Read La Sankta Biblio esparanto Psalmo 118 Bible Online

Psalmo 118 - La Sankta Biblio esparanto bible

Psalmo 118

¹Haleluja! Gloru la Eternulon, ĉar Li estas bona; Ĉar eterna estas Lia boneco.

²Izrael diru, Ke eterna estas Lia boneco.

³La domo de Aaron diru, Ke eterna estas Lia boneco.

⁴La timantoj de la Eternulo diru, Ke eterna estas Lia boneco.

⁵El premateco mi vokis al la Eternulo, Kaj per liberigo respondis al mi la Eternulo.

⁶La Eternulo estas kun mi, mi ne timas; Kion faros al mi homo?

⁷La Eternulo estas kun mi, kiel mia helpanto; Kaj mi triumfos super miaj malamikoj.

⁸Pli bone estas fidi la Eternulon, Ol fidi homon.

⁹Pli bone estas fidi la Eternulon, Ol fidi eminentulojn.

¹⁰Ĉiuj popoloj min ĉirkaŭis, Sed per la nomo de la Eternulo mi ilin disbatos.

¹¹Ili ĉirkaŭis min de ĉiuj flankoj, Sed per la nomo de la Eternulo mi ilin disbatos.

¹²Ili ĉirkaŭis min kiel abeloj, Sed ili estingiĝas, kiel fajro en dornoj; Per la nomo de la Eternulo mi ilin disbatos.

¹³Oni min puŝis, ke mi falu; Sed la Eternulo min helpis.

¹⁴La Eternulo estas mia forto kaj mia kanto, Kaj Li fariĝis mia savo.

¹⁵La voĉo de triumfo kaj de saviĝo sonas en la tendoj de la virtuloj: La dekstra mano de la Eternulo faras heroaĵojn;

¹⁶La dekstra mano de la Eternulo estas alte, La dekstra mano de la Eternulo faras heroaĵojn.

¹⁷Mi ne mortos, sed mi vivos, Kaj mi rakontos la farojn de la Eternulo.

¹⁸Per forta puno punadis min la Eternulo, Sed al la morto Li min ne donis.

¹⁹Malfermu al mi la pordegojn de la vero; Mi iros tra ili, mi gloros la Eternulon.

²⁰Jen estas la pordego de la Eternulo; Virtuloj iras tra ĝi.

²¹Mi dankas Vin, Ĉar Vi aŭskultis min kaj fariĝis mia savo.

²²Ŝtono, kiun malŝatis la konstruantoj, Fariĝis ŝtono bazangula.

²³De la Eternulo ĉi tio fariĝis, Ĝi estas miraklo en niaj okuloj.

²⁴Ĉi tiun tagon faris la Eternulo; Ni ĝoju kaj gajiĝu en ĝi.

²⁵Ho Eternulo, helpu! Ho Eternulo, sukcesigu!

²⁶Estu benata tiu, kiu venas en la nomo de la Eternulo! Ni benas vin el la domo de la Eternulo.

²⁷La Eternulo estas Dio, kaj Li lumas al ni. Aranĝu la festan procesion kun branĉoj ĝis la kornoj de la altaro.

²⁸Vi estas mia Dio, kaj mi Vin gloras; Mia Dio, Vin mi altigas.

²⁹Gloru la Eternulon, ĉar Li estas bona; Ĉar eterna estas Lia boneco.