Sian interligon, La vorton, kiun Li testamentis por mil generacioj,

⁹Kiun Li interkonsentis kun Abraham Kaj ĵuris al Isaak.

¹⁰Li metis ĝin por Jakob kiel leĝon, Por Izrael kiel eternan interligon,

¹¹Dirante: Al vi Mi donos la landon Kanaanan Kiel vian parton heredan.

¹²Kiam ili estis malgrandnombraj, Malmultaj, kaj fremduloj en ĝi,

¹³Kaj ili iradis de popolo al popolo, El unu regno al alia gento,

¹⁴Tiam Li al neniu permesis premi ilin, Kaj Li punis pro ili reĝojn, dirante:

¹⁵Ne tuŝu Miajn sanktoleitojn, Kaj al Miaj profetoj ne faru malbonon.

¹⁶Kaj Li sendis malsaton en la landon, Rompis ĉion, kio portis panon.

¹⁷Li sendis antaŭ ili homon: Jozef estis vendita kiel sklavo.

¹⁸Oni enpremis liajn piedojn en katenojn, Fero ŝarĝis lian korpon,

¹⁹Ĝis la tempo, kiam venis Lia vorto; La parolo de la Eternulo lin elprovis.

²⁰Reĝo sendis kaj malligis lin, Reganto super popoloj liberigis lin;

²¹Li faris lin sinjoro super lia domo Kaj reganto super lia tuta havo,

²²Ke li submetu al si liajn eminentulojn Kaj saĝigu liajn maljunulojn.

²³Kaj Izrael venis en Egiptujon, Kaj Jakob enmigris en la landon de Ĥam.

²⁴Kaj Li tre kreskigis Sian popolon, Kaj faris ĝin pli forta ol ĝiaj malamikoj.

²⁵Li malĝustigis ilian koron, Ke ili ekmalamis Lian popolon, ekruzis kontraŭ Liaj sklavoj.

²⁶Li sendis Moseon, Sian sklavon, Kaj Aaronon, kiun Li elektis.

²⁷Ili faris inter ili Liajn pruvosignojn Kaj miraklojn en la lando de Ĥam.

²⁸Li sendis mallumon kaj mallumigis; Kaj ili ne atentis Liajn vortojn.

²⁹Li ŝanĝis ilian akvon en sangon, Kaj senvivigis iliajn fiŝojn.

³⁰Ilia tero eksvarmigis ranojn, En la ĉambroj de iliaj reĝoj.

³¹Li diris, kaj venis fiinsektoj, Pedikoj en ĉiuj iliaj regionoj.

³²Antataŭ pluvo Li donis al ili hajlon, Flamantan fajron en ilia lando.

³³Li batis iliajn vinbertrunkojn kaj iliajn figarbojn, Kaj rompis la arbojn en iliaj limoj.

³⁴Li diris, kaj venis akridoj kaj skaraboj sennombraj

³⁵Kaj formanĝis la tutan herbon en ilia lando Kaj formanĝis la produktojn de ilia tero.

³⁶Kaj Li mortigis ĉiujn unuenaskitojn en ilia lando, La komencaĵojn de ĉiuj iliaj fortoj.

³⁷Sed ilin Li elkondukis kun arĝento kaj oro, Kaj en iliaj triboj estis neniu kadukulo.

³⁸Ĝojis Egiptujo, kiam ili eliris, Ĉar atakis ĝin timo antaŭ ili.

³⁹Li etendis nubon, kiel kovron; Kaj fajron, por ke ĝi lumu en la nokto.

⁴⁰Ili petis, kaj Li sendis koturnojn, Kaj per pano ĉiela Li ilin satigis.

⁴¹Li malfermis rokon, Kaj ekfluis akvo kaj ekiris kiel rivero en la dezerto.

⁴²Ĉar Li memoris Sian sanktan vorton Al Abraham, Sia sklavo.

⁴³Kaj Li elkondukis Sian popolon en ĝojo, Siajn elektitojn kun kantado.

⁴⁴Kaj Li donis al ili la landojn de popoloj, Kaj la laboron de gentoj ili heredis;

⁴⁵Por ke ili plenumu Liajn leĝojn Kaj konservu Liajn instruojn. Haleluja!